قازىرگى ۋاقىتتا ينۆەستورلاردى باعالى قاعازدار نارىعىنا ينۆەستيسيالاۋ كەزىندە ىقتيمال شىعىنداردان قورعاۋ ماقساتىندا قارجى نارىعىن رەتتەۋ جانە دامىتۋ اگەنتتىگى كۇردەلى قارجى قۇرالدارىن ساتىپ الۋ ءۇشىن زاڭنامالىق شەكتەۋلەر بەلگىلەدى، دەپ جازادى Dalanews.kz.
- ەندى كۇردەلى قارجى قۇرالدارىن تەك بىلىكتى ينۆەستورلارعا ساتىپ الۋعا رۇقسات ەتىلەدى، - دەيدى قنردا باعالى قاعازدار نارىعى دەپارتامەنتىنىڭ ديرەكتورى ايدىن داۋلەتباق.
ونىڭ ايتۋىنشا، جاڭا زاڭنامالىق تۇزەتۋلەرگە سايكەس قارجى قۇرالدارىنىڭ تىزبەسىنە تۋىندى باعالى قاعازدار جانە/نەمەسە وزگە دە تۋىندى قارجى قۇرالدارى، سونداي-اق شىعارۋ تالاپتارىندا ولاردىڭ بولشەك ينۆەستورلارعا ارنالماعانى كوزدەلگەن قارجى قۇرالدارى كىرەدى. بۇل شەكتەۋلەر سونىڭ ىشىندە جاھاندىق دەپوزيتارلىق قولحاتتاردى (GDR/ADR) قامتيدى.
"دەپوزيتارلىق قولحات – بۇل كاستوديان بانكتە نەمەسە دەپوزيتارلىق ۇيىمدا ساقتالاتىن شەتەلدىك اكسيالاردىڭ بەلگىلى ءبىر سانىنا يەلىك ەتۋ قۇقىعىن كۋالاندىراتىن تۋىندى باعالى قاعاز. سونىمەن قاتار، دەپوزيتارلىق قولحاتتار اكسيونەرلەردىڭ جالپى جينالىسىندا داۋىس بەرۋ قۇقىقتارى، ديۆيدەندتەر الۋ جانە ولارعا سالىق سالۋ، سونداي-اق ولارعا قاتىستى قولدانىلاتىن زاڭناما بويىنشا بازالىق اكتيۆتەن كەيبىر ايىرماشىلىقتارعا يە بولۋى مۇمكىن"، - دەيدى ول.
وسىلايشا، دەپوزيتارلىق قولحاتتار ينۆەستيسيالاۋعا بايلانىستى تاۋەكەلدەردى تولىق ءتۇسىنۋ ءۇشىن بولشەك ينۆەستورلاردان بەلگىلى ءبىر ءبىلىمنىڭ بولۋىن تالاپ ەتەتىن كۇردەلى قارجى قۇرالدارى.
بۇل رەتتە قارجى قۇرالدارىنىڭ تىزبەسىنە ەنگىزىلگەن تۇزەتۋلەر بولشەك ينۆەستورلاردىڭ دەپوزيتارلىق قولحاتتاردى ساتىپ الۋىنا تىيىم سالۋدى كوزدەمەيدى. ولار بىلىكتى ينۆەستور مارتەبەسىن الۋ ارقىلى اتالعان قارجى قۇرالدارىن ساتىپ الا الادى.
بىلىكتى ينۆەستور مارتەبەسىن بروكەر تاعايىندايدى. بىلىكتى ينۆەستور مارتەبەسىن الۋ ءۇشىن جەكە تۇلعا مىناداي تالاپتاردىڭ بىرىنە نەمەسە بىرنەشەۋىنە سايكەس كەلۋى ءتيىس:
- قارجى جانە ەكونوميكا سالاسىندا جوعارى ءبىلىمىنىڭ، CFA، FRMC، CIIA سەرتيفيكاتتارىنىڭ بولۋى،
- ينۆەستيسيالار سالاسىندا ەڭبەك ءوتىلى بولۋى
- كەمىندە 8 500 اەك (شامامەن 30 ملن تەڭگە) مولشەرىندە اكتيۆتەرىنىڭ بولۋى
- قارجى قۇرالدارىمەن ساۋدا بويىنشا تاجىريبەسى بولۋى كەرەك (سوڭعى 12 ايدا كەمىندە 50 مامىلە).
ەگەر ينۆەستور كورسەتىلگەن تالاپتارعا سايكەس كەلمەگەن جاعدايدا، ول تەستىلەۋدەن وتكەننەن كەيىن قارجى قۇرالدارىنىڭ بارلىق تىزبەسىنە قاتىستى دا، قارجى قۇرالدارىنىڭ جەكەلەگەن تۇرلەرى بويىنشا دا بىلىكتى دەپ تانىلۋى مۇمكىن. بۇل رەتتە تەستىلەۋ شەڭبەرىندە بروكەر ينۆەستوردىڭ قانداي دا ءبىر قارجى قۇرالىمەن بايلانىستى تاۋەكەلدەردى قانشالىقتى تۇسىنەتىنىن تەكسەرۋى ءتيىس.
ەگەر ينۆەستور دۇرىس جاۋاپتاردىڭ قاجەتتى سانىن جيناماسا، وندا ول بروكەردىڭ ينۆەستيسيالاۋ تاۋەكەلدەرى تۋرالى حابارلاماسىمەن تانىسىپ، قول قويعاننان كەيىن عانا كۇردەلى قارجى قۇرالدارىن ساتىپ الا الادى.
بىلىكتى ينۆەستور مارتەبەسىن الۋ ءۇشىن وسى شارتتار زاڭدى تۇلعالارعا قاتىستى قولدانىلمايدى.
"وسىلايشا، بۇل وزگەرىستەر بىلىكتى ەمەس ينۆەستورلاردىڭ قۇقىقتارى مەن مۇددەلەرىن قورعاۋعا، سونداي-اق الەۋەتتى ينۆەستورلاردى قوسا العاندا، حالىقتىڭ قارجىلىق ساۋاتتىلىعىن ارتتىرۋعا باعىتتالعان".
