ەلدە ەڭ تومەنگى جالاقىنى ەسەپتەۋدىڭ جاڭا ءتاسىلى دايىندالىپ جاتىر. ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆتىڭ ايتۋىنشا، بۇل ءتاسىل 2026 جىلدىڭ سوڭىنا دەيىن بەكىتىلىپ، 2027 جىلدان باستاپ قولدانىسقا ەنۋى ىقتيمال، دەپ حابارلايدى Dalanews.kz.
جاڭا ەسەپتەۋ ءادىسى ەكى نەگىزگى كورسەتكىشكە سۇيەنەدى: ەڭبەك ونىمدىلىگى مەن مەديانالىق جالاقى. قۇجات قارجى مينيسترلىگى جانە ۇلتتىق ەكونوميكا مينيسترلىگىنە جولدانىپ، ءقازىر ساراپشىلارمەن تالقىلانىپ جاتىر.
قازىرگى ەڭ تومەنگى جالاقى 85 مىڭ تەڭگە دەڭگەيىندە. ءمينيستردىڭ سوزىنشە، بۇل كورسەتكىش وسسە، بارلىق ەسەپتەۋ وسى بازادان باستالادى. سونىڭ ناتيجەسىندە بيۋدجەت سالاسىنداعى دا، جەكەمەنشىك سەكتورداعى دا جالاقى مولشەرى ارتادى.
مىسالى، ەڭ تومەنگى جالاقى 95 مىڭ تەڭگەگە دەيىن كوتەرىلسە، جالاقىنى ەسەپتەۋ وسى سومادان باستاپ جۇرگىزىلەدى. وعان قىزمەتكەردىڭ ەڭبەك ءوتىلى، اتقاراتىن قىزمەتى مەن لاۋازىمى قوسىلىپ، جالپى تابىس كولەمى انىقتالادى.
