Elde eń tómengi jalaqyny esepteýdiń jańa tásili daiyndalyp jatyr. Eńbek jáne halyqty áleýmettik qorǵaý ministri Asqarbek Ertaevtyń aitýynsha, bul tásil 2026 jyldyń sońyna deiin bekitilip, 2027 jyldan bastap qoldanysqa enýi yqtimal, dep habarlaidy Dalanews.kz.
Jańa esepteý ádisi eki negizgi kórsetkishke súienedi: eńbek ónimdiligi men medianalyq jalaqy. Qujat Qarjy ministrligi jáne Ulttyq ekonomika ministrligine joldanyp, qazir sarapshylarmen talqylanyp jatyr.
Qazirgi eń tómengi jalaqy 85 myń teńge deńgeiinde. Ministrdiń sózinshe, bul kórsetkish ósse, barlyq esepteý osy bazadan bastalady. Sonyń nátijesinde biýdjet salasyndaǵy da, jekemenshik sektordaǵy da jalaqy mólsheri artady.
Mysaly, eń tómengi jalaqy 95 myń teńgege deiin kóterilse, jalaqyny esepteý osy somadan bastap júrgiziledi. Oǵan qyzmetkerdiń eńbek ótili, atqaratyn qyzmeti men laýazymy qosylyp, jalpy tabys kólemi anyqtalady.
