دارىندى وقۋشىلار گرانتتار مەن سىياقىلارمەن ماراپاتتالادى. سونداي -اق ولاردىڭ مۇعالىمدەرىنە ىنتالاندىرۋ شارالارى قاراستىرىلعان.

بۇل تۋرالى قازاقستان حالقىنا جولداۋىندا قاسىم-جومارت توقايەۆ ءمالىم ەتتى، دەپ حابارلايدى Dalanews.kz.

"تاعى ءبىر ماسەلە تۋىنداپ جاتىر، مۇنى باسقا تۇسكەن زوبالاڭ دەپ ايتساق تا بولادى. بالالار مەكتەپتى تاستاپ كەتەدى، سەبەبى ونى قاجەت دەپ سانامايدى. ۇكىمەتكە بۇل ماسەلەنى بايىپتى تۇردە شەشۋدى تاپسىرامىن. اتاپ ايتقاندا، قاشىقتان وقىتۋ فورماتتارىنا ارنالعان اقپاراتتىق جۇيەلەردىڭ ساپاسىن ارتتىرۋ ارقىلى. ءبىزدىڭ ءبىلىم قولجەتىمدى جانە ينكليۋزيۆتى بولۋى كەرەك"، - دەدى پرەزيدەنت.

سونىمەن قاتار توقايەۆ بۇل رەتتە جاعىمدى جاڭالىقتار بار ەكەنىن اتاپ ءوتتى.

"بيىل بىرنەشە قازاقستاندىق مەكتەپ وقۋشىلارى حالىقارالىق تۋرنير وليمپيادالارىنىڭ جەڭىمپازدارى مەن جۇلدەگەرلەرى اتاندى. مۇنداي دارىندى بالالارعا بايىپتى قولداۋ قاجەت. ءبىز ولارعا جوعارى وقۋ ورىندارىنا كونكۋرستىق ەمەس نەگىزدە تۇسۋگە گرانتتار بەرىپ، ءبىرجولعى اقشالاي سىياقى تولەيمىز"، - دەدى ول.

مەملەكەت باسشىسىنىڭ ايتۋىنشا، دارىندى بالالاردى تاربيەلەگەن مۇعالىمدەردى مورالدىق جانە قارجىلاي ىنتالاندىرۋ قاجەت.

"جالپىعا بىردەي ءبىلىم بەرۋ اياسىندا الەۋمەتتىك وسال وتباسىلاردىڭ بالالارىن قولداۋدىڭ ماڭىزى زور. ماتەريالدىق قولداۋ شارالارى "سيفرلىق ءمۇعالىم" ءبىلىم بەرۋ جوباسىمەن تولىقتىرىلۋى ءتيىس. ءبىلىم بەرۋ جۇيەسىنە ىنتالى جانە بىلىكتى مۇعالىمدەر قاجەت.

مەن مۇعالىمدەردى قايتا دايارلاۋ قازىرگىدەي بەس جىل ەمەس، ءۇش جىل سايىن قاجەت دەپ ەسەپتەيمىن. ويتكەنى، ولار جاڭا ءبىلىمنىڭ تاسىمالداۋشىسى، ناعىز اعارتۋشى بولۋى كەرەك.

بۇل رەتتە ءبىز مۇعالىمدەردىڭ كۋرستاردى ءوز قاراجاتى ەسەبىنەن وقۋى سىندى جاعدايعا جول بەرمەۋىمىز كەرەك"، - دەپ ءسوزىن قورىتىندىلادى مەملەكەت باسشىسى.