بەكبولات تىلەۋحاندى ءبىز ءبىر ءسوزى ءۇشىن ءاردايىم قۇرمەتتەيمىز. سەبەبى ونداي ءسوزدى ول دەپۋتات بولىپ جۇرگەندە ايتقان. قانداي ءسوز دەسەڭىز، وقىپ شىعىڭىز:

«قازاقستان «ۆاحتا» سياقتى. بايلار اقشا جينايدى دا، شۆەيسارياعا بارىپ تۇرادى. اقشا جيناپ جاتقان ءبىراز ادامدار دۋبايدان، يسپانيادان ءۇي سالىپ قويدى.

بۇل نە دەگەن ءسوز؟ بۇل قازاقستان – تۇرۋعا كەلمەيدى دەگەن ءسوز. بۇل – ءبىزدىڭ ەل قارجى جيناۋدىڭ كوزى دەگەن ءسوز. حالىق وسى ەلمەن بولاشاعىن بايلاماسا، ۇرپاعىم وسىندا تۇرادى دەپ ەسەپتەمەسە، وسى جەردە قالامىن دەگەن ويى بولماسا، مۇندا دۇرىس مەملەكەت قۇرىلا ما؟ قۇرىلمايدى!

«قازاقستاندىق ۇلت» دەگەن ءسوزدىڭ ءوزى ءبىزدىڭ كونستيتۋسياعا قايشى. ۋنيتارلىق مەملەكەتتە ءبىر عانا ۇلت بولادى. ءبىر مىسال ايتايىن: ەگەر مەن شەشەن بولسام، قازاقستانعا قاڭعىرىپ كەلگەن شەشەن بولامىن. مەن ازۋلىلىعىمنان، مىقتىلىعىمنان اقتاۋدىڭ پورتىن تارتىپ الامىن. كەز كەلگەن شەنەۋنىكتىڭ بالاسىن ۇرلاپ اكەتەمىن دەپ قورقىتىپ، تەندەردى تارتىپ الامىن. بۇعان ەشقانداي قازاق قارسى كەلمەيدى.

قارسى ءسوز سويلەيتىن قازاقتىڭ باسى باياعىدا قىرقىلعان. تالعات اتابايەۆ، سارى الماس، قارا الماس سەكىلدى مىقتى جىگىتتەردىڭ ءبارى ولگەن. بۇل جەردە ىلعي قۇلدىڭ تۇقىمى قالعان. ۇيىنە كىرىپ الىپ باۋىزداپ جاتساڭ، ارا تۇسەتىن ەشكىم جوق! ءبىزدىڭ رۋحىمىز ءوشتى! ءبىز ۇلت رەتىندە قۇرىدىق!

نەلىكتەن قۇرىدىق؟ سەبەبى، ءبىز يمانسىزدىققا بەت الىپ بارامىز. نەلىكتەن يمانسىزدىققا بەت الدىق؟ ماحامبەتتىڭ: «مۇسىلمانشىلىق كىمدە جوق، تىلدە بار دا، بىلدە جوق»، دەگەن ءسوزى قايدا؟ پارلامەنتتەگىلەرگە دە قۇلدىق سانا دەندەپ سىڭگەن.

قۇلدىق سانا نەلىكتەن سىڭگەن؟ ويتكەنى ولار ءبىر كۇنگى تويعانىن ويلايدى، ءبىر كۇنگى جاننىڭ جىلىنعانىن ويلايدى».

«تاسجارعان»، №3، 21 قاڭتار، 2009 جىل.

Facebook`تەگى جاۋجۇرەك ەسىمدى قولدانۋشىنىڭ پاراقشاسىنان.