ەلشىنىڭ وسى ءسوزى 2003 جىلدىڭ جازىندا ماسكەۋدەگى برەجنيەۆتىڭ بۇرىنعى ساياجايىندا ءوزىم كۋا بولعان ءبىر وتىرىستى ەسىمە ءتۇسىردى.
ناقتىراق ايتسام، سول كەزدەگى ءماجىلىس ءتوراعاسى جارماحان تۇياقباي باستاعان دەپۋتاتتار پارلامەنت پەن دۋما دوستاستىعى اياسىندا ءۇش كۇندىك ىس-ساپارمەن ماسكەۋگە بارىپ، ساپار سوڭىندا دۋما ءتوراعاسى گ.سەلەزنيەۆتىڭ قالا شەتىندەگى مەملەكەتتىك ساياجايىندا كەشكىلىك قوناقاسى بەرىلگەن ەدى.
سوۆەت كوسەمى لەنيننىڭ جەكە اسپازىنىڭ نەمەرەسى داياشىلىق قىزمەت جاساعان داستارحاندا ورىس اراعى مولىنان قۇيىلىپ، «پارلامەنت» تەمەكىسى توقتاۋسىز شەگىلدى (دۋما دەپۋتاتتارى «پارلامەنت» تارتاتىندارىنا ماقتانىپ وتىردى). البەتتە، بولشيەۆيكتەردەن، كوممۋنيستەردەن قالعان ادەت – توست جارىسا ايتىلدى. «سوۆەت وداعىن قۇلاتپاۋعا بارىن سالعان ن.نازاربايەۆ ءۇشىن ءبارىمىز تۇبىنە دەيىن الىپ قويالىق» دەدى ورىس دەپۋتاتتارى. «رەسەيدى العا سۇيرەگەن اسا ءقادىرلى ۆ.پۋتين ءۇشىن» دەدى قازاق دەپۋتاتتارى. وڭاشا وتىرىس تەز قىزدى.
قۇلاپ قالعان سوۆەت وداعىن ساعىنىشپەن ەسكە الىستى، سوسىن ورىستار جاعى «سۇڭعىلا پرەزيدەنتتەرىڭ امان بولسا، كوپ كەشىكپەي قازاقستان بۇرىنعىداي رەسەيگە قارايدى. ءبىز ءارقاشان بىرگەمىز!» دەگەنگە دەيىن بارىستى.
كەيبىر قازاق دەپۋتاتتارى بۇل توستقا كوتەرىپ تە، ءتۇبىن قالدىرماي ءىشىپ تە ۇلگەردى. ارالارىندا ورنىنان ورە تۇرەگەلگەن امانگەلدى ايتالى عانا بولدى.
ءوزىن استراحاننىڭ تۋماسى رەتىندە تانىستىرعان «ورالمان» دەپۋتات رەسەيلىك ارىپتەستەرىنە قازاقستان تاۋەلسىز مەملەكەت ەكەنىن، ەندى بوداندىققا ەشقاشان تۇسپەيتىنىن ءتۇسىندىرىپ شىققانداي بولدى.
ونىڭ بۇل سوزىنە ستاكان كوتەرگەن، سوڭىنا دەيىن الىپ قويعان ەشكىم بولمادى. سوندا «تۋىسى جاقىن جاقىن ەمەس، قونىسى جاقىن – جاقىن» دەگەنىڭ بوس ءسوز بولعانى ما دەدىم ىشىمنەن. قاتەلەسپەگەن سياقتىمىن.
P.S. ج.تۇياقباي باستاعان دەپۋتاتتاردىڭ ءۇش كۇندىك ساپارى ءبىتىپ، ۇشاققا جايعاستىق. نەگىزى، رەسمي جيىندار مەن كەزدەسۋلەردە باستان-اياق ارى كەتسە ون شاقتى دەپۋتات عانا قاتىسىپ جۇرگەن ەدى. ءبىراق قايتار جولداعى ارناۋلى ۇشاق دەپۋتاتتارعا لىق تولدى.
ولار ۇشاق استاناعا جەتكەنشە ماسكەۋدەگى ايەلدەرى، بالا-شاعالارى، باۋىرلارى، تۋعان-تۋىستارى تۋرالى اڭگىمەلەرىن ايتىپ تاۋىسا المادى. رەسەي مەن قازاقستان قاتىناسىنا قاتىستى ايتىلاتىن «تۋىسى جاقىن جاقىن ەمەس، قونىسى جاقىن – جاقىن» دەگەن ماقالدى ءبىر تۇسىنسە، استانا مەن ماسكەۋ اراسىندا سابىلىپ جۇرەتىن وسى دەپۋتاتتار جاقسى تۇسىنەدى-اۋ.
رۋسلان ەربوتا
"جاس الاش" گازەتىندە جاريالانعان ماقالادان ءۇزىندى
