Elshiniń osy sózi 2003 jyldyń jazynda Máskeýdegi Brejnevtiń burynǵy saiajaiynda ózim kýá bolǵan bir otyrysty esime túsirdi.
Naqtyraq aitsam, sol kezdegi Májilis tóraǵasy Jarmahan Tuiaqbai bastaǵan depýtattar Parlament pen Dýma dostastyǵy aiasynda úsh kúndik is-saparmen Máskeýge baryp, sapar sońynda dýma tóraǵasy G.Seleznevtiń qala shetindegi memlekettik saiajaiynda keshkilik qonaqasy berilgen edi.
Sovet kósemi Leninniń jeke aspazynyń nemeresi daiashylyq qyzmet jasaǵan dastarhanda orys araǵy molynan quiylyp, «Parlament» temekisi toqtaýsyz shegildi (dýma depýtattary «Parlament» tartatyndaryna maqtanyp otyrdy). Álbette, bolshevikterden, kommýnisterden qalǵan ádet – tost jarysa aityldy. «Sovet Odaǵyn qulatpaýǵa baryn salǵan N.Nazarbaev úshin bárimiz túbine deiin alyp qoialyq» dedi orys depýtattary. «Reseidi alǵa súiregen asa qadirli V.Pýtin úshin» dedi qazaq depýtattary. Ońasha otyrys tez qyzdy.
Qulap qalǵan Sovet Odaǵyn saǵynyshpen eske alysty, sosyn orystar jaǵy «suńǵyla prezidentteriń aman bolsa, kóp keshikpei Qazaqstan burynǵydai Reseige qaraidy. Biz árqashan birgemiz!» degenge deiin barysty.
Keibir qazaq depýtattary bul tostqa kóterip te, túbin qaldyrmai iship te úlgerdi. Aralarynda ornynan óre túregelgen Amangeldi Aitaly ǵana boldy.
Ózin Astrahannyń týmasy retinde tanystyrǵan «oralman» depýtat reseilik áriptesterine Qazaqstan táýelsiz memleket ekenin, endi bodandyqqa eshqashan túspeitinin túsindirip shyqqandai boldy.
Onyń bul sózine stakan kótergen, sońyna deiin alyp qoiǵan eshkim bolmady. Sonda «Týysy jaqyn jaqyn emes, qonysy jaqyn – jaqyn» degeniń bos sóz bolǵany ma dedim ishimnen. Qatelespegen siiaqtymyn.
P.S. J.Tuiaqbai bastaǵan depýtattardyń úsh kúndik sapary bitip, ushaqqa jaiǵastyq. Negizi, resmi jiyndar men kezdesýlerde bastan-aiaq ary ketse on shaqty depýtat ǵana qatysyp júrgen edi. Biraq qaitar joldaǵy arnaýly ushaq depýtattarǵa lyq toldy.
Olar ushaq Astanaǵa jetkenshe Máskeýdegi áielderi, bala-shaǵalary, baýyrlary, týǵan-týystary týraly áńgimelerin aityp taýysa almady. Resei men Qazaqstan qatynasyna qatysty aitylatyn «Týysy jaqyn jaqyn emes, qonysy jaqyn – jaqyn» degen maqaldy bir túsinse, Astana men Máskeý arasynda sabylyp júretin osy depýtattar jaqsy túsinedi-aý.
Rýslan ERBOTA
"Jas Alash" gazetinde jariialanǵan maqaladan úzindi
