پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ بايبازاروۆ باكۋدە وتكەن بۇۇ-نىڭ كليماتتىڭ وزگەرۋى جونىندەگى – COP29 كونفەرەنسياسىنا قاتىستى، دەپ حابارلايدى Dalanews.kz.
نۇرلان بايبازاروۆ "يدب-عا قاتىسۋشى ەلدەردە كليماتتىق وزگەرىستەرگە ءتوزىمدى سۋ ينۆەستيسيالارىن قارجىلاندىرۋدى اشۋ" اتتى جوعارى دەڭگەيلى سەسسيادا سويلەگەن سوزىندە سۋ سالاسىنىڭ وزەكتى ماسەلەلەرىنە توقتالىپ ءوتتى. سونداي-اق قازاقستاننىڭ تاجىريبەسىمەن ءبولىسىپ، قازىرگى سىن-قاتەرلەردى شەشۋ جونىندەگى جوسپارلار مەن سۋ رەسۋرستارىن تۇراقتى باسقارۋدىڭ ستراتەگيالىق ينۆەستيسيالارى تۋرالى ايتتى.
"ەلىمىزدىڭ سۋ سالاسىن رەفورمالاۋ جانە ترانسفورماسيالاۋ ءۇشىن جاڭا ۆەدومستۆو ياعني، سۋ رەسۋرستارى جانە يرريگاسيا مينيسترلىگى قۇرىلدى. جاڭا سۋ كودەكسى ازىرلەنىپ، سۋ رەسۋرستارىن باسقارۋ جۇيەسىن دامىتۋ تۇجىرىمداماسى مەن سۋ سالاسىن دامىتۋدىڭ كەشەندى جوسپارى بەكىتىلدى"، دەپ حابارلادى ءىس-شاراعا قاتىسۋشىلارعا ۆيسە-پرەمەر.
ونىڭ ايتۋىنشا، ورتا مەرزىمدى كەزەڭدە قازاقستان 20 جاڭا سۋ قويماسىن سالۋ ءارى كەمىندە 15 جۇمىس ىستەپ تۇرعان سۋ قويماسىن رەكونسترۋكسيالاۋ، سونداي-اق 3500 شاقىرىم كانالدى جوندەۋ مەن سيفرلاندىرۋ مىندەتىن قويدى.
قازاقستان ۇكىمەتى ەلىمىزدىڭ بارلىق وڭىرلەرىندە، ونىڭ ىشىندە حالىقارالىق قارجى ۇيىمدارى مەن قارجى ينستيتۋتتارىن تارتا وتىرىپ، سۋ ينفراقۇرىلىمىن سالۋ مەن جاڭعىرتۋ بويىنشا بەلسەندى جۇمىس جۇرگىزە باستادى.
سونىمەن قاتار، بايبازاروۆ يسلام دامۋ بانكى (يدب) قازاقستاننىڭ سۋ شارۋاشىلىعى سالاسىنا 1،1 ملرد دوللار ينۆەستيسيا قۇياتىنىن اتاپ ءوتتى. ءبىرىنشى كەزەڭدە يدب بولەتىن قاراجاتتى 8 سۋ قويماسىن سالۋ مەن رەكونسترۋكسيالاۋعا ءارى 115 كانالدى كۇردەلى جوندەۋگە باعىتتاۋ جوسپارلانۋدا.
ايتا كەتسەك، بۇعان دەيىن يسلام دامۋ بانكى قازاقستاننىڭ سۋ سالاسىنا 1،15 ملرد ينۆەستيسيا سالاتىنىن، ودان بولەك اتالعان باعىتقا شەتەلدىك بانك 3،5 ملن دوللار وتەۋسىز گرانت بولەتىنىن جازعان بولاتىنبىز.
