قازاقستان الەم بويىنشا جانارماي باعاسى ارزان ەلدەر رەيتيڭىندە 11-ورىندا تۇر. تىزىمدە 169 ەل بار. ال ورتالىق ازيادا — ەكىنشى ورىندا. ەسەپتى GlobalPetrolPrices جاساعان. بۇل رەسۋرس 150-دەن استام ەلدەگى موتور وتىنى، ەلەكتر ەنەرگياسى جانە تابيعي گازدىڭ بولشەك ساۋدا باعاسىن باقىلاپ وتىرادى. 

جانارمايدىڭ قازاقستانداعى ورتاشا باعاسى ليترىنە 0،51 دوللار شاماسىندا. ال الەم بويىنشا ورتاشا قۇنى 1،32 دوللار ەكەن. دەگەنمەن الەم ەلدەرى اراسىنداعى باعا ايىرماشىلىعى اجەپتاۋىر ەكەنىن اتاپ ءوتۋ كەرەك. مىسالى ەڭ ارزان جانارماي يراندا. ول جاقتا ءليترى — 0،029 دوللار. ال ەڭ قىمباتى — گونكونگتا (3،2 دوللار).

«نەگىزى باقۋاتتى ەلدەردە، ادەتتە، باعا قىمباتتاۋ بولادى. ال ەندى جاعدايى ناشارلاۋ نە مۇناي شىعارىپ، وندىرەتىن ەلدەردە ارزانداۋ. ءبىراق اقش-تىڭ جاعدايى باسقاشا: مۇندا ەكونوميكا وتە دامىتاعان، ءبىراق سوعان قاراماستان جانارماي قىمبات ەمەس. ەلدەر اراسىنداعى باعا ايىرماشىلىعى ءتۇرلى سالىق پەن سۋبسيديالارعا بايلانىستى» دەلىنگەن ونلاين-پورتالدىڭ جاساعان قورىتىندىسىندا.

پورتال جاساعان كەستەدە ەكى ءتۇرلى باعا بار. كەي ەلدەردە باعا وزگەرىسى اپتا سايىن جاڭارتىلىپ وتىرادى (جۇلدىزشا قويىلعان). ال كەيبىرى اي سايىن جاڭارادى. سەبەبى جانارماي نارىعى رەتتەلىپ، ۇنەمى وزگەرىپ وتىرادى. بۇل كەستەدە قازاقستانعا جۇلدىزشا قويىلماعان.