2025 جىلدىڭ العاشقى 10 ايىندا قازاقستان بويىنشا ينۆەستيسيا كولەمى +13،1% وسكەنىمەن، كەيبىر وڭىرلەر ناقتى «ينۆەستيسيالىق سەرپىلىس» كورسەتىپ وتىر، دەپ حابارلايدى Dalanews.kz Jai sandar تەلەگرام ارناسىنا سىلتەمە جاساپ. 

اقمولا (+55،4%) جانە پاۆلودار (+50،3%) وبلىستارى – ەڭ بەلسەندى ايماقتار. مۇندا ونەركاسىپ، ينفراقۇرىلىم جانە ءىرى قۇرىلىس جوبالارى قاتار جۇرۋدە. جامبىل (+38،3%)، استانا (+31،4%) جانە اقتوبە (+29،1%) دا جوعارى ءوسىم كورسەتكەن وڭىرلەر قاتارىنا كىردى. تۇركىستان وبلىسىنىڭ كورسەتكىشى دە ايتارلىقتاي (+24،2%). بۇل وسىمدەر نەگىزىنەن تومەن بازا، وتكەن جىلعى باياۋ قارقىن جانە بيىلعى جىلى بيۋدجەتتىك قارجىلاندىرۋ مەن ينفراقۇرىلىمدىق جوبالاردىڭ بەلسەندى ىسكە اسۋىمەن تۇسىندىرىلەدى.

جەتىسۋ، الماتى قالاسى، الماتى وبلىسى، قىزىلوردا جانە شىعىس قازاقستان وبلىسى ءوسىم بويىنشا 14–17% ارالىعىندا. بۇل ايماقتاردا ءىرى مەگاجوبالار از بولسا دا، جول، ينجەنەرلىك جەلىلەر، تۇرعىن ءۇي جانە لوگيستيكا سالاسىنداعى تۇراقتى ينۆەستيسيالار جالعاسىپ جاتىر.

ءوسىمى باياۋ وڭىرلەرگە ماڭعىستاۋ، سولتۇستىك قازاقستان، قوستاناي، شىمكەنت، قاراعاندى، ۇلىتاۋ جانە باتىس قازاقستان وبلىستارى جاتادى. مۇندا ءوسىم 3–8% شاماسىندا، ياعني ينۆەستيسيا نەگىزىنەن ينەرسيالىق سيپاتتا، جاڭا ءىرى جوبالار بايقالمايدى. اۋتسايدەرلەر قاتارىندا اباي (−0،9%) جانە اتىراۋ وبلىسى (-29،7%) بار. اسىرەسە اتىراۋدا مۇناي-گاز سالاسىنداعى جوبالاردىڭ اياقتالۋى جالپى ينۆەستيسيالىق بەلسەندىلىكتى ايتارلىقتاي تومەندەتكەن. جالپى، ينۆەستيسيانىڭ باعىتى بىرتىندەپ شيكىزاتتىق وڭىرلەردەن ونەركاسىپتىك جانە ينفراقۇرىلىمدىق ورتالىقتارعا قاراي وزگەرىپ كەلەدى.

Tradereport.kz ساراپشىلارىنىڭ پىكىرىنشە، ينۆەستيسيا ءوسىمى ءاردايىم اكىمدەردىڭ جەكە ارەكەتىنە تىكەلەي بايلانىپ وتىرعان جوق. ويتكەنى وڭىردەگى ەڭ ءىرى جوبالاردى كوبىنە سول جەردە بۇرىننان جۇمىس ىستەيتىن ترانسۇلتتىق كومپانيالار جۇزەگە اسىرادى، ال ولاردىڭ شەشىمدەرى جەرگىلىكتى اكىمدىكپەن ەمەس، ۇكىمەت دەڭگەيىندە، ۇلتتىق كومپانيالارمەن جانە حالىقارالىق شتاب-پاتەرلەرمەن كەلىسىلىپ قابىلدانادى.