بۇگىن تۇركىستان قالاسىنداعى «كونگرەسس حولل» كوپسالالى كەشەنىندە «AMANAT» پارتياسى تۇركىستان وبلىستىق فيليالىنىڭ باستاماسىمەن «قارىزسىز قوعام» ۇلتتىق جوباسىنىڭ ورىندالۋى ماسەلەسى قارالعان جۇمىس جيىنى بولىپ ءوتتى. پارتيا فيليالىنىڭ ءتوراعاسى، تۇركىستان وبلىستىق ءماسليحاتىنداعى پارتيالىق فراكسيانىڭ جەتەكشىسى التىنسارى ۇمبەتالييەۆتىڭ مودەراتورلىعىمەن وتكەن ماجىلىسكە تۇركىستان وبلىسى اكىمىنىڭ ورىنباسارى بەيسەنباي تاجىبايەۆ، تۇركىستان وبلىسىنىڭ قارجى جانە مەملەكەتتىك اكتيۆتەر، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارىنىڭ باسشىلىعى، ۇلتتىق جوبانى وبلىسىمىزدا جۇزەگە اسىرۋعا جاۋاپتى قارجى ساراپشىسى، اۋدان قالا اكىمدەرىنىڭ وسى سالاعا جاۋاپتى ورىنباسارلارى، بانك وكىلدەرى، ءتيىستى مەكەمە باسشىلارى، پارتيا فيليالىنىڭ جاۋاپتى قىزمەتكەرلەرى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
«قارىزسىز قوعام» جوباسى اياسىندا 2024 جىلعا 10 500 ازاماتتى وقىتۋ جوسپارلانسا، بۇگىنگى تاڭعا جوسپار – 107،5 پايىزعا ورىندالىپ، ناقتى 11 293 ازامات وتباسىلىق تابىستى جوسپارلاۋدىڭ ادىستەرىن مەڭگەردى. وتكەن جىلى پارتيا فيليالىنىڭ كۇش سالۋىمەن 14 600 ادام وسى كۋرستاردا ءبىلىم الىپ، قارجىلىق ساۋاتتىلىعىن كوتەرگەن بولاتىن»، دەدى پارتيانىڭ وڭىرلىك فيليالىنىڭ ءتوراعاسى التىنسارى ۇمبەتالييەۆ.
كۇن تارتىبىندە قارالعان ماسەلە بويىنشا تۇركىستان وبلىسىنىڭ قارجى جانە مەملەكەتتىك اكتيۆتەر باسقارماسى باسشىسىنىڭ ورىنباسارى ناعيما نۇرمانوۆانىڭ حابارلاماسى تىڭدالدى. باسقارما باسشىسىنىڭ ورىنباسارى «قارىزسىز قوعام» جوباسىنىڭ اياسىن كەڭەيتۋدە 2024-2026 جىلدارعا ارنالعان جول كارتاسى ازىرلەنگەنىن حابارلاپ، بەلگىلەنگەن مىندەتتەردى ىسكە اسىرۋدا 31 ادامنان تۇراتىن وڭىرلىك جوبالاۋ كومانداسى قۇرىلعانىن جاريا ەتتى.
جوبالاۋ كەڭسەسى تۇرعىنداردى قارجىلىق ساۋاتتىلىققا وقىتۋ پروسەسىن ۇيىمداستىرۋ، ازاماتتاردى جوبا تۋرالى ماعلۇماتتارمەن قامتۋ، قارىز الۋشىلارعا نەسيە قارىزدارىن وتەۋ بويىنشا كەڭەس بەرۋ، سونداي-اق مەملەكەتتىك باعدارلامالار، ونىڭ ىشىندە «اۋىل اماناتى» باعدارلاماسىنىڭ شەڭبەرىندە ءوز ءىسىن باستايمىن دەگەندەرگە ۇيىمداستىرۋشىلىق جۇمىستارعا قولداۋ كورسەتۋ، تاعى دا باسقا مىندەتتەردى اتقاراتىنى ايتىلدى.
بيىلعى جىلدىڭ 5 اقپانىنان باستاپ وڭىرىمىزدە حالىقتى قارجىلىق ساۋاتتىلىققا جاپپاي وقىتۋ جوباسى ىسكە اسىرىلۋدا. جوبا باستالعالى بەرى تۇرعىنداردىڭ 27 لەگى وقۋدان ءوتتى. ازاماتتاردى قارجىلىق ساۋاتتىلىق كۋرسىمەن قامتۋ كورسەتكىشى بويىنشا وڭىرلەر اراسىندا تۇركىستان وبلىسى ءبىرىنشى كورسەتكىشكە يە بولىپ وتىر. بۇل جەرگىلىكتى اتقارۋشى ورگان تاراپىنان ءتيىستى دەڭگەيدە جۇرگىزىلگەن جۇمىستاردىڭ ناتيجەسى.
جيىندا قارالعان ماسەلەنىڭ شەڭبەرىندە، بەرەشەكتى رەتتەۋدەن وتكەن ازاماتتاردى جۇمىسقا ورنالاستىرۋدىڭ ناتيجەلەرى تۋرالى تۇركىستان وبلىسنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى تۇرار قۇدايبەرگەنوۆ ايتىپ ءوتتى. بۇل باعىتتا سالالىق باسقارماعا 180 ازاماتتىڭ ءتىزىمى ۇسىنىلىپ، ولاردى جۇمىسقا ورنالاستىرۋدا اتقارىلان شارالاردىڭ ناتيجەلەرى باياندالدى. بۇگىنگى كۇنگە دەيىن اتالعان تىزىمدە كورسەتىلگەن تۇرعىندار كونتينگەنتىنىڭ ىشىندە 32 ازامات جۇمىسپەن قامتۋ شارالارىنا تارتىلعان بولسا، 41 ازامات ۇسىنىلعان جۇمىس ورىندارىنان باس تارتقانى ايتىلدى. سونىمەن قاتار 64 ازامات ءوزىن-وزى جۇمىسپەن قامتىعاندار ساناتىنا ەنگەنى تۋرالى اقپارات بەرىلدى.
ءماجىلىس بارىسىندا اۋدان، قالالاردا قارجىلىق ساۋاتتىلىق كۋرستارىن ۇيىمداستىرۋدىڭ پروبلەمالىق ماسەلەلەرى تالقىلانىپ، قوعامعا پايدالى بۇل باستامانى ىلگەرىلەتۋدە كەشەندى اقپاراتتىق جۇمىستار جۇرگىزۋدىڭ تيىمدىلىگى ءسوز بولدى. اۋدان، قالا اكىمدىكتەرى كۋرس جۇمىستارىن ۇيىمداستىرىپ قانا قويماي، قاجەتتى ءبىلىم العان العان ازاماتتاردىڭ جۇمىسپەن قامتىلۋىن ۇيلەستىرۋى كەرەك ەكەنى ايتىلدى. «قارىزسىز قوعام» ۇلتتىق جوباسى شەڭبەرىندە وقۋ كۋرستارىنىڭ ۇيىمداستىرىلۋى، ولاردى اياقتاعان تىڭداۋشىلاردىڭ جۇمىسپەن قامتىلۋى بويىنشا ناقتىلى اقپارات بەرۋدى كەشەۋىلدەتەتىن قازىعۇرت، كەلەس، شاردارا، جەتىساي اۋداندارى مەن كەنتاۋ قالاسى وكىلدەرىنىڭ وسى مىندەتتەر بويىنشا اتقارىپ جاتقان جۇمىستارىنىڭ ەسەپتەرى تىڭدالدى.
جيىنعا قاتىسىپ، وبلىس تۇرعىندارى ءۇشىن وزەكتى بولىپ تابىلاتىن جوبانىڭ تيىمدىلىگى جونىندە تۇركىستان وبلىسى اكىمىنىڭ ورىنباسارى بەيسەنباي تاجىبايەۆ پىكىر ءبىلدىرىپ، مەملەكەتتىڭ الەۋمەتتىك كومەگى شىن مانىندە مۇقتاج ازاماتتار مەن وتباسىلارعا بەرىلۋى كەرەكتىگىن ايتتى. بۇل باعىتتا اۋدان، قالا اكىمدىكتەرى وتباسىلاردىڭ الەۋمەتتىك كارتاسىنىڭ شىنايى تۇزىلۋىنە جاعداي جاساۋى كەرەكتىگىنە نازار اۋدارىپ، تۇرعىنداردىڭ قارجىلىق ساۋاتتىلىعىن كوتەرۋ جوسپارىنىڭ ورىندالۋىندا ناتيجەلى جۇمىستار جۇرگىزۋى قاجەت ەكەنىن ەسكەرتتى.
