Búgin Túrkistan qalasyndaǵy «Kongres hol» kópsalaly kesheninde «AMANAT» partıasy Túrkistan oblystyq fılıalynyń bastamasymen «Qaryzsyz qoǵam» ulttyq jobasynyń oryndalýy máselesi qaralǵan jumys jıyny bolyp ótti. Partıa fılıalynyń tóraǵasy, Túrkistan oblystyq máslıhatyndaǵy partıalyq fraksıanyń jetekshisi Altynsary Úmbetálıevtiń moderatorlyǵymen ótken májiliske Túrkistan oblysy ákiminiń orynbasary Beısenbaı Tájibaev, Túrkistan oblysynyń qarjy jáne memlekettik aktıvter, jumyspen qamtýdy úılestirý jáne áleýmettik baǵdarlamalar basqarmalarynyń basshylyǵy, ulttyq jobany oblysymyzda júzege asyrýǵa jaýapty qarjy sarapshysy, aýdan qala ákimderiniń osy salaǵa jaýapty orynbasarlary, bank ókilderi, tıisti mekeme basshylary, partıa fılıalynyń jaýapty qyzmetkerleri qatysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
«Qaryzsyz qoǵam» jobasy aıasynda 2024 jylǵa 10 500 azamatty oqytý josparlansa, búgingi tańǵa jospar – 107,5 paıyzǵa oryndalyp, naqty 11 293 azamat otbasylyq tabysty josparlaýdyń ádisterin meńgerdi. Ótken jyly partıa fılıalynyń kúsh salýymen 14 600 adam osy kýrstarda bilim alyp, qarjylyq saýattylyǵyn kótergen bolatyn», dedi partıanyń óńirlik fılıalynyń tóraǵasy Altynsary Úmbetálıev.
Kún tártibinde qaralǵan másele boıynsha Túrkistan oblysynyń qarjy jáne memlekettik aktıvter basqarmasy basshysynyń orynbasary Naǵıma Nurmanovanyń habarlamasy tyńdaldy. Basqarma basshysynyń orynbasary «Qaryzsyz qoǵam» jobasynyń aıasyn keńeıtýde 2024-2026 jyldarǵa arnalǵan jol kartasy ázirlengenin habarlap, belgilengen mindetterdi iske asyrýda 31 adamnan turatyn óńirlik jobalaý komandasy qurylǵanyn jarıa etti.
Jobalaý keńsesi turǵyndardy qarjylyq saýattylyqqa oqytý prosesin uıymdastyrý, azamattardy joba týraly maǵlumattarmen qamtý, qaryz alýshylarǵa nesıe qaryzdaryn óteý boıynsha keńes berý, sondaı-aq memlekettik baǵdarlamalar, onyń ishinde «Aýyl amanaty» baǵdarlamasynyń sheńberinde óz isin bastaımyn degenderge uıymdastyrýshylyq jumystarǵa qoldaý kórsetý, taǵy da basqa mindetterdi atqaratyny aıtyldy.
Bıylǵy jyldyń 5 aqpanynan bastap óńirimizde halyqty qarjylyq saýattylyqqa jappaı oqytý jobasy iske asyrylýda. Joba bastalǵaly beri turǵyndardyń 27 legi oqýdan ótti. Azamattardy qarjylyq saýattylyq kýrsymen qamtý kórsetkishi boıynsha óńirler arasynda Túrkistan oblysy birinshi kórsetkishke ıe bolyp otyr. Bul jergilikti atqarýshy organ tarapynan tıisti deńgeıde júrgizilgen jumystardyń nátıjesi.
Jıynda qaralǵan máseleniń sheńberinde, bereshekti retteýden ótken azamattardy jumysqa ornalastyrýdyń nátıjeleri týraly Túrkistan oblysnyń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Turar Qudaıbergenov aıtyp ótti. Bul baǵytta salalyq basqarmaǵa 180 azamattyń tizimi usynylyp, olardy jumysqa ornalastyrýda atqarylan sharalardyń nátıjeleri baıandaldy. Búgingi kúnge deıin atalǵan tizimde kórsetilgen turǵyndar kontıngentiniń ishinde 32 azamat jumyspen qamtý sharalaryna tartylǵan bolsa, 41 azamat usynylǵan jumys oryndarynan bas tartqany aıtyldy. Sonymen qatar 64 azamat ózin-ózi jumyspen qamtyǵandar sanatyna engeni týraly aqparat berildi.
Májilis barysynda aýdan, qalalarda qarjylyq saýattylyq kýrstaryn uıymdastyrýdyń problemalyq máseleleri talqylanyp, qoǵamǵa paıdaly bul bastamany ilgeriletýde keshendi aqparattyq jumystar júrgizýdiń tıimdiligi sóz boldy. Aýdan, qala ákimdikteri kýrs jumystaryn uıymdastyryp qana qoımaı, qajetti bilim alǵan alǵan azamattardyń jumyspen qamtylýyn úılestirýi kerek ekeni aıtyldy. «Qaryzsyz qoǵam» ulttyq jobasy sheńberinde oqý kýrstarynyń uıymdastyrylýy, olardy aıaqtaǵan tyńdaýshylardyń jumyspen qamtylýy boıynsha naqtyly aqparat berýdi kesheýildetetin Qazyǵurt, Keles, Shardara, Jetisaı aýdandary men Kentaý qalasy ókilderiniń osy mindetter boıynsha atqaryp jatqan jumystarynyń esepteri tyńdaldy.
Jıynǵa qatysyp, oblys turǵyndary úshin ózekti bolyp tabylatyn jobanyń tıimdiligi jóninde Túrkistan oblysy ákiminiń orynbasary Beısenbaı Tájibaev pikir bildirip, memlekettiń áleýmettik kómegi shyn máninde muqtaj azamattar men otbasylarǵa berilýi kerektigin aıtty. Bul baǵytta aýdan, qala ákimdikteri otbasylardyń áleýmettik kartasynyń shynaıy túzilýine jaǵdaı jasaýy kerektigine nazar aýdaryp, turǵyndardyń qarjylyq saýattylyǵyn kóterý josparynyń oryndalýynda nátıjeli jumystar júrgizýi qajet ekenin eskertti.
