ەندىگى ايتپاعىم مىناۋ، ءوزىم جۇڭگو ەلىندە ءتۋىپ-وستىم. ەسەيە كەلە جۇڭگو مەكتەپتەرىندە وقىپ، حانزۋلارمەن ارالاس-قۇرالاس تا بولىپ، ولاردىڭ قانداي ۇلت ەكەنىنە قانىعا باستادىق.
بۇلاردىڭ ۇلتتىق ۇستانىمى مۇلدە باسقاشا. وتباسىلىق تاربيەسىنىڭ وزىندە ەشقاشان كۇش قولدانباي، بىرتىندەپ باسىپ الۋ ساياساتىن ۇيرەتەدى. ءبىزدىڭ اۋىل تاۋ جاستانعان، شاعىن ەگىستىك جەرى بار شالعاي قىستاق بولاتىن. بالا كۇنىمىزدە ءيىناعاش كوتەرىپ، كيىم-كەشەك ساتىپ جۇرگەن قىتايلاردى كورسەك ءبىر توپ بالا تاس لاقتىرىپ، سوڭىنان قىزىقتاپ ەرىپ الاتىنبىز.
سول قىتايلار بىرتىندەپ اياق كيىم جاماۋشى، اۋىل ادامدارىن فوتوعا ءتۇسىرۋشى، اعاشتان ءۇي جيھازدارىن جاساۋشى، جالدانىپ ءۇي سالىپ، ەگىن ەگۋشى بولىپ، كادىمگى قۇلدىقتا ءومىر سۇرەتىن.
ءبىر كۇنى مارقۇم اجەم جاۋىندا مالمانداي سۋ بولىپ، ءبىزدىڭ ءۇيدى پانالاعان 3-4 قىتايعا اس-سۋىن بەرىپ، جولعا سالعان سوڭ ەسىك جاقتاعى سولار وتىرعان جەردى وتپەن الاستاپ، سۋسىن ىشكەن ىدىستارىن كۇلمەن ءۇش قايتارا جۋعانى ءالى كوز الدىمدا...
ەندى ءقازىر سول قىتايلار باياعىدا-اق اۋىلدىڭ قوجاسىنا اينالعان. ءىرى ساۋدا دۇكەندەرى، ەگىنشىلىك القاپتارى سولاردىڭ قولىنا وتكەن. كەزىندەگى قۇل، قازىرگى قوجايىن قىتايلارعا اۋىل قازاقتارى جالدانىپ كۇن كورەدى. كوزبەن كورمەسەڭىز سەنبەسسىز، ارينە.
جاقىننان بەرى «قازاق جەرلەرى قىتايلارعا 25 جىلعا جالعا بەرىلەدى» دەگەن سۋىق حاباردى ەستىپ، مەنەن ۇيقى قاشتى. ءتۇرلى ەگىس داقىلدارىن تەز ءوسىرىپ، مول ءونىم الۋ ءۇشىن ولار اسا ۋلى بيوگەندىك-حيميالىق تىڭايتقىشتاردى مولىنان قولدانادى. ءتۇرلى قۇرتتاردى قىرۋ ءۇشىن شاشقان دارىلەرىنەن تىشقاندار قىرىلادى، ونى جەگەن دالا قۇستارى تۇگەلدەي قىرعىنعا ۇشىرايدى. سونىمەن، 3-5 جىل ىشىندە قالىڭ توپىراق قاباتىن قايتىپ جويىلمايتىن اسا قاتەرلى ۋلى دارىلەردىڭ وتانىنا اينالدىرادى.
25 جىلعا عانا جالعا الىپ قويماي، تاعى ۇزارتسا 40-50 جىل ىشىندە سەمەي پوليگونىنان دا ءقاۋىپتى تەلىم-تەلىم جەرلەردى قاپتاعان جيەندەرمەن قوسا قازاققا قايتارىپ بەرىپ، بۇلىنبەي تىڭ تۇرعان تازا جەرلەرگە اۋىز سالادى.
ول كەزدە بۇلاردى ەلدەن قۋالاپ كورىڭىز!
ايتا بەرسەك، دالەل مەن فاكت شاشتان كوپ.
قىسقاسى، جەردى جالعا بەرۋ دەگەنىمىز، ەرتەڭگى ميلليونداعان قازاقتىڭ تامىرىن شاۋىپ، قۇلدىققا ءتۇسىرۋ! قازاق دەيتىن قاسيەتتى ۇلتتىڭ جەر بەتىنەن بىرتىندەپ جويىلۋىنا الىپ كەلۋ! 100 ميلليون ءۇندىستىڭ سۇيەگىنىڭ ۇستىنە تۇرعىزىلعان امەريكا سياقتى ەكىنشى جۇڭگو ەلى بىزدە پايدا بولماۋى ءۇشىن، بايتاق دالانى كەلەشەككە امان قالدىرۋ ءۇشىن باسىمىزدى تىگىپ، قارسى شىعايىق، اعايىندار!
ۇلاربەك دالەي، اقىن
