وسى كۇنى وبلىس باسشىسى قالانى جىلۋمەن جانە ىستىق سۋمەن قامتاماسىز ەتىپ وتىرعان «قاپشاعاي جىلۋ» مەكەمەسىنە باردى. مەكەمە ديرەكتورى سەيداحمەت دادانبەكوۆتىڭ ايتۋىنشا، قازاندىقتىڭ قۋاتى 192 گكال. 2019-2020 جىلعى جىلىتۋ ماۋسىمىندا 800 ملن. تەڭگە ءبولىنىپ، قازاندىق گازعا اۋىستىرىلعان. مۇنداعى 10 قازاندىقتىڭ بارىنە كۇردەلى جوندەۋ جۇرگىزىلگەن. سونىمەن قاتار گازعا قوسىلعاننان كەيىن جىلۋ مەن ىستىق سۋ بەرۋ قىزمەتىنىڭ ءتاريفىن ءوسىرۋ تۋرالى ۇسىنىس ءقازىر ءتيىستى ورگاندا بەرىلگەن، ءقازىر قارالۋدا. وبلىس باسشىسى كورسەتىلگەن قىزمەت تولەمى مەكەمە شىعىنىن جاباتىن دەڭگەيدە بولۋى كەرەكتىگىن ايتتى.
قالاداعى ماڭىزدى نىسانداردىڭ ءبىرى «قاپشاعاي سۋ ارناسى» مكك-نىڭ كارىز تازارتۋ عيماراتىنىڭ جاي-كۇيى دە وبلىس باسشىسىنىڭ نازارىنان تىس قالعان جوق. مۇندا تۇرمىستىق جانە وندىرىستىك سارقىندى سۋلار جيناقتالىپ، تازالانادى. كارىز جۇيەسىنىڭ ۇزىندىعى 171،6 كم قۇرايدى. دەگەنمەن 1963 جىلى سالىنعان تازارتۋ جۇيەسىنىڭ توزىعى جەتىپ-اق تۇر. سوندىقتان مەملەكەتتىك-جەكەمەنشىك ارىپتەستىك نەگىزىندە جاڭا كارىز تازارتۋ عيماراتىنىڭ جوباسى دايىندالعان. وبلىس اكىمى جوبا بويىنشا تاۋلىگىنە 30 مىڭ م3 دەپ قاراستىرىلعان عيماراتتىڭ قۋاتتىلىعىن شامامەن 15 م3 دەپ جوبالاعان ءجون ەكەنىن ايتتى. الداعى ۋاقىتتا قاجەتتىلىك تۋىنداپ جاتسا، ونى كەزەڭ-كەزەڭگە ءبولىپ جالعاستىرۋعا بولادى. سول سياقتى جوبانى قارجىلاندىرۋ كوزدەرىن ءالى دە كەڭىنەن تالقىلاپ، انىقتايىق دەگەن ۇسىنىسىن ءبىلدىردى.
ءدال وسىنداي تاقىرىپ «قاپشاعاي جىلۋ» كاسىپورنىنىڭ زارەچنىي اۋىلىنداعى فيليالىندا جالعاستى. مۇنداعى تەحنولوگيالىق تازارتۋ جەلىلەرى دە ەسكىرگەن. سوندىقتان سول اۋماققا جاڭا شاعىن اۋدان سالىناتىنىن ەسكەرە وتىرىپ، عيماراتتىڭ ىرگەسىن كەڭەيتۋگە، قازاندىقتاردى گازعا اۋىستىرۋعا، ەلەكتر بەرۋ جەلىلەرىن قالپىنا كەلتىرۋگە، سونىمەن بىرگە زارەچنىي اۋىلىنىڭ كوشەلەرىن جوندەۋگە، مادەنيەت ءۇيىن جانە سپورت كەشەنىن سالۋعا قارجى قاجەت. وبلىس باسشىسى قانات بوزىمبايەۆ ايتىلعان ماسەلەلەردىڭ بارلىعىنا قولداۋ كورسەتىلەتىنىن، قۇرىلىس جوبالارىنىڭ قاجەتتى قۇجاتتارىن دايىنداپ باستاۋدى تاپسىردى.
وسى كۇنى وبلىس اكىمى قۇرىلىسقا قاجەتتى ماتەريالدار وندىرەتىن «كناۋف گيپس قاپشاعاي» زاۋىتىندا بولىپ، كاسىپورىن سەحتارىن ارالاپ كوردى. سونداي-اق «وسپانوۆ ديەۆەلوپمەنت» جشس-نىڭ بالىق ونەركاسىبى كەشەنىن سالۋ جوباسىمەن تانىستى. تەڭىز بالىعىن ءوسىرۋدى قولعا الاتىن جوبا ەكى كەزەڭمەن ىسكە اسىرىلماق. ءبىرىنشى كەزەگىندە 1 مىڭ توننا، ەكىنشىدە 10 مىڭ توننا قۋاتتىلىققا شىعادى. ءقازىر قۇرىلىس قارقىندى ءجۇرىپ جاتىر. تارتىلىپ وتىرعان ينۆەستيسيا كولەمى – 67،3 ملرد تەڭگە. ازىرگە كاسىپورىن قۇرىلىسى الاڭىنا ۋاقىتشا ەلەكتر ەنەرگياسى بەرىلىپ وتىر. دەگەنمەن جوبا جەتەكشىلەرى 1ء-شى كەزەگى اياقتالاتىن مامىر ايىنا قاراي ەلەكترمەن تۇراقتى قامتۋ ماسەلەسى تۋىندايتىنىن ايتتى. بۇل ماسەلەنى شەشۋدى قانات الدابەرگەن ۇلى قالا اكىمدىگىنە تاپسىردى. جانە تەڭىز بالىعىن ءوسىرۋدىڭ وتە جاقسى جوبا ەكەنىن تىلگە تيەك ەتىپ، ونىڭ العاشقى جۇمىس ناتيجەسىن كورۋگە الداعى مامىر ايىندا كەلەتىنىن ايتتى.
سول سياقتى وسى كۇنى قانات بوزىمبايەۆ قاپشاعايداعى ويىن-ساۋىق-ساۋىقتىرۋ كەشەنى قۇرىلىسىنىڭ بارىسىمەن دە تانىستى. «پسك بيلدينگ» ج ش س قۇرىلىسىن جۇرگىزىپ جاتقان كەشەن تۋريزم سالاسىنىڭ ىرگەلى نىسانى بولماق. مۇندا كوتتەدج ۇيلەر، باسسەيندەر، مونشا كەشەنى، مەيرامحانا، اۆتوتۇراق، بالالار ويىن الاڭى، سەرۋەندەيتىن الاڭ قاراستىرىلعان. جوبالىق قۇنى 5 ملرد. تەڭگە بولاتىن نىسان 2023 جىلى ىسكە قوسىلادى دەپ جوسپارلانىپ وتىر.
قالا اكتيۆىمەن كەزدەسكەن وبلىس اكىمى قانات بوزىمبايەۆ قاپشاعاي ءوڭىرىنىڭ وزەكتى ماسەلەلەرى رەتىندە قوسقۇدىق اۋىلىنداعى اۋىز سۋ، جارىق، جول پروبلەمالارىن، مەكتەپ پەن مەديسينالىق پۋنكتتىڭ توزىپ كەتكەنىن، جايىلىمدىق جەر جەتىسپەۋشىلىگىن اتاپ كورسەتتى. سول سياقتى شەڭگەلدى ماسسيۆىندەگى 15 مىڭ گەكتار جەردىڭ بۇگىنگى كۇنى بار بولعانى 6 مىڭ گەكتارى عانا پايدالانىلىپ وتىر. سۋارمالى جەلىلەر ابدەن ەسكىرگەن. كارىز جۇيەلەرى دە توزعان. بۇل ماسەلەلەردىڭ بارلىعىن 2 جىل كولەمىندە اتقارىلاتىن ارنايى جوسپارعا ەنگىزىپ، ءتيىستى قۇجاتتارىن دايىنداپ، جۇمىس جۇرگىزىلەتىن بولادى.
– قاپشاعاي – الماتى قالاسىمەن شەكارلاس ورنالاسقان، كولىك لوگيستيكالىق ينفراقۇرىلىمى دامىعان قالا. بۇل ەكونوميكانىڭ وسۋىنە وڭ ىقپال ەتىپ وتىر. دەگەنمەن ءالى دە كوڭىل بولەتىن ماسەلەلەر بار. دەنساۋلىق ساقتاۋ سالاسىندا، سونىڭ ىشىندە ىندەتكە قارسى ۆاكسيناسيا جاساۋمەن جۇيەلى اينالىسۋ كەرەك. حالىقتى جۇمىسپەن قامتۋعا، الەۋمەتتىك ءالجۋاز توپتارعا، كوپ بالالى وتباسىلارعا جاعداي جاساۋعا، تۇرعىنداردى باسپانامەن قامتاماسىز ەتۋگە ەرەكشە نازار اۋدارۋ كەرەك. شاعىن جانە ورتا بيزنەسكە، جاڭا ينۆەستيسيالىق جوابالارعا قولداۋ كورسەتۋ دە باسىمدىق بولۋى ءتيىس. بۇلاردىڭ بارلىعى - پرەزيدەنتتىڭ الدىمىزعا قويعان ماڭىزدى مىندەتتەرى. بۇل باعىتتا ءبىز بىرىگىپ جۇمىس ىستەيتىن بولامىز، – دەدى قانات بوزىمبايەۆ.
