استانادا ششۋچينسكىدەگى ءدامحانادا بولعان جارىلىستان كەيىن قازاقستاندا گاز باللوندارىن ءوز ىشىندە ءوندىرۋ ماسەلەسى كۇن تارتىبىنە شىقتى، دەپ حابارلايدى Dala News.
ۆيسە-پرەمەر قانات بوزىمبايەۆتىڭ ايتۋىنشا، ەلدە قولدانىلىپ جۇرگەن كوپتەگەن گاز باللوندارىنىڭ مەرزىمى الدەقاشان ءوتىپ كەتكەن.
«كوپ جاعدايدا 30–50 جىل پايدالانىلعان باللوندار قولدانىلىپ ءجۇر. ولاردىڭ تەكسەرىسى دە 10–20 جىل بۇرىن وتكەن. بىزدە مۇنداي باللونداردى وندىرەتىن كاسىپورىندار جوق»، – دەدى ول.
وسىعان بايلانىستى ۇكىمەت پرەمەر-مينيستردىڭ تاپسىرماسىمەن ونەركاسىپ جانە قۇرىلىس مينيسترلىگىنە «قازاقستان ينجينيرينگ» كومپانياسىمەن بىرگە ەل ىشىندە سۇيىتىلعان گاز باللوندارىن ءوندىرۋدى جولعا قويۋدى جۇكتەدى.
سونىمەن قاتار، توتەنشە جاعدايلار مينيسترلىگى گاز باللوندارىن پايدالانۋ قاۋىپسىزدىگىن قاتاڭ باقىلاۋعا الادى.
بوزىمبايەۆتىڭ سوزىنشە، ششۋچينسكىدەگى تراگەدياعا قاۋىپسىزدىك تالاپتارىنىڭ ساقتالماۋى جانە مەرزىمى وتكەن باللونداردى پايدالانۋ سەبەپ بولۋى مۇمكىن. قازىرگى ۋاقىتتا قىلمىستىق ءىس قوزعالىپ، جاۋاپتى تۇلعالاردىڭ ارەكەتىنە قۇقىقتىق باعا بەرىلەدى.
