2025 جىلعى قاڭتارداعى قازاقستان بيۋدجەتىنىڭ ورىندالۋىنا كەلەتىن بولساق، رەسپۋبليكالىق بيۋدجەتكە ءتۇسۋى ءتيىس سالىق تۇسىمدەرى جوسپار بويىنشا ورىندالدى، ال جەرگىلىكتى تۇسىمدەر ايتارلىقتاي اسىرا ورىندالعان. ءبىراق، سوعان قاراماستان كورسەتكىشتەر كوڭىل كونشىتپەيدى. الايدا، ەكونوميست عالىمجان ايتقازين بۇل رەتتە قانداي دا ءبىر قورىتىندى جاساۋعا ءالى ەرتە ەكەنىن ايتادى، دەپ جازادى Dalanews.kz.

قازاقستان قارجى مينيسترلىگىنىڭ مالىمەتىنشە، 2025 جىلعى قاڭتاردا نەمەسە 1 اقپاندا رەسپۋبليكالىق جانە جەرگىلىكتى بيۋدجەتتەردى قامتيتىن مەملەكەتتىك بيۋدجەتتىڭ جيىنتىق كىرىستەرى 2 ترلن تەڭگەنى قۇرادى، ونىڭ 1،3 ترلن تەڭگەءسى سالىق تۇسىمدەرى بولىپ تابىلادى. بۇل ارادا جەرگىلىكتى بيۋدجەتتەردىڭ اسىرا ىسكە اسىرۋى ارقاسىندا اتالعان كەزەڭدەگى جوسپار 121،2%-عا ورىندالعانىن باسا ايتا كەتەلىك.

جالپى، ۇلتتىق بانك ۇلتتىق قوردان ۋادە ەتكەن ترانسفەرتتەردىڭ جارتىسىن عانا اۋدارعاندىقتان، بيۋدجەت كىرىسى قىسقاردى. ۇلتتىق قوردان بيۋدجەتكە كەپىلدەندىرىلگەن ترانسفەرت جوسپارلانعانداي 400 ملرد تەڭگەنى قۇراسا، 650 ملرد تەڭگە بولۋى ءتيىس نىسانالى ترانسفەرت 76،9% ازايىپ، 150 ملرد تەڭگە عانا بولدى.

"رەسپۋبليكالىق بيۋجەتكە كەلەتىن بولساق، قاڭتار ايىندا كوپتەن بەرى العاش رەت تۇسىمدەر 100 پايىزدان اسا، ال كورپوراتيۆتىك تابىس سالىعى بويىنشا جوسپار 94،5% – 359،3 ملرد تەڭگەگە، ققس – 95،2%، 292،1 ملرد تەڭگەگە دەيىن، اكسيزدەر – 74،9%، 8،7 ملرد تەڭگەگە دەيىن ورىندالدى. بۇعان اۆانستىق تاجىريبە ارقىلى قول جەتكىزىلگەن جوق دەپ ۇمىتتەنەمىز"، - دەيدى ايتقازين.

1،1 ترلن تەڭگەگە جوسپارلانعان رەسپۋبليكالىق بيۋدجەت قاڭتار ايىندا ۇلتتىق قوردان 550 ملرد تەڭگە ترانسفەرت الدى. بۇدان بولەك، رەسپۋبليكالىق بيۋدجەتكە 348 ملرد تەڭگە زايم اقشا كەلىپ ءتۇستى، ال جوسپار بويىنشا ءبىر جىل بويىندا رەكوردتىق كولەمدە - 8،3 ترلن تەڭگە تارتىلادى دەپ كۇتىلۋدە.

جەرگىلىكتى بيۋدجەتتەر قاڭتاردا دا سالىق الىمدارى بويىنشا جوسپاردى اسىرا ورىنداۋ ءۇردىسىن جالعاستىردى، ماسەلەن كتس جوسپارداعىدان 175%-عا، جتس 184%-عا، ال الەۋمەتتىك سالىق 157%-عا اسىرا جينالدى.

قاڭتار ايىندا مەملەكەتتىك بيۋدجەت تاپشىلىعى 329 ملرد تەڭگە دەڭگەيىندە "پروفيسيت" بولىپ قالىپتاستى، دەگەنمەن مۇناي تۇسىمدەرىنەن تىس تاپشىلىق (-) 269 ملرد تەڭگەنى قۇرادى، ءبىراق ۇلتتىق قوردان جوسپارلانعان ترانسفەرتتەر كەلىپ تۇسكەن كەزدە جانە شىعىس بولىگىنىڭ ۇنەمدى ورىندالۋى كەزىندە الدا بۇل كورسەتكىش ودان دا جوعارى بولۋى مۇمكىن.

"ازىرگە،  "سالىق ناشار جينالدى" دەپ ءبىز دابىل قاعۋعا ەرتە دەپ سانايمىز. ويتكەنى تەڭىز كەن ورنىندا جاڭا جوبانىڭ ىسكە قوسىلعانى قاڭتاردا عانا، وندا الدا ۇلتتىق قورعا تۇسەتىن سالىقتاردىڭ كولەمى ۇلعايىپ، قازاقستان ەكونوميكاسىنا وڭ اسەر ەتەدى دەپ كۇتىلەدى"، دەپ جازادى جەلىدە عالىمجان ايتقازين.

بۇعان دەيىن تۇزەتۋلەر مەن وزگەرىستەر ەنگىزىلگەن سالىق كودەكسىن ءماجىلىس ءوز قاراۋىنا العانى حابارلانعان.