ءبىزدىڭ ەلىمىزدە «قازاقستان رەسپۋبليكاسىنىڭ قاۋىپسىزدىك كەڭەسى تۋرالى» زاڭى نەگىزىندە قۇرىلعان قازاقستان رەسپۋبليكاسىنىڭ قاۋىپسىزدىك كەڭەسى دەگەن ورگان بار. (ءتوراعاسى ءوزىن ءوزى سايلاپ العان ن.نازاربايەۆ)
قاۋىپسىزدىك كەڭەسىنىڭ ەڭ باستى مىندەتى "ەلدىڭ ۇلتتىق قاۋىپسىزدىگىن قامتاماسىز ەتۋ" (2-باپ، 1 تارماق) دەلىنگەن. ول ەلدىڭ ۇلتتىق قاۋىپسىزدىگىنە قاتىستى شارالاردى ۇيلەستىرۋگە، ۇلتتىق قاۋىپسىزدىكتىڭ ىشكى جانە سىرتقى قاتەرلەرىن بولجاۋ، ولاردىڭ الدىن الۋ جانە ولاردى بەيتاراپتاندىرۋ جونىندەگى ۇسىنىستاردى ازىرلەۋگە مىندەتتى. وسى زاڭعا سايكەس قابىلدانعان قاۋىپسىزدىك كەڭەسى تۋرالى ەرەجەدە دە ۇلتتىق قاۋىپسىزدىكتى قامتاماسىز ەتۋدىڭ ماڭىزدىلىعى اتاپ ءوتىلىپ، نەگىزگى مىندەتتەرى قاتارىندا «ۇلتتىق مۇددەلەردى قورعاۋدىڭ نەگىزگى باعىتتارىن ايقىنداۋ، ۇلتتىق قاۋىپسىزدىككە تونەتىن ىشكى جانە سىرتقى قاتەرلەردى انىقتاۋ، تالداۋ، باعالاۋ جانە بولجامداۋ، ەلدىڭ ۇلتتىق قاۋىپسىزدىگىن قامتاماسىز ەتۋدىڭ قۇرالدارى مەن ادىستەرىن تاڭداۋ» سياقتى فۋنكسيالار كورسەتىلگەن.
ال ۇلتتىق قاۋىپسىزدىك جەكە ادامنىڭ، قوعامنىڭ جانە مەملەكەتتىڭ قاۋىپسىزدىگىن قامتاماسىز ەتۋدەن تۇرادى.
سوندا قاۋىپسىزدىك كەڭەسى وراسان ادام قۇرباندىقتارىنا سوقتىرعان COVID-19 ىندەتىنىڭ ءورشۋىن دە، ونىڭ سوقتىرار ىقتيمال شىعىندارىن بولجاي الماعان بولىپ شىقتى.
بۇل ىندەت 2020 جىلعى قاڭتار ايىنان الەمگە ءقاۋىپ توندىرە باستادى. سوندا قاۋىپسىزدىك كەڭەسى تىكەلەي مىندەتى ەكەنىنە قاراماستان جەتى ايدان بەرى كوروناۆيرۋسقا قاتىستى ىشكى جانە سىرتقى جاعدايدى لايىقتى باعامداي المادى. يۆل اپپاراتتارىنىڭ، وتتەگى كونسەنتراتورلارىنىڭ ىقتيمال تاپشىلىعىن ەسەپتەپ، ەمدەۋ مەكەمەلەرىن قامتاماسىز ەتۋ جونىندە ۇسىنىستار جاساي المادى. ءتىپتى وعان ەشكىم پىسقىرماعان.
وسىنداي بەيعامدىقتىڭ سالدارىنان (ءتوراعاسىنىڭ ءوزى جۇقتىرىپ) قازاقستان كوروناۆيرۋس ءورشۋى جاعىنان الەمدە ءبىرىنشى ورىنعا شىعىپ كەتتى.
قازاقستان حالقىنىڭ دەنساۋلىعى – ۇلتتىق بايلىعى. ەڭ باستى قۇندىلىعى دا – ادام. ەندەشە جەكەلەگەن ازاماتتارىنىڭ، بۇكىل قوعامنىڭ، سونداي-اق مەملەكەتتىڭ قاۋىپسىزدىگىن قامتاماسىز ەتە الماعان قاۋىپسىزدىك كەڭەسى ءوزىنىڭ مۇلدە ءتيىمسىز ءارى قاجەتسىز ەكەندىگىن كورسەتتى.
حالىققا، قوعامعا، مەملەكەتكە ەشقانداي پايداسىز مۇنداي ورگاننىڭ بيۋدجەت قارجىسىنا ۇستالىپ تۇرىلۋى – قىلمىس.
سوندىقتان ازاماتتارىنىڭ الدىندا جاۋاپكەرشىلىگى، قوعام الدىندا قامقورلىعى، الەم الدىندا ابىرويى قالماعان قاۋىپسىزدىك كەڭەسى تاراتىلسىن!
مارات ءبايدىلدا ۇلىنىڭ جازباسى
