قازاق، ورىس جانە اعىلشىن تىلىندە شىققان كىتاپتىڭ تانىستىرىلىمى تۇركىستاندا ءوتىپ جاتقان قاجىمۇقان ءتۋرنيرىنىڭ الدىندا وتكىزىلدى. كىتاپتىڭ تانىستىرىلىمىنا «تۇركىستان وبلىسى بويىنشا جاۋىنگەرلىك ونەر قاۋىمداستىعىنىڭ» قۇرمەتتى پرەزيدەنتى، ق ر ۇلتتىق قاۋىپسىزدىك كوميتەتىنىڭ تۇركىستان وبلىسى بويىنشا دەپارتامەنتىنىڭ باستىعى، گەنەرال-مايور ابىلسەيىت دۇيسەبايەۆ پەن تۇركىستان وبلىسى اكىمىنىڭ ورىنباسارى ساكەن قالقامانوۆ جانە سپورت جاناشىرلارى مەن كىتاپ اۆتورلارى قاتىستى.
قۇندى كىتاپتا قاجىمۇقان بابانىڭ سپورتتاعى جەڭىستى جولىمەن قاتار ءومىربايانى، قايتالانباس بولمىسى ناقتى دەرەكتەرمەن ورنەكتەلگەن. وسىدان ءبىر جىل بۇرىن ورداباسى اۋدانىنىڭ سول كەزدەگى اكىمى نۇربول تۇراشبەكوۆ كۇش اتاسى قاجىمۇقان مۇڭايتپاس ۇلىنىڭ ەسىمىن تەك ەل اۋماعىندا ەمەس، شەت مەملەكەتتەرگە دە ناسيحاتتاۋ كەرەگىن ايتىپ، قازاق بالۋانىنىڭ ءومىربايانى ءۇش تىلدە باياندالاتىن كىتاپ شىعارۋدى قولعا العان ەدى. اۋدان اكىمى اۋىسقانىمەن يدەيا ورداباسى اۋدانىنىڭ قازىرگى اكىمى باعلان باتىرشايەۆتىڭ قولداۋىمەن تولىق جۇزەگە استى. كىتاپتىڭ اۆتورلارى – تانىمال جۋرناليست باقتيار تايجان مەن ورداباسى اۋداندىق مادەنيەت جانە تىلدەردى دامىتۋ ءبولىمىنىڭ باسشىسى ءقۇرمانالى جىلقىباي.
سونىمەن بىرگە تۇركىستاندا «الىپ كۇش يەسى – قاجىمۇقان» دەرەكتى ءفيلمىنىڭ تانىستىرىلىمى ءوتتى. قاجىمۇقان مۇڭايتپاس ۇلىنىڭ 150 جىلدىعىنا ارنالعان فيلم تۇركىستان وبلىسى، ورداباسى اۋدانى اكىمدىگىنىڭ تاپسىرىسى بويىنشا تۇركىستان وبلىستىق مادەنيەت باسقارماسىنىڭ قولداۋىمەن تۇسىرىلگەن.
دەرەكتى فيلمدە قاجىمۇقاننىڭ بالالىق شاعى، سپورتتاعى جەتىستىگى مەن ءوز ۇلتىنا دەگەن سۇيىسپەنشىلگى باياندالادى. سونىمەن قاتار بۇل تۋىندىدا بالۋاننىڭ تۋعان جەرى تۋرالى دا تىڭ جاڭالىق ۇسىنىلادى. ءفيلمنىڭ پروديۋسەرى – ءسابيت ءابدىحالىقوۆ، كەڭەسشىسى – ءالىمجان قۇرتايەۆ، سەناريي اۆتورى – سافۋان رىسباي، قويۋشى رەجيسسەر – سامات دجاليلوۆ. قاجىمۇقاننىڭ ءرولىن رومان ابىلدايەۆ پەن باقتيار تۇيمەبايەۆ سومداعان. دەرەكتى فيلم ۇزاقتىعى – 49 مين 35 سەكۋند.
ءفيلمنىڭ تانىستىرىلىمىندا «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى ب.تاجىبايەۆ، تۇركىستان وبلىستىق مادەنيەت باسقارماسىنىڭ باسشىسى ءا.قويلىبايەۆ جانە ورداباسى اۋدانىنىڭ اكىمى ب.باتىرشايەۆ ءسوز سويلەپ، ۇلى بالۋاننىڭ داڭقتى جولى جاستارعا جىگەر بەرەتىنىنە توقتالدى. بالۋان تۋرالى دەرەكتى ءفيلمدى تاماشالاعان العاشقى كورەرمەندەر جاڭا تۋىندىعا وڭ باعالارىن بەردى.
