مەملەكەت باسشىسى جەتىسۋ وبلىسىنا جاساعان جۇمىس ساپارىنىڭ باسى كورنەكتى ەتنوگراف، فولكلورتانۋشى، اعارتۋشى-عالىم شوقان ءۋاليحانوۆتىڭ بەيىتىنە زيارات ەتۋدەن باستالدى.
بۇدان كەيىن قاسىم-جومارت توقايەۆ شوقان ءۋاليحانوۆ اتىنداعى «التىنەمەل» مەموريالدىق مۋزەيىنە باردى. مۋزەيدە پرەزيدەنتكە شوقان ءۋاليحانوۆتىڭ ءومىرى مەن ەڭبەك جولى، اسكەري قىزمەتى، تاريحي-ەتنوگرافيالىق، گەورافيالىق زەرتتەۋلەرى جانە عۇمىرىنىڭ سوڭعى كەزەڭى تۋرالى تاريحي دەرەكتەر مەن جادىگەرلەر تانىستىرىلدى.
قاسىم-جومارت توقايەۆ شوقان ءۋاليحانوۆ جايلى جازىلعان ەڭبەكتەردىڭ ءبارىن وقىپ شىققانىن ەسكە الىپ، ونىڭ زەرتتەۋ جۇمىستارىمەن تانىس ەكەنىن تىلگە تيەك ەتتى. سونىمەن قاتار پرەزيدەنت مۋزەيدەگى جادىگەرلەردى ءالى دە تولىقتىرا ءتۇسۋ كەرەك ەكەنىنە نازار اۋداردى. ءوز كەزەگىندە قاسىم-جومارت كەمەل ۇلى قۇرمەتتى قوناقتار كىتابىنا قولتاڭباسىن قالدىرىپ، مۋزەي قىزمەتكەرلەرىمەن اڭگىمەلەستى.
جەتىسۋ وبلىسى اكىمىنىڭ ورىنباسارى رۋستام ءاليدىڭ ايتۋىنشا، بۇگىندە وڭىردە تۋريزم سالاسىنىڭ دامۋىنا قاتىستى نەگىزگى كورسەتكىشتەردە ءوسىم بايقالۋدا. سوڭعى ءۇش جىلدا وڭىرگە كەلگەن تۋريستەر سانى ەكى ەسە ارتقان. ال وسى سالاداعى كورسەتىلەتىن قىزمەتتەر كولەمى 16 ميلليارد تەڭگەگە دەيىن ءوستى. بۇگىندە اتالعان باعىتتىڭ دامۋىنا تىڭ سەرپىن بەرۋ ءۇشىن ءبىرقاتار ينفراقۇرىلىمدىق جوبا جۇزەگە اسىرىلىپ جاتىر.
اتاپ ايتقاندا، ءقازىر الاكولگە كولىكتىڭ بىرنەشە تۇرىمەن جەتۋگە بولادى. بىلتىر ءۇشارال اۋەجايىنىڭ ۇشۋ-قونۋ جولاعىنا رەكونسترۋكسيا جاسالىپ، تۇراقتى اۋە قاتىناسى جولعا قويىلدى. بيىل «استانا – دوستىق» باعىتى بويىنشا «تالگو» پويىزى ىسكە قوسىلدى جانە «ءۇشارال – دوستىق» اۆتوجولىنىڭ رەكونسترۋكسياسى اياقتالدى. قازىرگى كەزدە «تالدىقورعان – قالباتاۋ – وسكەمەن» اۆتوجولىن قايتا جوندەۋ، الاكول كۋرورتتىق ايماعىندا جوعارى ۆولتتى ەلەكتر جەلىلەرىن تارتۋ جۇمىستارى جۇرگىزىلىپ جاتىر.
بۇعان قوسا «بالقاش» تۋريستىك-رەكرەاسيالىق ايماعىنىڭ باس جوسپارى» ازىرلەندى. ونىڭ اياسىندا ۇزىندىعى 16 شاقىرىم بولاتىن جاعالاۋعا بيۋدجەت ەسەبىنەن ينجەنەرلىك-كوممۋنيكاسيالىق جەلى تارتىلىپ، جالپى اۋماعى 860 گەكتار جەرگە 7 باعىتتاعى دەمالىس ايماقتارى ورنالاستىرىلادى. جوسپار شەڭبەرىندە 30 ميلليارد تەڭگەگە دەيىن جەكە ينۆەستيسيا تارتۋ كوزدەلگەن. سونىمەن قاتار كەلەسى جىلى كولگە اپاراتىن «الماتى – وسكەمەن – لەپسى – اقتوعاي» جولىنىڭ رەكونسترۋكسياسىن اياقتاۋ جوسپارلانىپ وتىر.
«التىن-ەمەل»، «جوڭعار الاتاۋى» ۇلتتىق تابيعي پاركتەرىندە ەكولوگيالىق تۋريزمگە باسىمدىق بەرىلەدى. بيىل «Altynemel» ۆيزيت-ورتالىعى اشىلدى. ال «جوڭعار الاتاۋى» ۇلتتىق پاركىنىڭ اۋماعىندا جالپى قۇنى 1،7 ميلليارد تەڭگە بولاتىن 8 ينۆەستيسيالىق جوبا جۇزەگە اسىرىلماق.
سونىمەن قاتار تەكەلى ماڭايىندا شاڭعى-بياتلون كەشەنىن سالۋ جانە بۇرقانبۇلاق سارقىراماسىنا دەيىنگى جولدى جوندەۋ جۇمىستارى جوسپارلانعان.
مەملەكەت باسشىسى تۋريستىك-دەمالىس ايماقتارىنا ينجەنەرلىك-كوممۋنيكاسيالىق جەلى جۇرگىزۋمەن جانە اباتتاندىرۋمەن بەلسەندى تۇردە اينالىسىپ، وبلىستىڭ تۋريستىك الەۋەتىن ارتتىرۋ قاجەت ەكەنىن ايتتى.
– جالپى، وبلىستا تۋريستىك نىساندار جەتكىلىكتى. سوندىقتان ونىڭ بارىنە ءتيىستى دەڭگەيدە ءمان بەرىپ، دامىتۋ كەرەك. تۋريزم جەتىسۋ وبلىسى ەكونوميكاسىنىڭ باسىم باعىتى بولۋعا ءتيىس. تۋريستەر نەعۇرلىم كوبىرەك كەلسە، وبلىسقا دا وڭ سەپتىگىن تيگىزەدى. وبلىستىڭ تۋريزم سالاسىنداعى الەۋەتى وتە زور، – دەدى پرەزيدەنت.
