جاقىندا استانادا مەملەكەت باسشىسى قاسىم-جومارت توقايەۆتىڭ قاتىسۋىمەن “جاڭا ادامدار” جاستار قوزعالىسىنىڭ فورۋمى ءوتتى. مۇندا پرەزيدەنت جاستارمەن ەركىن فورماتتا پىكىر الماستى. اتالعان جيىنعا قاتىستى جۋرناليست ءارى قوعام بەلسەندىسى الماس التاي مەن قازاقستاندىق قوعامدىق دامۋ ۇيىمىنىڭ ساراپشىسى جاقسىبەك جيەنالييەۆ ءوز پىكىرىن ءبىلدىردى، دەپ حابارلايدى Dalanews.kz.
قازاقستاندا جاستاردىڭ وزەكتى ماسەلەلەرىن اشىق تالقىلايتىن جاڭا الاڭ قالىپتاسىپ كەلەدى. “جاڭا ادامدار” فورۋمى – جاستاردىڭ وزىندىك مىنبەرى. مۇندا كۇن ءتارتىبىن شەنەۋنىكتەر ەمەس، قوعامنىڭ بەلسەندى جاس وكىلدەرى قالىپتاستىرادى.
جۋرناليست ءارى قوعام بەلسەندىسى الماس التاي بۇل فورۋمنىڭ فورماتىنا نازار اۋدارىپ، ونىڭ بۇرىنعى جيىنداردان ەرەكشەلەنەتىنىن اتاپ ءوتتى.
“مەملەكەت باسشىسىنىڭ ساياسي مىنبەردەن، رەسمي جينالىستاردان، جولداۋلارىنان جاستار تاقىرىبىن قالدىرماي قوزعاپ، ۇدايى اڭگىمەسىنە قوسىپ جۇرەتىنىن بىلەمىز. الايدا مىناداي شاراعا بارعانىن كورمەپپىز. اشىق، ەمىن-ەركىن، گالستۋكسىز كىرىپ باردى. جاستار ايىلىن جيىپ تۇرعان جوق. “الدىمدا مەملەكەت باسشىسى تۇر-اۋ” دەگەن ورىنسىز كىبىرتىكتەۋ بايقالمايدى، جارقىلداپ اشىق سويلەيدى”، — دەپ جازدى ول.
التايدىڭ سوزىنشە، كەزدەسۋدىڭ بەيرەسمي اۋراسى پرەزيدەنتتىڭ ەركىن ديالوگ قۇرۋىنا دا ىقپال ەتكەن.
“انا جەردى كەرنەگەن قۋات، ەموسيالار پرەزيدەنتتىڭ ءوزىن دە ەلتىپ، ەرتىپ كەتكەندەي: قانداي جيىندا دا سالقىن سابىرىنان اۋىتقىماي، ءبىرقالىپتى ىرعاقپەن سوقتىرىپ شىعاتىن كەمەل ۇلىنىڭ داۋىسى تولقىپ، كوپ رەتتە كوتەرىڭكى رەڭكتە سويلەدى — بۇعان دا تاڭعالدىم”، — دەيدى ول.
الماس التاي فورۋم بارىسىندا كوتەرىلگەن باستامالاردى جوعارى باعالاپ، بۇل تەك جاستار ءۇشىن ەمەس، بۇكىل قازاق قوعامىنا قاجەتتى قادام ەكەنىن اتاپ ءوتتى.
“جاڭا ادامداردىڭ” ارتىندا كىم تۇرعانىن بىلمەدىم. ءبىراق، مەملەكەتكە ءسوزىن وتكىزە الاتىن، ايتقانىن تىڭداتا الاتىن ءبىر قاۋىم پايدا بولعانى انىق. پرەزيدەنتتىڭ الدىندا ىركىلمەي، تولعاندىرعان ماسەلەلەرىن توگە سالعانى — مەملەكەتكە سيگنال سەكىلدى. ەندى مىنا قاۋىممەن ساناسۋ كەرەك-اق… جاستار بۇلاي ورەكپي بەرەر بولسا، بيلىككە كادىمگىدەي سالماق تا ءتۇسۋى كادىك!” — دەپ جازدى جۋرناليست.
سونىمەن قاتار توقايەۆ كەزدەسۋ بارىسىندا جاستار ءۇشىن اسا ماڭىزدى شىعارماشىلىق، ادەبيەت، كينو، جاڭا تەحنولوگيالارعا قولداۋ كورسەتەتىن ارنايى قور قۇرىلاتىنىن مالىمدەدى.
“بۇل جاستارعا عانا ەمەس، تۇتاس قازاق قوعامىنا قاجەت نارسە”، — دەدى الماس التاي.
ونىڭ ايتۋىنشا، بۇل – مەملەكەتتىڭ جاستاردىڭ تالاپ-تىلەكتەرىن ەلەۋسىز قالدىرا المايتىنىن كورسەتەتىن ماڭىزدى بەلگى.
“ادەبيەت پەن كينوعا، جالپى رۋحانياتقا باعىتتالعان قامقورلىق دەگەن ماعان ەرەكشە ۇنايدى! تۇپتەپ كەلگەندە، بۇنى ۇلتقا قامقورلىق دەپ بىلەم”، — دەدى ول.
سونداي-اق قازاقستاندىق قوعامدىق دامۋ ۇيىمىنىڭ ساراپشىسى جاقسىبەك جيەنالييەۆ قازاقستان جاستارى – ەلدىڭ باستى رەسۋرسى، جاڭاشىلدىق پەن وزگەرىستەردىڭ باستاماشىسى ەكەنىن اتاپ ءوتتى.
"ءاربىر ۇلتتىڭ باياندى بولاشاعى – ونىڭ ۇرپاعىمەن تىكەلەي بايلانىستى. جاستاردىڭ قۋاتى، جاڭاشىلدىعى مەن قايرات-جىگەرى قوعامدى العا جەتەلەيتىن ەڭ ۇلكەن كۇش. جاستار - ەل دامۋىنىڭ باستى رەسۋرسى، سارقىلمايتىن ەنەرگيا، جاڭا يدەيالار مەن وزگەرىستەردىڭ باستاۋشىسى دەپ بىلەمىن.
"بۇل فورۋم ەلىمىزدەگى بەلسەندى، ايتارى بار جاستاردىڭ باسىن قوستى. ەڭ باستىسى - ەركىندىك. ويىڭدى، كوزقاراسىڭدى ءتىپتى نارازىلىعىڭدى اشىق جەتكىزۋ. بيلىككە جاستاردىڭ ءۇنى جەتتى دەپ ويلايمىن، سەبەبى كەزدەسۋگە پرەزيدەنتتىڭ ءوزى قاتىستى. كوردى، تىڭدادى، وي ءتۇيدى. بۇل – ءبىزدىڭ قوعامدا جاستاردى تىڭدايتىن، جاستاردىڭ كۇشىن مويىندايتىن، جاستار سويلەيتىن جاڭا الاڭنىڭ، جاڭا بۋىننىڭ قالىپتاسىپ جاتقانىن بىلدىرەدى"، - دەدى ول.
"مەملەكەت "جاڭا ادامدارمەن" ساناسۋعا ءماجبۇر. بيلىك ءۇشىن بۇل قوزعالىس ىڭعايلى، ويتكەنى ول جاستاردىڭ كوپتەگەن ماسەلەلەرىن شەشۋگە كومەكتەسەدى. ايتسە دە، مەدالدىڭ ەكى جاعى بار دەگەندەي، قوزعالىستىڭ باستامالارى جۇيەنى الاڭداتۋى مۇمكىن، ويتكەنى ولار حالىقتىڭ اراسىنان شىعادى، ەشكىمنىڭ ايتقانىنا كونىپ، ايداۋىنا جۇرمەيدى.
“جاڭا ادامدار” دەگەن كىمدەر؟
ايتا كەتەيىك، 8 اقپاندا “جاڭا ادامدار” دەپ اتالاتىن جاستار قوزعالىسىنىڭ فورۋمى ءوتتى. بۇل جيىنعا قاسىم-جومارت توقايەۆ تا قاتىسىپ، جاستاردىڭ كوتەرگەن ماسەلەلەرىن تىڭدادى.
قوزعالىستىڭ 19 قالادا كامپۋسى جانە 15 مىڭعا جۋىق بەلسەندى مۇشەسى بار. ولار ازاماتتىق باستامالار مەن اكسيالاردى ۇيىمداستىرىپ، قوعامداعى وزەكتى پروبلەمالارعا نازار اۋدارتىپ كەلەدى. اتاپ ايتقاندا، ۆانداليزم، قوقىس تاستاۋ، كامەلەتكە تولماعاندارعا ىشىمدىك ساتۋ، ەسىرتكى تاراتۋ سياقتى ماسەلەلەرگە قارسى كۇرەس جۇرگىزىپ، وزدەرىنىڭ ازاماتتىق ۇستانىمدارىن ءبىلدىرىپ ءجۇر.
جاستار كوتەرگەن ماسەلەلەرگە بيلىكتىڭ نازار اۋدارۋى – قوعامنىڭ وزگەرىپ كەلە جاتقانىنىڭ بەلگىسى. ەندىگى كەزەكتە “جاڭا ادامدار” قوزعالىسى ءوز ءۇنىن قانشالىقتى قاتتى شىعارا الادى جانە ولاردىڭ باستامالارى ناقتى ىسكە اسا ما – ونى ۋاقىت كورسەتەدى.
