Jaqynda Astanada memleket basshysy Qasym-Jomart Toqaevtyń qatysýymen “Jańa adamdar” jastar qozǵalysynyń forýmy ótti. Munda Prezident jastarmen erkin formatta pikir almasty. Atalǵan jiynǵa qatysty jýrnalist ári qoǵam belsendisi Almas Altai men Qazaqstandyq qoǵamdyq damý uiymynyń sarapshysy Jaqsybek Jienaliev óz pikirin bildirdi, dep habarlaidy Dalanews.kz.
Qazaqstanda jastardyń ózekti máselelerin ashyq talqylaityn jańa alań qalyptasyp keledi. “Jańa adamdar” forýmy – jastardyń ózindik minberi. Munda kún tártibin sheneýnikter emes, qoǵamnyń belsendi jas ókilderi qalyptastyrady.
Jýrnalist ári qoǵam belsendisi Almas Altai bul forýmnyń formatyna nazar aýdaryp, onyń burynǵy jiyndardan erekshelenetinin atap ótti.
“Memleket basshysynyń saiasi minberden, resmi jinalystardan, joldaýlarynan jastar taqyrybyn qaldyrmai qozǵap, udaiy áńgimesine qosyp júretinin bilemiz. Alaida mynadai sharaǵa barǵanyn kórmeppiz. Ashyq, emin-erkin, galstýksyz kirip bardy. Jastar aiylyn jiyp turǵan joq. “Aldymda Memleket basshysy tur-aý” degen orynsyz kibirtikteý baiqalmaidy, jarqyldap ashyq sóileidi”, — dep jazdy ol.
Altaidyń sózinshe, kezdesýdiń beiresmi aýrasy Prezidenttiń erkin dialog qurýyna da yqpal etken.
“Ana jerdi kernegen qýat, emotsiialar Prezidenttiń ózin de eltip, ertip ketkendei: qandai jiynda da salqyn sabyrynan aýytqymai, birqalypty yrǵaqpen soqtyryp shyǵatyn Kemelulynyń daýysy tolqyp, kóp rette kóterińki reńkte sóiledi — buǵan da tańǵaldym”, — deidi ol.
Almas Altai forým barysynda kóterilgen bastamalardy joǵary baǵalap, bul tek jastar úshin emes, búkil qazaq qoǵamyna qajetti qadam ekenin atap ótti.
“Jańa adamdardyń” artynda kim turǵanyn bilmedim. Biraq, memleketke sózin ótkize alatyn, aitqanyn tyńdata alatyn bir qaýym paida bolǵany anyq. Prezidenttiń aldynda irkilmei, tolǵandyrǵan máselelerin tóge salǵany — memleketke signal sekildi. Endi myna qaýymmen sanasý kerek-aq… Jastar bulai órekpi berer bolsa, bilikke kádimgidei salmaq ta túsýi kádik!” — dep jazdy jýrnalist.
Sonymen qatar Toqaev kezdesý barysynda jastar úshin asa mańyzdy shyǵarmashylyq, ádebiet, kino, jańa tehnologiialarǵa qoldaý kórsetetin arnaiy qor qurylatynyn málimdedi.
“Bul jastarǵa ǵana emes, tutas qazaq qoǵamyna qajet nárse”, — dedi Almas Altai.
Onyń aitýynsha, bul – memlekettiń jastardyń talap-tilekterin eleýsiz qaldyra almaitynyn kórsetetin mańyzdy belgi.
“Ádebiet pen kinoǵa, jalpy rýhaniiatqa baǵyttalǵan qamqorlyq degen maǵan erekshe unaidy! Túptep kelgende, buny Ultqa qamqorlyq dep bilem”, — dedi ol.
Sondai-aq Qazaqstandyq qoǵamdyq damý uiymynyń sarapshysy Jaqsybek Jienaliev Qazaqstan jastary – eldiń basty resýrsy, jańashyldyq pen ózgeristerdiń bastamashysy ekenin atap ótti.
"Árbir ulttyń baiandy bolashaǵy – onyń urpaǵymen tikelei bailanysty. Jastardyń qýaty, jańashyldyǵy men qairat-jigeri qoǵamdy alǵa jeteleitin eń úlken kúsh. Jastar - el damýynyń basty resýrsy, sarqylmaityn energiia, jańa ideialar men ózgeristerdiń bastaýshysy dep bilemin.
"Bul forým elimizdegi belsendi, aitary bar jastardyń basyn qosty. Eń bastysy - erkindik. Oiyńdy, kózqarasyńdy tipti narazylyǵyńdy ashyq jetkizý. Bilikke jastardyń úni jetti dep oilaimyn, sebebi kezdesýge Prezidenttiń ózi qatysty. Kórdi, tyńdady, oi túidi. Bul – bizdiń qoǵamda jastardy tyńdaityn, jastardyń kúshin moiyndaityn, jastar sóileitin jańa alańnyń, jańa býynnyń qalyptasyp jatqanyn bildiredi", - dedi ol.
"Memleket "Jańa adamdarmen" sanasýǵa májbúr. Bilik úshin bul qozǵalys yńǵaily, óitkeni ol jastardyń kóptegen máselelerin sheshýge kómektesedi. Áitse de, medaldyń eki jaǵy bar degendei, qozǵalystyń bastamalary júieni alańdatýy múmkin, óitkeni olar halyqtyń arasynan shyǵady, eshkimniń aitqanyna kónip, aidaýyna júrmeidi.
“Jańa adamdar” degen kimder?
Aita keteiik, 8 aqpanda “Jańa adamdar” dep atalatyn jastar qozǵalysynyń forýmy ótti. Bul jiynǵa Qasym-Jomart Toqaev ta qatysyp, jastardyń kótergen máselelerin tyńdady.
Qozǵalystyń 19 qalada kampýsy jáne 15 myńǵa jýyq belsendi múshesi bar. Olar azamattyq bastamalar men aktsiialardy uiymdastyryp, qoǵamdaǵy ózekti problemalarǵa nazar aýdartyp keledi. Atap aitqanda, vandalizm, qoqys tastaý, kámeletke tolmaǵandarǵa ishimdik satý, esirtki taratý siiaqty máselelerge qarsy kúres júrgizip, ózderiniń azamattyq ustanymdaryn bildirip júr.
Jastar kótergen máselelerge biliktiń nazar aýdarýy – qoǵamnyń ózgerip kele jatqanynyń belgisi. Endigi kezekte “Jańa adamdar” qozǵalysy óz únin qanshalyqty qatty shyǵara alady jáne olardyń bastamalary naqty iske asa ma – ony ýaqyt kórsetedi.
