تاياۋدا "اباي" مادەني-اقپاراتتىق ورتالىعى چەح استناسى پراگا قالاسىندا اشىلدى. ورتالىقتى اشۋداعى ماقسات قازاقتىڭ باس اقىنى اباي ورتالىعىنىڭ مىندەتى – قازاق ادەبيەتى مەن رۋحانياتىنىڭ دامۋىنا ۇلەس قوسۋ، ويشىل شىعارمالارىن وقۋ مادەنيەتىن قالىپتاستىرىپ، اقىن مۇرالارىن شەتەلدەردەگى عالىمداردىڭ زەرتتەۋىنە جانە عىلىمي ەڭبەكتەردىڭ كوپتەپ جازىلۋىنا تۇرتكى بولۋ. بىرەگەي ورتالىقتا سان ءتۇرلى تۋىندىلار مەن ەلەكتروندى اقپاراتتىق رەسۋرستار جيناقتالعان. CD-ديسكىلەر، اقپاراتتىق جانە مەرزىمدى باسىلىمدار، عىلىمي ادەبيەتتەر بار.
بۇعان قوسا، اباي جانە ونىڭ شىعارماسى جايلى قازاقستاندىق ۇلتتىق ەلەكتروندى كىتاپحانادا 800-دەن استام باسىلىم توپتاسقان. «اباي» مادەني-اقپاراتتىق ورتالىعى اقىننىڭ دانالىق دۇنيەتانىمىن سارالاۋ، جەكەلەگەن عيبراتتى وي تۇيىندەرىن، ولەڭدەرى مەن قارا سوزدەرىندەگى فيلوسوفيالىق تۇجىرىمدارىنا تۇسىنىك بەرۋدى كوزدەيدى. سونىمەن بىرگە، «اباي» رومانىنىڭ شىققان العاشقى باسىلىمدارى، اباي تۋرالى شىعارمالار مەن سۋرەتشىلەردىڭ قۇجاتتارى، مۇراجايلار جانە ەسكەرتكىشتەر تۋرالى مالىمەتتەر، ۇلى اقىننىڭ بەينەسىن سالعان بەلگىلى سۋرەتشىلەردىڭ رەپرودۋكسيالارىنىڭ كوشىرمەلەرى مەن يلليۋستراسيالىق كىتاپ جانە فوتو كورمەلەرى كىتاپسۇيەر وقىرمان نازارىنا ۇسىنىلعان. ورتالىق جايلى اقپارات مادەنيەت جانە سپورت ءمينيسترىنىڭ سايتىندا جاريالانعان.
ايتا كەتەيىك، اباي قۇنانباي ۇلىنىڭ 175 جىلدىق مەرەيتويى سالتاناتتى تۇردە ەلوردادا اشىلعان بولاتىن. ق ر مادەنيەت جانە سپورت ءمينيسترى اقتوتى رايىمقۇلوۆا بۇل شارالار اقىن رۋحىن اسقاقتاتۋ ءۇشىن ۇيىمداستىرىلعانىن ايتقان.
– ۇلى اقىننىڭ مەرەيتويىندا حالىقارالىق، رەسپۋبليكالىق جانە وبلىس، اۋداندىق دەڭگەيدە 500دەن استام ءىس-شارا جوسپارلانعان. ماڭىزدىلارىنىڭ ءبىرى – تامىز ايىندا سەمەي قالاسىندا وتەتىن عىلىمي-تاجىريبەلىك كونفەرەنسيا. سونىمەن قاتار، قازاندا ەلوردادا اۋقىمدى حالىقارالىق كونفەرەنسيا وتپەك. اقىننىڭ ولەڭدەرى مەن قارا سوزدەرى الەمنىڭ ون تىلىنە اۋدارىلادى. اۋدارما ساپاسىنا باسا ءمان بەرىلەدى. اباي تۋرالى بىرنەشە دەرەكتى فيلم جانە تەلەسەريال ءتۇسىرۋ جوسپاردا بار. شەتەلدەردەگى قازاقستاننىڭ ەلشىلىكتەرى جانىنان «اباي ورتالىقتارى» اشىلادى. بۇل – الەمگە اقىننىڭ ەڭبەكتەرى مەن ۇلتتىق قۇندىلىقتارىمىزدى قاتار تانىتۋ دەگەن ءسوز. اقىننىڭ عيبراتتى عۇمىرى حالقىمىزدىڭ ءتول ونەرى – ايتىس ارقىلى دا كەڭىنەن ناسيحاتتالادى، – دەدى مينيستر.
