ساياساتكەر دوس كوشىم جۋىردا ۇستالعان پەريزات قايراتتىڭ ىسىنە قاتىستى پىكىر ءبىلدىردى، - دەپ حابارلايدى Dalanews.kz.
قوعام قايراتكەرىنىڭ سوزىنشە، قايىرىمدىلىق قورلارىنىڭ جۇمىسىنا باعا بەرۋ وتە قيىن.
"رەسپۋبليكالىق ۇيىمداردى باسقاردىم. سول ۋاقىتتا امەريكادان، حالىقارالىق ۇيىمداردان اقشا تاباتىنمىن. ول اقشانى ءوزىم ۇستامايمىن. سەبەبى سول ۇيىمنىڭ باسشىسىمىن، اتقارۋشى ديرەكتور بار، اتقارۋشى ديرەكتور اقشا ۇستايدى. مەن تەلەديدارعا شىعىپ ءسوز سويلەيمىن، شەتەلگە بارامىن. سوندىقتان پەريزات قايرات شىندىعىندا دا سول ۇيىمنىڭ باسشىسى بولسا، اقشانى مۇلدەم قولىنا ۇستاماۋى كەرەك. قانشا اقشا تۇسكەنىن اتقارۋشى ديرەكتور ايتادى. جالعىز ءوزى شەشپەيدى. ۇيىمدىق دەڭگەيدە بىرلەسە وتىرىپ شەشەدى"، - دەيدى دوس كوشىم STAN KZ-كە بەرگەن سۇحباتىندا.
ساياساتكەر كەز كەلگەن ۇيىمدا تەكسەرۋ كوميسسياسى بولۋى كەرەك ەكەنىن، بۇل كوميسسيا جىل سايىن تەكسەرىس جۇرگىزىپ وتىرۋى قاجەت ەكەنىن جەتكىزدى.
"ەكىنشى ماسەلە، كەز كەلگەن ۇيىمدا تەكسەرۋ كوميسسياسى بولادى. كوبىنە ءۇش ادامنان بولادى. تەكسەرۋ كوميسسياسى جىلدىڭ اياعىندا مىندەتتى تۇردە تەكسەرەدى. ەرتەڭ 1،5 ملرد اقشا جوعالدى دەسە، پەريزاتتى ەمەس، تەكسەرۋ كوميسسياسىنىڭ ادامدارىن قوسا "نە كوزدەرىن جۇمىپ وتىردى، نە بولماسا بىرگە جەدى" دەپ سوتتاۋ كەرەك"، - دەدى ول STAN KZ-كە بەرگەن سۇحباتىندا.
سونداي-اق، دوس كوشىم مۇنداي ۇيىمدار جىل سايىن اۋديت جۇرگىزۋى قاجەت دەگەن پىكىردە.
"كەز كەلگەن قوعامدىق ۇيىمدىق بولسىن، كەز كەلگەن فيرما بولسىن ءار ۋاقىتتا اۋديت جاسايدى. مەن رەسپۋبليكالىق ۇيىمدى باسقارعان ۋاقىتتا جىل سايىن شاماسى 3000 دوللارداي اقشا بەرىپ، بۋحگالتەر جالداپ، اۋديت جاسايتىنمىن. ويتكەنى باسقا جاقتان كەلگەن بۋحگالتەريا ءبىزدىڭ بۋحگالتەريانى تەكسەرەدى. سەبەبى مەن باسقاراتىن ۇيىمداردىڭ ءبارى مەملەكەتكە جاقپايدى عوي. سوندىقتان ارتىمنان ءتۇسىپ، "مەملەكەتكە وسىنشا سالىق تولەگەن جوقسىڭدار" دەگەن نارسەنى شىعارادى دا، ءبىزدىڭ ۇيىمدى جابادى. سول ۇيىمدى جاپپاس ءۇشىن ءار ۋاقىتتا تەكسەرىپ وتىرۋىم كەرەك"، - دەدى ساياساتكەر STAN KZ-كە بەرگەن سۇحباتىندا.
پەريزات قايراتتىڭ ءىسى بويىنشا وقيعا حرونولوگياسى
قما ەرىكتىلەر قوزعالىسىنىڭ بەلسەندىسى جانە قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىپ جاتىر.
"ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەگەن كۇدىككە ءىلىند"، — دەپ حابارلادى قارجى مونيتورينگى اگەنتتىگى بۇعان دەيىن.
مالىمەتكە سۇيەنسەك، قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا جۇمسالعان.
«بيىل كوكتەمدە ول ەلورداداعى اۆتوسالونداردا 88 ملن تەڭگەگە «Mercedes-Benz S450»، 80 ملن تەڭگەگە «Lexus LX-600» جانە 39 ملن تەڭگەگە «Haval» اۆتوكولىكتەرىن ساتىپ الدى. وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى «Akbulak Riviera»، «Highvill Ishim Gold»، «كوك جايلاۋ» تك (تۇراق ورىندارىن قوسا العاندا)، سونداي-اق «Vela Village» كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان. بۇل ەلدەردە ول «Cartier» جانە «Louis Vuitton» سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان. قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.
وسىلايشا، پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان»، - دەپ جازىلعان اگەنتتىك مالىمەتىندە.
ارتىنشا قما ونىڭ زاڭسىز ارەكەتىنىڭ تاعى ءبىر ەپيزودى انىقتالعانىن حابارلادى.
"2023 جىلدىڭ قاراشا ايىندا پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىردى. 2023 جىلعى جەلتوقساندا وسى اقشا ەسەبىنەن پەريزات ق. «Sensata Plaza» ەليتالىق كەشەنىنەن 49 ملن تەڭگەگە ءۇش بولمەلى پاتەر جانە 30 ملن تەڭگەگە «Mercedes-Benz EQE 500 4 Matic» جاڭا اۆتوكولىگىن ساتىپ الدى. سونىمەن قاتار، قاراجاتتىڭ ءبىر بولىگى ءباا—دە «Rolex»، «Prada» جانە «Fendi» برەندتىك بۋتيكتەرىنەن زەرگەرلىك بۇيىمداردى، ساعاتتار مەن كيىمدەردى ساتىپ الۋعا جۇمسالدى"، - دەپ جازىلعان حابارلامادا
