الەۋمەتتىك جەلىدە "پاۆلودار وبلىسىندا 10 جاستاعى ەكى بالا 7 جاسار وقۋشىنىڭ ءتىلىن كەسپەك بولعانى" تۋرالى اقپارات تارادى، دەپ حابارلايدى Dalanews.kz.
وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى مالىمەتىنشە، وقيعا كەشە كۇندىز بولعان.
"زارداپ شەككەن بالا اۋرۋحاناعا جاتقىزىلدى. ءقازىر ونىڭ جاعدايى قاناعاتتانارلىق دەپ باعالانىپ وتىر. ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا بولعان جاعدايدىڭ ءمان-جايىن انىقتاپ، كومەك كورسەتۋ ءۇشىن بالانىڭ اناسىمەن بايلانىسقا شىقتى. بالاعا جۇيەلى تۇردە كومەك كورسەتۋ ءۇشىن پسيحولوگيالىق قولداۋ ورتالىعىنا تاپسىرما بەرىلدى"، - دەپ جازىلعان حابارلامادا.
ءقازىر جاعداي وڭىرلىك بالا قۇقىقتارى جونىندەگى ۋاكىلدىڭ باقىلاۋىندا.
"وقيعاعا قاتىسى بار ادامداردىڭ جەكە باسىن انىقتاۋ ماقساتىندا ىزدەستىرۋ شارالارى جۇرگىزىلىپ جاتىر. سونداي-اق، بۇل ءىس كامەلەتكە تولماعانداردىڭ ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ قاراۋىنا ۇسىنىلادى"، - دەپ جازىلعان حابارلامادا.
