الماتىداعى وبلىستىق بالالار ءۇيىنىڭ ۇستازدارى وزدەرىنە قىسىم جاسالىپ جاتقانىن ايتىپ، شاعىمداندى. پەداگوگتاردىڭ سوزىنشە، باسشىلىق ولاردان ءوز ەركىمەن جۇمىستان كەتۋ تۋرالى ءوتىنىش جازۋدى تالاپ ەتۋدە. مەكەمە قىزمەتكەرلەرى بۇل جاعدايدى وزدەرىنىڭ بالالاردى قورعاعان ارەكەتىمەن بايلانىستىرىپ وتىر، دەپ حابارلايدى Dalanews.kz.
ۇستازدار وسى ماسەلە بويىنشا قۇقىق قورعاۋشى اننا چەرنوۆاعا بەينەۇندەۋ جولدادى. ۇجىمنىڭ ايتۋىنشا، باسشىلىق قيىن ساتتە جەتىم بالالاردىڭ قۇقىعىن قورعاعان قىزمەتكەرلەردەن قۇتىلعىسى كەلەدى.
بۇعان دەيىن جەتىم بالالاردى الماتى وبلىسىنداعى مەكەمەدەن قونايەۆ قالاسىنا كوشىرۋ جوسپارلانعان ەدى. كەيىن پرەزيدەنت توقايەۆ ارالاسىپ، بالالاردى الماتىدا قالدىرۋ تۋرالى شەشىم شىعارعان بولاتىن. بۇل تۋرالى اكىمدىك تە رەسمي مالىمدەگەن ەدى.
دەگەنمەن، پەداگوگتار بالالار ءۇيىن وبلىستان الماتى قالاسىنىڭ بالانسىنا كوشىرۋ پروسەسىندە ءبىرقاتار زاڭسىزدىقتار ورىن الىپ جاتقانىن ايتادى.
«ۇجىم 31 شىلدەدە كۇتپەگەن جەردەن شاقىرىلعان جينالىسقا تۇگەل قاتىسا المادى. جينالىستا زاڭگەر مەن كادر ءبولىمىنىڭ وكىلدەرى بولعان جوق. ءبىزدى جۇمىستان شىعارماقشى. ءقازىر بىزدەن ءوز ەركىمىزبەن جۇمىستان كەتۋ تۋرالى ارىز تالاپ ەتىلۋدە. ەرتەڭ قالالىق مەكەمە اياسىندا قايتادان كونكۋرس وتۋگە ماجبۇرلەيدى. ءبىراق كىمنىڭ جۇمىسقا الىنىپ، كىمنىڭ سىرت قالاتىنى بەلگىسىز. بۇل – قىزمەتكەرلەرگە قىسىم جاساۋ، پەداگوگ مارتەبەسىن قورلاۋ»، – دەيدى ۇستازدار.
مەكەمە قىزمەتكەرى نادەجدا الەكساندروۆنا كەشە استانادان وقۋ-اعارتۋ مينيسترلىگىنەن ارنايى كوميسسيا كەلگەنىن راستادى. ايتۋىنشا، وبلىستىق باسقارمانىڭ وكىلدەرى «بۇگىننەن باستاپ سىزدەر الماتى قالاسىنا وتەسىزدەر، ءبىراق الدىمەن جۇمىستان شىعىپ، كونكۋرسقا قاتىساسىزدار، سودان سوڭ قابىلدايمىز با، جوق پا – شەشەمىز» دەپ اشىق ايتقان.
«بۇل قالاي بولعانى؟ ءوزىمىز جۇمىس ىستەپ جۇرگەن مەكەمەگە قايتادان كونكۋرس ارقىلى كىرۋىمىز كەرەك پە؟ ولار وسىلايشا ءبىزدى جۇمىستان شىعارىپ، بالالاردى باسقا ەكى ورتالىققا ءبولىپ جىبەرمەك. بارلىعى تىنىش ءارى تەز وتەدى دەپ ويلادى. ءبىراق ءبىز بۇگىن تاڭەرتەڭنەن باستاپ نارازىلىق تانىتتىق. ءقازىر كوميسسيانىڭ قايتا كەلۋىن كۇتىپ وتىرمىز. بىزگە 2026 جىلدىڭ ناۋرىزىنا دەيىن وسى جەردە قالاسىزدار دەدى، ويتكەنى جوندەۋ جۇمىسى بىردەن باستالمايدى ەكەن. مەن ولارعا ايتتىم: "قىزمەتكەرلەردى جايىنا قالدىرىڭىزدار!" بۇل بارىمىزگە پسيحولوگيالىق سوققى بولدى. ءبىزدى ەشكىم الدىن الا ەسكەرتكەن جوق. كەشە ءبارىمىز ەسەڭگىرەپ قالدىق. ولار ءبىزدى جازالاعىسى كەلىپ وتىر»، – دەدى ۇستاز.
ءقازىر ۇجىم الداعى كۇندەرى بۇل ماسەلەنىڭ وڭ شەشىمىن كۇتۋدە.
ەسكە سالايىق، بۇعان دەيىن پرەزيدەنت قاسىم-جومارت توقايەۆ الماتىدا جەتىم بالالاردى قونايەۆقا كۇشتەپ كوشىرۋدى توقتاتۋدى تاپسىرعان بولاتىن.
قازىرگى تاڭدا پرەزيدەنت اكىمشىلىگى بۇل جاعداي بويىنشا تەكسەرۋ جۇرگىزىپ جاتىر. ارنايى توپ قۇرىلعان.
