Almatydaǵy oblystyq balalar úiiniń ustazdary ózderine qysym jasalyp jatqanyn aityp, shaǵymdandy. Pedagogtardyń sózinshe, basshylyq olardan óz erkimen jumystan ketý týraly ótinish jazýdy talap etýde. Mekeme qyzmetkerleri bul jaǵdaidy ózderiniń balalardy qorǵaǵan áreketimen bailanystyryp otyr, dep habarlaidy Dalanews.kz.
Ustazdar osy másele boiynsha quqyq qorǵaýshy Anna Chernovaǵa beineúndeý joldady. Ujymnyń aitýynsha, basshylyq qiyn sátte jetim balalardyń quqyǵyn qorǵaǵan qyzmetkerlerden qutylǵysy keledi.
Buǵan deiin jetim balalardy Almaty oblysyndaǵy mekemeden Qonaev qalasyna kóshirý josparlanǵan edi. Keiin Prezident Toqaev aralasyp, balalardy Almatyda qaldyrý týraly sheshim shyǵarǵan bolatyn. Bul týraly ákimdik te resmi málimdegen edi.
Degenmen, pedagogtar balalar úiin oblystan Almaty qalasynyń balansyna kóshirý protsesinde birqatar zańsyzdyqtar oryn alyp jatqanyn aitady.
«Ujym 31 shildede kútpegen jerden shaqyrylǵan jinalysqa túgel qatysa almady. Jinalysta zańger men kadr bóliminiń ókilderi bolǵan joq. Bizdi jumystan shyǵarmaqshy. Qazir bizden óz erkimizben jumystan ketý týraly aryz talap etilýde. Erteń qalalyq mekeme aiasynda qaitadan konkýrs ótýge májbúrleidi. Biraq kimniń jumysqa alynyp, kimniń syrt qalatyny belgisiz. Bul – qyzmetkerlerge qysym jasaý, pedagog mártebesin qorlaý», – deidi ustazdar.
Mekeme qyzmetkeri Nadejda Aleksandrovna keshe Astanadan Oqý-aǵartý ministrliginen arnaiy komissiia kelgenin rastady. Aitýynsha, oblystyq basqarmanyń ókilderi «búginnen bastap sizder Almaty qalasyna ótesizder, biraq aldymen jumystan shyǵyp, konkýrsqa qatysasyzdar, sodan soń qabyldaimyz ba, joq pa – sheshemiz» dep ashyq aitqan.
«Bul qalai bolǵany? Ózimiz jumys istep júrgen mekemege qaitadan konkýrs arqyly kirýimiz kerek pe? Olar osylaisha bizdi jumystan shyǵaryp, balalardy basqa eki ortalyqqa bólip jibermek. Barlyǵy tynysh ári tez ótedi dep oilady. Biraq biz búgin tańerteńnen bastap narazylyq tanyttyq. Qazir komissiianyń qaita kelýin kútip otyrmyz. Bizge 2026 jyldyń naýryzyna deiin osy jerde qalasyzdar dedi, óitkeni jóndeý jumysy birden bastalmaidy eken. Men olarǵa aittym: "Qyzmetkerlerdi jaiyna qaldyryńyzdar!" Bul bárimizge psihologiialyq soqqy boldy. Bizdi eshkim aldyn ala eskertken joq. Keshe bárimiz eseńgirep qaldyq. Olar bizdi jazalaǵysy kelip otyr», – dedi ustaz.
Qazir ujym aldaǵy kúnderi bul máseleniń oń sheshimin kútýde.
Eske salaiyq, buǵan deiin prezident Qasym-Jomart Toqaev Almatyda jetim balalardy Qonaevqa kúshtep kóshirýdi toqtatýdy tapsyrǵan bolatyn.
Qazirgi tańda Prezident Ákimshiligi bul jaǵdai boiynsha tekserý júrgizip jatyr. Arnaiy top qurylǵan.
