قازىنالى قارتتى مەيراممەن قۇتتىقتاپ، ىستىق لەبىزىن بىلدىرگەن ايماق باسشىسى قارياعا سىيلىعىن تابىستادى.
«جەر بەتىندەگى جاقسىلىق اتاۋلى انالاردىڭ ۇلكەن جۇرەگىمەن ارلەنەدى دەسەك، جىلىنا ءبىر تويلاناتىن مەرەكەدە ولاردىڭ ەڭبەكتەرىن باعالاپ، سىي قۇرمەت كورسەتۋ پارىزىمىز. سىزدەر ءومىردى نۇرلاندىرىپ، شاڭىراققا شاتتىق نۇرىن سەبەسىزدەر. سىزدەردىڭ قولداۋلارىڭىز اركىمنىڭ جۇرەگىندە سەنىمدىلىك ۇيالاتىپ، شۋاق سىيلايدى. وسى ايرىقشا قاسيەتتەرىڭىز ماڭگىلىك سالتانات قۇرىپ، ەلگە ىرىس-قۇت دارىسىن. ءارقاشان، شاڭىراقتارىڭىزدىڭ بەرەكەسى بولىپ، ۇيىڭىزدەن جىلىلىق كەتپەسىن. جانۇياڭىزعا بەرەكە، بىرلىك تىلەيمىن!»
دەگەن جانسەيىت قانسەيىت ۇلى قارت انامەن اڭگىمەلەسىپ، ەستەلىك سۋرەتكە ءتۇستى.
ەكى عاسىردىڭ كۋاسى بولعان، زۇلمات جىلدارى ايانباي تەر توككەن نازىم اجەي شاڭىراعىنا ارنايى قۇتتىقتاي كەلگەن وبلىس اكىمىنە العىسىن ءبىلدىرىپ، اق باتاسىن بەردى. جاستىق شاعىن ەسكە الىپ، اعىنان جارىلدى. اسىرەسە، وڭتۇستىك ءوڭىرىنىڭ كوركەيىپ جاتقانىنا قۋاندى.
قالامىزداعى ەڭ قارت انا وتىرار اۋدانى، ءشاۋىلدىر ەلدى مەكەنىندە 1909 جىلدىڭ 1 قاڭتارىندا شارۋالار وتباسىندا دۇنيەگە كەلگەن. سانالى عۇمىرىنىڭ بىرنەشە جىلى سۇراپىل سوعىس جىلدارىمەن تۇسپا-تۇس كەلگەن كەيۋانا سوعىسقا دەيىن كوپ جىلدار بويى جۇمىسشى بولىپ ەڭبەك ەتىپ، سول جەردەن زەينەتكەرلىككە شىققان-تىل ارداگەرى.
توعىز ۇل-قىز تاربيەلەپ وسىرگەن باتىر انا بۇگىنگى تاڭدا نەمەرە بالاسىنىڭ ۇيىندە تۇرادى. وتباسى مۇشەلەرى جەكە كاسىپپەن اينالىسادى. بۇگىندە 25 نەمەرە، 15 شوبەرە ءسۇيىپ وتىرعان كەيۋانانىڭ ويى انىق، دەنساۋلىعى ءبىرقالىپتى.
ايتا كەتەيىك، وڭتۇستىك قازاقستان وبلىسى تۇرعىندارىنىڭ 1،5 ميليونعا جۋىعىن نازىك جاندىلار قۇرايدى. ال وڭىردە 100 جاستان اسقان 88 قاريا ءومىر ءسۇرىپ جاتىر. ۇزاق جاساۋشى ەگدە ازاماتتاردىڭ باسىم كوپشىلىگى شىمكەنتتە، ماقتاارال مەن ساراىعاش اۋداندارىندا تۇرادى. 100 جاستان اسا ءومىر ءسۇرىپ جاتقان قارتتاردىڭ ىشىندە 70-گە جۋىعى تىل ەڭبەككەرلەرى.
وبلىس بويىنشا جىل كولەمىندە ۇزاق جاساۋشى قاريالارعا بيۋدجەت جانە مەكەمەلەر، دەمەۋشىلەر ەسەبىنەن مۇمكىندىگىنە قاراي ءبىر جولعى ماتەريالدىق جاردەم مەن سىي-سياپاتتار بەرىلىپ كەلەدى.
ماسەلەن، وتكەن 2016 جىلى 77 قارياعا 636،7 مىڭ تەڭگەنىڭ ماتەريالدىق قولداۋى كورسەتىلىپ، ونىڭ ىشىندە، جەرگىلىكتى بيۋدجەت ەسەبىنەن 86،9 مىڭ تەڭگە جانە دەمەۋشىلەر ەسەبىنەن 549،8 مىڭ تەڭگەگە سىيلىقتار ۇلەستىرىلدى.
