Qazynaly qartty meirammen quttyqtap, ystyq lebizin bildirgen aimaq basshysy qariiaǵa syilyǵyn tabystady.
«Jer betindegi jaqsylyq ataýly analardyń úlken júregimen árlenedi desek, jylyna bir toilanatyn merekede olardyń eńbekterin baǵalap, syi qurmet kórsetý paryzymyz. Sizder ómirdi nurlandyryp, shańyraqqa shattyq nuryn sebesizder. Sizderdiń qoldaýlaryńyz árkimniń júreginde senimdilik uialatyp, shýaq syilaidy. Osy airyqsha qasietterińiz máńgilik saltanat quryp, elge yrys-qut darysyn. Árqashan, shańyraqtaryńyzdyń berekesi bolyp, úiińizden jylylyq ketpesin. Januiańyzǵa bereke, birlik tileimin!»
degen Janseiit Qanseiituly qart anamen áńgimelesip, estelik sýretke tústi.
Eki ǵasyrdyń kýási bolǵan, zulmat jyldary aianbai ter tókken Nazym ájei shańyraǵyna arnaiy quttyqtai kelgen oblys ákimine alǵysyn bildirip, aq batasyn berdi. Jastyq shaǵyn eske alyp, aǵynan jaryldy. Ásirese, Ońtústik óńiriniń kórkeiip jatqanyna qýandy.
Qalamyzdaǵy eń qart ana Otyrar aýdany, Sháýildir eldi mekeninde 1909 jyldyń 1 qańtarynda sharýalar otbasynda dúniege kelgen. Sanaly ǵumyrynyń birneshe jyly surapyl soǵys jyldarymen tuspa-tus kelgen keiýana soǵysqa deiin kóp jyldar boiy jumysshy bolyp eńbek etip, sol jerden zeinetkerlikke shyqqan-tyl ardageri.
Toǵyz ul-qyz tárbielep ósirgen Batyr ana búgingi tańda nemere balasynyń úiinde turady. Otbasy músheleri jeke kásippen ainalysady. Búginde 25 nemere, 15 shóbere súiip otyrǵan keiýananyń oiy anyq, densaýlyǵy birqalypty.
Aita keteiik, Ońtústik Qazaqstan oblysy turǵyndarynyń 1,5 milionǵa jýyǵyn názik jandylar quraidy. Al óńirde 100 jastan asqan 88 qariia ómir súrip jatyr. Uzaq jasaýshy egde azamattardyń basym kópshiligi Shymkentte, Maqtaaral men Sarayǵash aýdandarynda turady. 100 jastan asa ómir súrip jatqan qarttardyń ishinde 70-ge jýyǵy tyl eńbekkerleri.
Oblys boiynsha jyl kóleminde uzaq jasaýshy qariialarǵa biýdjet jáne mekemeler, demeýshiler esebinen múmkindigine qarai bir jolǵy materialdyq járdem men syi-siiapattar berilip keledi.
Máselen, ótken 2016 jyly 77 qariiaǵa 636,7 myń teńgeniń materialdyq qoldaýy kórsetilip, onyń ishinde, jergilikti biýdjet esebinen 86,9 myń teńge jáne demeýshiler esebinen 549,8 myń teńgege syilyqtar úlestirildi.
