كورەيا، جاپونيا، اقش جانە قىتايدا ساتىلىم جاعىنان رەكوردتىق كورسەتكىشكە يە بەتكە ارنالعان كرەم بار. ونىڭ قۇدىرەتى – بەتتەگى ءاجىمدى قىسقا مەرزىم ىشىندە جوياتىن كورىنەدى. سونىسىمەن دە ءوتىمدى. ال وسى كرەمدى شىعاراتىن وڭتۇستىك كورەيانىڭ ينچحون قالاسىنداعى فابريكانىڭ قوجايىنى كىم ەكەنىن بىلەسىز بە؟
ول – ءبىزدىڭ جەرلەسىمىز، قازاق قىزى – گالينا ءالىموۆا. قازىرگى قيىن كۇندەردە پاندەمياعا بايلانىستى بۇل ءوندىرىس وشاعى سانتايزەرلەردى جاساپ شىعارۋمەن دە اينالىسا باستاعان.
باتىس قازاقستان ءوڭىرىنىڭ تۋماسى وتانداسىمىز جوعارى وقۋ ورنىن اياقتاعان سوڭ، باستاپقىدا كورەي كومپانياسىنا جۇمىسقا تۇرىپتى. سول كەزدە ونىڭ بولاشاق كاسىپكەرلىك ءىسىنىڭ ىرگەتاسى ءتۇزىلىپ، كىرپىشى قالانا باستايدى.
ياعني، سول شەتەلدىك كومپانيادا ءجۇرىپ، قاراپايىم جۇمىسشىدان ءىرى كومپانيا ديرەكتورىنىڭ ورىنباسارىنا دەيىن ءوز كۇشىمەن كوتەرىلەدى. كەيىننەن ءوزى بولەك وتاۋ تىگىپ، بيزنەستى جەكە جۇرگىزە باستايدى.
ءقازىر ول تەك كورەيا ەمەس، ءبىرقاتار شەتەلگە تانىلعان، بيزنەس سالاسىنىڭ جىلىگىن شاعىپ، مايىن ىشكەن كاسىبي بيكە. 20 جىلدان استام ەلىنەن جىراقتا وسىلايشا ءوز ەڭبەگىمەن كوتەرىلىپ، تابىستىلىعى بويىنشا كوپكە ۇلگى گالينامەن سۇحباتتاسۋدىڭ ءساتى تۇسكەن ەدى.
- وتانىڭىزدى ساعىناسىز با؟ ەلگە ورالۋ ويىڭىزدا جوق پا؟
- قالاي ساعىنبايسىز، ساعىنامىز. قازىرگى وندىرىستەگى تاۋارلارىمىزعا سۇرانىس بولىپ جاتسا، ەلىمىزگە دە اكەلسەم بە دەيمىن. كورىپ وتىرعاندارىڭىزداي، اراسىندا قازاقشا اتاۋ دا بار.
پاندەميا دەپ الاقان جايىپ قاراپ وتىرعان جوقپىز. جىل باسىندا كوسمەتيكاعا ارنالعان فابريكامىز تاعى ءبىر باعىتتى اشتى، ياعني قولداعى ميكروپتاردى جويۋعا ارنالعان ەرىتىندى – سانيتايزەرلەردى شىعارا باستادىق. باستاپقىدا كۇنىنە دەزينفەكسياعا ارنالعان 8 مىڭ دانا زات وندىرىلەتىن، ءقازىر دە وسى كولەمدى ساقتاپ قالۋدامىز. ءقازىر كوسمەتيكا ونىمدەرىنە سۇرانىس ازايعانمەن، بۇل زاتتارعا سۇرانىس جوعارى.
ارينە، قازاقستاندا كوسمەتيكالىق زاۋىت اشسام با دەيمىن. مىسالى كوكتەمدە، الاتاۋ بوكتەرىندە بايشەشەك قاپتاپ شىعىپ، كوزدىڭ جاۋىن الادى. بۇل گۇلدىڭ ادام تەرىسىنە پايداسى كوپ. ونى كوسمەتيكادا شيكىزات رەتىندە پايدالانۋعا بولادى.
ودان كەيىن بىزدە ارا بالى دا وندىرىلەدى. ول جالپى ادام دەنساۋلىعىنا پايداسى كوپ. ودان سۋسابىننان باستاپ بەتكە ارنالعان ماسكاعا دەيىن جاساۋعا بولادى. كورەيادا دوڭگەلەتىپ جاتقان ءوندىرىستى قازاقستاندا نەگە دوڭگەلەتپەسكە؟
مەنىڭشە، وعان وتانىمىزدا بارلىق مۇمكىندىك بار. ءوزىم تەحنيكالىق ۋنيۆەرسيتەتتى ءتامامدادىم. سوندىقتان ماعان ءوندىرىس سالاسىنداعى كەز كەلگەن نارسە قىزىق.
وسىندا كەلگەلى باس الماي اتقاراتىن نارسەمنىڭ ءبىرى – ءوندىرىس وشاقتارىندا بولۋ، باسشىلارىمەن، پروفەسسورلارمەن جۇزدەسىپ، سويلەسۋ. ويتكەنى بىزدە قانشاما حيميا ەلەمەنەتتەرى بار، ءبىراق كورەياداعىداي ءوندىرىس وشاقتارىنىڭ تىزبەگىنە اينالىپ كەتپەگەن، سونىڭ سەبەبىن ىزدەدىم. سول سەبەپتى اۋىر حيميا ونەركاسىبىنەن باستاپ زەرتحانالارعا دەيىن ارالاپ كوردىم. مەن ءۇشىن بۇل ۇلكەن تاجىريبە بولدى.
- قازاقشا اتاۋ دەپ قالدىڭىز، وسى اراسىنا كەڭىرەك توقتالا كەتسەڭىز...
- بۇل – كوسمەتيكالىق ونىمدەردىڭ برەندى. ماسەلەن، كوپتەگەن ەل اتتاي قالاتىپ الدىرتاتىن - «اينالايىن» ەسسەنسياسى. ونى «24ك» دەپ تە اتايمىز كەيدە، بۇل كرەم قۇرامىنداعى التىن. سودان كەيىن دە بۇل ءونىمنىڭ باعاسى قىمبات. قالتالى ازاماتتارعا ارنالعان. ال اتاۋىن «اينالايىن» دەپ ءوزىم قويدىم. بالا كۇنىمىزدەن قۇلاقتا قالعان ءسوز، قازاق بالاسىن وسىلاي ەركەلەتەدى عوي. جۇرەككە جىلۋ، بويعا ەرەكشە كۇش سىيلايدى. سول سەبەپتى وسىلاي اتاۋدى ءجون كوردىم. «انا گلوبال» دەگەن اتاۋداعى كوسمەتيكامىز دا بار. قىز بالانىڭ ءبىر مىندەتى انا بولۋ ەمەس پە؟ ال انا دەگەن كوپ مىندەت پەن قىزمەتتى اتقارادى. كەيدە بالالى ايەلدىڭ وزىنە قاراۋعا ۋاقىتى بولماي جاتادى. سوندىقتان وسىنداي ولقىلىققا جول بەرمەي، انالارعا قامقورلىق تانىتاتىن كوسمەتيكامىزدىڭ جەكە ءبىر لينياسى بار. تەك كرەم ەمەس، سۋسابىن، بەتكە ارنالعان ماسكا سىندى كوپتەگەن كوسمەتيكالىق ونىمدەر وندىرەمىز. 20 مىڭنان 30 مىڭ داناعا دەيىن كوسمەتيكا تۇرلەرىنە تاپسىرىس قابىلداي الامىز.
- كورەيا دەگەن فرانسيادان كەيىنگى كوسمەتيكا الەمىنىڭ وتانى بولىپ تابىلادى ەمەس پە؟ مۇندا ساپا، باعا جاعىنان بولسىن باسەكەلەستىك كۇشتى. سوعان توتەپ بەرە الىپ جاتىرسىز با؟ قازاق قىزى سىرتتان كەلىپ، كوسمەتيكا اينالىسۋمەن شۇعىلدانىپ، بۇل ورتاعا قالاي ءسىڭىسىپ، ونى تابىستى بيزنەس تۇرىنە اينالدىردى؟
- راس ايتاسىز. كورەيا – ناعىز ەڭبەكقورلاردىڭ ەلى. ءار ادام مۇندا ءوزىنىڭ ۋاقىتىن ءتيىمدى جۇمسايدى. مۇندا ۋاقىت- اقشا. سوندىقتان بوس ءجۇرىس دەگەن اتىمەن جوق. حالقى 3-4 ساعات قانا ۇيىقتايدى، سودان كەيىن جۇمىس، جۇمىس، جۇمىس. كەرەمەت ەڭبەكقور حالىق. بۇل ەلدىڭ ورنىنان تەز كوتەرىلىپ، تەز دامۋىنىڭ باستى قۇپياسى وسىندا سەكىلدى. مەن مۇندا كەلگەندە بىردەن كوسمەتيكامەن اينالىسىپ كەتكەن جوقپىن...
ءوزىم باتىس قازاقستان وبلىسى، اقجايىق اۋدانى، مەرگەن اۋىلىندا دۇنيەگە كەلىپ، ورتا مەكتەپتى ءتامامدادىم. سودان الماتىداعى قانىش ساتپايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ «پروگرامميست» ماماندىعى بويىنشا وقۋعا ءتۇستىم. جوو-نى اياقتاعان سوڭ سول قالاداعى كورەي كومپانيالارىنىڭ بىرىنە جۇمىسقا ورنالاستىم.
ەڭبەكقورلىعىممەن كومپانيا باسشىسى كوزىنە ءتۇسىپ، ول ماعان ءتىل ۇيرەنىپ العانىم ءجون بولاتىنىن ايتتى. ءسويتىپ كوپ ۇزاماي سەۋلگە بارىپ، شەت تىلدەرى ينستيتۋتىندا ءبىلىم الدىم. سونىمەن قاتار جۇمىس تا ىستەي بەردىم. بۇل 1999 جىل بولاتىن. باسىندا رەسەيگە تراكتور، ەكسكوۆاتور جونەلتتىك، سول سەكىلدى ۆلاديۆوستوكقا دا ءتۇرلى كولىكتەردى ساتۋعا جىبەردىك. ورىس ءتىلىن جەتىك بىلەتىندىگىم جاقسى ءرول اتقاردى بۇل رەتتە.
وسىلايشا كورەياداعى كىشى جانە ورتا بيزنەستى باسقاراتىن كورپوراسيانىڭ تمد ەلدەرى بويىنشا باس ديرەكتورىنا دەيىن كوتەرىلدىم. ەندى اۋىر تەحنيكالار عانا ەمەس، سۇرانىستا قانداي تاۋار تۇرلەرى بار، سولاردىڭ بارلىعىن تمد-عا تاسىمالداۋمەن شۇعىلداندىق. اراسىندا كوسمەتيكانى دا جەتكىزەمىز.
بىرنەشە كومپانيا تاۋارلارىن تمد ەلدەرىنە نارىقتارىنا جەتكىزۋمەن اينالىستىق. ءبىر كۇنى وسى بيزنەس تۇرلەرى ىشىندە كوسمەتيكا ماعان قاتتى جاقىن ەكەنىن اڭعاردىم. سودان باستاپ ءوزىمنىڭ كوسمەتيكا بيزنەسىمدى اشسام دەگەن مەندە ارمان پايدا بولدى. ينۆەستيسياعا باستاپقى كاپيتال بولسا، بولعانى. مەندە اقشا بولدى. سودان كەيىن بۇل ىسكە جەڭ تۇرە كىرىستىم. مەنىڭ جانىمدا ۇستازىم – ي سان حو دەگەن مىرزا بولدى، بارلىعىن سول كىسى كورسەتىپ وتىردى، ءقازىر دە ول كىسىمەن مەنىمەن بىرگە جۇمىس ىستەيدى. بۇل سالانى جەتىك بىلەتىن قاسىندا ادام بولعاننان كەيىن دە بۇل بيزنەس ءتۇرىن اشۋ ماعان قيىنعا سوقپادى.
مەن شىعاراتىن كوسمەتيكالىق ونىمدەردى انىقتاپ، ونىڭ اتاۋىن جاساپ، وندىرىسكە دايىندايمىن، ال ي سان حو مىرزا ديزاينمەن اينالىسادى، ياعني الگى ءونىمنىڭ قورابى، شىنى قۇتىسى، ول قالاي اسەمدەلۋى كەرەك، بۇل جاعىن سول كىسى شەشەدى.
ءبىز كوسمەتيكا شىعارىپ قانا قويماي، ءوز كومپانياسىنىڭ اتىمەن نەمەسە ءوز برەندىمەن شىعارعىسى كەلگەن كاسىپكەرلەرگە ءونىم دايىنداپ بەرە الامىز. ونى OEM/ODM جۇيەسى دەپ اتايدى. ءبىز وسى جۇيە بويىنشا دا تاپسىرىس قابىلدايمىز. وندايدا شىعارۋشى رەتىندە ءبىزدىڭ كومپانيا اتاۋى جازىلادى.
- فابريكاڭىزدا قانشا جۇمىسشى جۇمىس ىستەيدى؟
- فابريكا دەگەننەن گورى، كومپانيا دەگەن دۇرىس سەكىلدى. ويتكەنى فابريكادان تىس جۇمىس ىستەيتىن جۇمىسشىلارىمىز دا بار. ماسەلەن، لابورانتتار، ديزاينەرلەر، فلاكون جاساۋشىلار، قوراپ جاسايتىندار، ءبىراق ءبىز ولارمەن ارىپتەسە وتىرىپ جۇمىس ىستەيمىز. ءىرى تاپسىرىستار قابىلداعاندا وسى باعىتتاعى كومپانيالارمەن تىزگىن قاعىستىرا جۇمىس ىستەيمىز.
سونىمەن قاتار، تەك قىتايدا دا كوسمەتيكا قوراپتارىن شىعاراتىن شاعىن زاۋىتىمىز بار. كەيدە ادام جەتپەي جاتسا، قوسىمشا جۇمىس كۇشىن جالدايمىز.
- سوندا تەك كوسمەتيكا ءوندىرىسى، سانيتايزەرلەر شىعارۋمەن اينالىساسىزدار ما؟
- قازىرگى شۇعىلدانىپ جاتقان باعىتىمىز وسى. ءبىراق بولاشاقتا بيزنەسىمدى كەڭەيتۋ جوسپاردا بار. سوڭعى كەزدەرى دەن قويىپ جۇرگەن سالانىڭ ءبىرى - مەديسينا. مۇندا قازاقستان ازاماتتارى ەم ىزدەپ، كوپ كەلەدى.
مەن، كەرىسىنشە مۇنداعى مامانداردى قازاقستانعا الىپ بارسام با دەيمىن. وسى ماقساتتا بىرنەشە پروفەسسورلارمەن سويلەسىپ، ءبىر ءىستىڭ باسىن پىسىقتاپ قويدىق. ماسەلەن، پروفەسسور، حيرۋرگ كيم دجون مين ورال قالاسىندا بولدى وتكەندە، زوبقا شالدىققان 4-5 ناۋقاسقا وتا جاسادى، ءبارى تەگىن بولدى. وسى سەكىلدى مەديسينا سالاسىنىڭ كاسىبي بىلىكتى ماماندارىن قازاقستانعا اپارىپ، ءبىر جاڭا ىسكە تۇرەن سالسام با دەيمىن.
ودان سوڭ، تىلگە قاتىستى دا ءبىر جوسپارلارىم بار. ناقتىراق ايتقاندا، جۇڭگو، كورەي تىلدەرىن ۇيرەتەتىن ونلاين باعدارلامالاردى قولعا الىپ جاتىرمىن. قالاي دەگەنمەن دە ىستەيمىن دەگەن نيەت بولسا، شۇكىر، اتقاراتىن شارۋا كوپ.
- كورەيادا ءجۇرىپ تۇرمىسقا شىقتىڭىز با؟
- ءيا، كۇيەۋىم وسى ەلدىڭ ازاماتى، ءۇش بالامىز بار. بيزنەسىمىز وتباسىلىق بولىپ تابىلادى.
- سۇقباتىڭىزعا راقمەت!
اڭگىمەلەسكەن، كامشات ساتييەۆا
