جيىندى اشىپ، جۇرگىزىپ وتىرعان «تۇركىستان وبلىسىنىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى شارىپبەك جامالبەك:
– ۇكىمەتتىك ەمەس ۇيىمدار – مەملەكەتتىڭ تەڭ قۇقىلى سەرىكتەسى. ىشكى ساياسي تۇراقتىلىقتى ساقتاپ قالۋدا مەملەكەتتىك ورگاندارعا ازاماتتىق قوعام ينستيتۋتتارىنىڭ ۇلكەن كومەك كورسەتەتىنىن الەمدىك تاجىريبە دالەلدەپ وتىر. ويتكەنى حالىقپەن ەتەنە ارالاساتىن ۇكىمەتتىك ەمەس ۇيىمدار – قوعامنىڭ ءۇنىن، تۇرعىنداردىڭ مۇڭ-مۇقتاجىن بيلىك ورگاندارىنا جەتكىزە الاتىن ازاماتتىق ينستيتۋت، – دەپ فورۋمنىڭ ماقسات-مىندەتتەرىمەن تانىستىردى.
تۇركىستان وبلىسىنداعى ازاماتتىق قوعامىنىڭ جۇمىستارىن سارالاۋ، رەسپۋبليكالىق ح ازاماتتىق فورۋمعا قاتىساتىن دەلەگاتتاردىڭ ءتىزىمىن بەكىتۋ جانە «تۇركىستان وبلىسىنىڭ ازاماتتىق اليانسى» زتب پرەزيدەنتىن قايتا سايلاۋ ماسەلەلەرى كۇن تارتىبىنە قويىلدى.
العاش بولىپ ءسوز العان تۇركىستان وبلىسىنىڭ اكىمى ءومىرزاق شوكەيەۆ:
– بيىل ەلىمىزدىڭ تاۋەلسىزدىك مەرەكەسىنە 30 جىل تولىپ وتىر. بۇل بەلەستى تۇركىستان ءوڭىرى تولايىم تابىستارمەن قارسى الدى. بۇل جەتىستىككە قوعامنىڭ بارلىق مۇشەلەرىنىڭ ۇلەسى بار.
ۇكىمەتتىك ەمەس ۇيىمدار ءار باعىتتاعى ۇستانىمدارىنا قاراماستان بارلىعى ءبىر ماقسات، ءبىر مۇددە جولىندا ارەكەت ەتۋى ءتيىس. ول – قازاقستاننىڭ تۇراقتىلىعى، ەلدىڭ بارلىق باعىتتا دامۋى. ازاماتتىق قوعام ينستيتۋتتارى مەن مەملەكەتتىك قۇرىلىمداردىڭ بىرلەسكەن ۇيلەسىمدى جۇمىسىنىڭ ناتيجەسىندە ءبىز تاۋەلسىزدىكتىڭ جەتىستىكتەرىن جەتىلدىرە تۇسەرىمىزگە سەنىمدىمىن، – دەپ ازاماتتىق قوعامدى دامىتۋ باعىتىنداعى اتقارىلىپ جاتقان جۇمىستار بارىسىن باياندادى.
جيىندا «شاپاعات» مۇگەدەكتەردىڭ قايىرىمدىلىق قورى قوعامدىق بىرلەستىگىنىڭ ءتوراعاسى شالتان ەركىنباي، «Generation» قوعامدىق بىرلەستىگىنىڭ ءتوراعاسى گولياركو ۆلاديسلاۆ، «تۇركىستان وبلىسى اتا-انالار قاۋىمداستىعى» قوعامدىق بىرلەستىگىنىڭ ءتورايىمى اقبايان جاقىپوۆا، «بەرەكە» قوعامدىق بىرلەستىگىنىڭ جوبا ۇيلەستىرۋشىسى گۇلسىم اندابايەۆا ءوز سوزدەرىندە وڭىردەگى ازاماتتىق قوعامدى قالىپتاستىرۋ باعىتىنداعى وي-پىكىر، ۇسىنىستارىن ورتاعا سالدى.
سونداي-اق فورۋم اياسىندا 2021 جىلعى 22-26 قاراشا كۇندەرى الماتى قالاسىندا وتەتىن رەسپۋبليكالىق ح ازاماتتىق فورۋمعا قاتىساتىن دەلەگاتتاردىڭ قۇرامى انىقتالىپ، وبلىسقا بولىنگەن كۆوتا بويىنشا 5 دەلەگات انىقتالدى.
كۇن تارتىبىندەگى كەلەسى ماسەلە بويىنشا «تۇركىستان وبلىسىنىڭ ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى شارىپبەك جامالبەكتىڭ وبلىستىق قوعامدىق كەڭەستىڭ ءتوراعالىعىنا اۋىسۋىنا بايلانىستى بۇل لاۋازىمعا وبلىستىق ءماسليحات دەپۋتاتى ينارا نامازبايەۆانىڭ كانديداتۋراسى ۇسىنىلىپ، ءبىراۋىزدان قولداۋ تاپتى.
جيىندا «ەڭ ۇزدىك ۇەۇ» بايقاۋىنىڭ جەڭىمپازدارى، الەۋمەتتىك يدەيالار مەن جوبالار جارمەڭكەسىنىڭ ۇزدىكتەرى ماراپاتتالدى. ەلدىڭ ىنتىماعى مەن بىرلىگىن ساقتاۋعا ۇلەس قوسىپ جۇرگەن ءبىرقاتار بەلسەندى ۇكىمەتتىك ەمەس ۇيىم وكىلدەرىنە تۇركىستان وبلىستىق ءماسليحاتىنىڭ حاتشىسى قايرات بالابييەۆتىڭ ماراپاتتارى تابىستالدى.
فورۋم اياسىندا «اۋداندىق اقپاراتتىق-رەسۋرستىق ورتالىقتارىنىڭ جۇمىس ىستەۋ ستاندارتتارى» جانە «جەرگىلىكتى ءوزىن-وزى باسقارۋداعى ازاماتتىق قوعامنىڭ ءرولى»، «الەۋمەتتىك ماسەلەلەردىڭ يننوۆاسيالىق شەشىمدەرى/ازاماتتىق قوعام دامۋىنداعى يننوۆاسيا»، «جەرگىلىكتى بيلىك ورگاندارى مەن ۇەۇ اراسىنداعى ءوزارا ءىس-قيمىل مەحانيزمدەرى» تاقىرىپتارىندا پلەنارلىق سەكسيالار ءوتتى. وتكىر پىكىرلەر ايتىلدى. سەكسيالار بارىسىندا قاتىسۋشىلار تاراپىنان تۇسكەن ۇسىنىستار الداعى ۋاقىتتا قازاقستان رەسپۋبليكاسى اقپارات جانە قوعامدىق دامۋ مينيسترلىگىنە جولداناتىن بولادى.
تاعى وقىڭىز:
