Jiyndy ashyp, júrgizip otyrǵan «Túrkistan oblysynyń Azamattyq Aliansy» zańdy tulǵalar birlestiginiń prezidenti Sháripbek Jamalbek:
– Úkimettik emes uiymdar – memlekettiń teń quqyly seriktesi. Ishki saiasi turaqtylyqty saqtap qalýda memlekettik organdarǵa azamattyq qoǵam institýttarynyń úlken kómek kórsetetinin álemdik tájiribe dáleldep otyr. Óitkeni halyqpen etene aralasatyn úkimettik emes uiymdar – qoǵamnyń únin, turǵyndardyń muń-muqtajyn bilik organdaryna jetkize alatyn azamattyq institýt, – dep forýmnyń maqsat-mindetterimen tanystyrdy.
Alǵash bolyp sóz alǵan Túrkistan oblysynyń ákimi Ómirzaq Shókeev:
– Biyl elimizdiń Táýelsizdik merekesine 30 jyl tolyp otyr. Bul belesti Túrkistan óńiri tolaiym tabystarmen qarsy aldy. Bul jetistikke qoǵamnyń barlyq músheleriniń úlesi bar.
Úkimettik emes uiymdar ár baǵyttaǵy ustanymdaryna qaramastan barlyǵy bir maqsat, bir múdde jolynda áreket etýi tiis. Ol – Qazaqstannyń turaqtylyǵy, eldiń barlyq baǵytta damýy. Azamattyq qoǵam institýttary men memlekettik qurylymdardyń birlesken úilesimdi jumysynyń nátijesinde biz táýelsizdiktiń jetistikterin jetildire túserimizge senimdimin, – dep azamattyq qoǵamdy damytý baǵytyndaǵy atqarylyp jatqan jumystar barysyn baiandady.
Jiynda «Shapaǵat» múgedekterdiń qaiyrymdylyq qory qoǵamdyq birlestiginiń tóraǵasy Shaltan Erkinbai, «Generation» qoǵamdyq birlestiginiń tóraǵasy Goliarko Vladislav, «Túrkistan oblysy ata-analar qaýymdastyǵy» qoǵamdyq birlestiginiń tóraiymy Aqbaian Jaqypova, «Bereke» qoǵamdyq birlestiginiń joba úilestirýshisi Gúlsim Andabaeva óz sózderinde óńirdegi azamattyq qoǵamdy qalyptastyrý baǵytyndaǵy oi-pikir, usynystaryn ortaǵa saldy.
Sondai-aq forým aiasynda 2021 jylǵy 22-26 qarasha kúnderi Almaty qalasynda ótetin respýblikalyq H Azamattyq forýmǵa qatysatyn delegattardyń quramy anyqtalyp, oblysqa bólingen kvota boiynsha 5 delegat anyqtaldy.
Kún tártibindegi kelesi másele boiynsha «Túrkistan oblysynyń Azamattyq aliansy» zańdy tulǵalar birlestiginiń prezidenti Sháripbek Jamalbektiń oblystyq qoǵamdyq keńestiń tóraǵalyǵyna aýysýyna bailanysty bul laýazymǵa oblystyq máslihat depýtaty Inara Namazbaevanyń kandidatýrasy usynylyp, biraýyzdan qoldaý tapty.
Jiynda «Eń úzdik ÚEU» baiqaýynyń jeńimpazdary, áleýmettik ideialar men jobalar jármeńkesiniń úzdikteri marapattaldy. Eldiń yntymaǵy men birligin saqtaýǵa úles qosyp júrgen birqatar belsendi úkimettik emes uiym ókilderine Túrkistan oblystyq máslihatynyń hatshysy Qairat Balabievtiń marapattary tabystaldy.
Taǵy oqyńyz:
