Dalanews.kz توقايەۆتىڭ الگى ءسوزىن جۋىپ-شايعان مۇحامەدي ۇلىنىڭ مالىمدەمەسىن ۇمىتا قويعان جوق.
حابار جۇرگىزۋشىسى ستيۆەن ساكۋر 2020 جىلى نازاربايەۆ 80-گە تولاتىنىن ەسكە سالىپ، ەكس-پرەزيدەنتتىڭ ەگدە تارتقانىن، ونىڭ بيلىك تىزگىنىن كىمگە تابىستارىن بىلگىسى كەلگەن.
بۇل سۇراققا توقايەۆ "ءيا، ءيا. مالايزيادا 92 جاسقا تولعان ماحاتحير موحاماد پرەمەر-مينيستر بولدى عوي.
اشىعىن ايتقاندا، 2020 جىلى نازاربايەۆ پرەزيدەنت سايلاۋىنا تۇسەدى دەپ ويلامايمىن. ول وتە اقىلدى ادام.
مۇمكىن 2020 جىلعى سايلاۋ باسقا كانديداتتارمەن وتەر. سايلاۋعا تۇسەدى دەپ ويلامايمىن. بۇل - مەنىڭ جەكە ويىم. ارينە ءبارى نازاربايەۆتىڭ وزىنە بايلانىستى" دەپ جاۋاپ قاتقان.
...
سەنات سپيكەرىنىڭ مالىمدەمەسى ەلدى ءومىر بويى بيلەيتىندەي كورىنگەن نازاربايەۆتىڭ ءداۋىرى اياقتالىپ قالعانىن اڭعارتقانداي ەدى. ارتىنان توقايەۆتىڭ ءسوزىن تەرىسكە شىعارۋ ناۋقانى باستالىپ، بيلىكتەگى ازاماتتار ەكس-پرەزيدەنتتىڭ اتىنا ماقتاۋ ايتۋدان جارىسقا تۇسكەن.
مىنە، سول الاماننىڭ الدىڭعى لەگىندە ارىستانبەك مۇحامەدي ۇلى ءجۇردى.
سەكسەنگە تاقاپ قالعان نازاربايەۆتىڭ دەنى-قارنى ساۋ، سەرگەك، تىڭ ەكەنىن جەتكىزگەن ارىستانبەك مىرزا ەل تىزگىنىندە ەلباسىدان وزگە باسشىنى ەلەستەتە الماسىن مالىمدەگەن. سول ارقىلى توقايەۆقا قىر كورسەتىپ، سەنات سپيكەرىنىڭ اعات كەتكەنىن استارلاپ ايتقان ەدى.
ونىڭ: «ءبىز شەتەلدە حالىقارالىق كونفەرەنسيالار وتكىزگەندە ءبارى «بىزدە دە وسىنداي ادام پرەزيدەنت بولسا» (نازاربايەۆتى ايتادى، رەد) دەپ جاتادى. ءتىپتى قازىرگى پرەزيدەنتتەردىڭ ءوزى «بۇرىنعى باسشىمىز نازاربايەۆتاي بولعاندا، ەلىمىزدى گۇلدەندىرە الار ەدىك» دەپ وتىرادى. بۇل ءبىز ءۇشىن ۇلكەن باقىت. نۇرسۇلتان نازاربايەۆتاي باسشىمىز بار ءبىز باقىتتىمىز»، – دەگەنىن ەل ۇمىتا قويعان جوق.
زالداعى جۇرت مۇحامەدي ۇلىنىڭ ءسوزىن اياقتاۋعا مۇرشا بەرمەي، ورىندارىنان تۇرىپ، قوشەمەت بىلدىرگەن.
«توقايەۆ؟ ارينە، ءبىز قازاقستاندى نازاربايەۆتىڭ باسقارعانىن قالايمىز. نازاربايەۆتىڭ باسقارۋىنداعى ەل ۇلكەن جەتىستىككە جەتەدى. زالداعىلار دا مەنى قولدايدى دەپ ويلايمىن. بۇل مەنىڭ ويىم»، – دەگەن ەدى سول جىلدارى مادەنيەت مينيسترلىگىنە جەتەكشىلىك ەتكەن ارىستانبەك مىرزا.
جاڭا قازاقستان ورناعاننان كەيىن ەكس-پرەزيدەنتتەن تەرىس اينالعان ازاماتتاردىڭ ىشىندە مۇحامەدي ۇلىنىڭ دا اتى اتالدى. ەل وتىز جىل بويى ءبىر ادامعا ودا ارناپ، قۇلدىق ۇرىپ كەلگەن شەندىلەردىڭ ءبىر كۇندە قۇبىلا سالعانىنا اڭ-تاڭ.
مۇحامەدي ۇلى مادەنيەت مينيسترلىگىن باسقارعان جىلدارى ەكس-پرەزيدەنتتى دارىپتەگەن كينوتۋىندىلار دۇركىن-دۇركىن ءتۇسىرىلدى. ءبىر عانا «جۇلدىزدار توعىسقاندا» كوركەم فيلمىنە مەملەكەت 1 ملرد 200 ملن تەڭگەنى جۇمساپ جىبەردى.
توقايەۆتىڭ تۇسپالى ءدال كەلىپ، ەلباسى ەڭبەك دەمالىسىنا شىققاسىن دا ارىستانبەك مىرزا دامىل تاپپادى.
قاڭتار وقيعاسىنا دەيىن «قاسقا جول» باعدارلاماسىنا سۇحبات بەرگەن مۇحامەدي ۇلى ەلباسىنىڭ اناسى تۋرالى تولعاۋ جازعانىن حابارلاعان.
ەكس-پرەزيدەنتتىڭ اناسى ءالجان نازاربايەۆا تۋرالى تولعانىسىن قاعازعا تۇسىرگەن مۇحامەدي ۇلى مۇنىمەن قويماي كىتاپتى ورىس پەن اعىلشىن تۇرىنە ءتارجىمالاعانىن ەستىگەنبىز. كىتاپ شەتەل وقىرمانىنا جەتىپ، «ەلباسىداي كەمەڭگەردى تاربيەلەپ وسىرگەن ءالجان اپانىڭ رۋحىنا تاعزىم ەتەرىن» ايتقان ەدى.
«ولار (وقىرماندار، رەد.) ءبىزدىڭ تۇڭعىش پرەزيدەنتىمىز نۇرسۇلتان نازاربايەۆتىڭ دا اناسى ءالجان تۋرالى وقيدى. كىتاپتى اشىپ قاراساڭىز، دۇنيەجۇزىنىڭ ۇلى تۇلعالارىنىڭ انالارىنىڭ ىشىندە قازاقتىڭ دا اناسى ءجۇر. مەنىڭ العا قويعان ماقساتىم سول بولدى. "اپىرماي، اقش، فرانسۋز انالارىنىڭ ورتاسىندادا قازاقتىڭ دا اناسى ءجۇر ەكەن عوي" دەپ وقىعان كەزدە ۇيرەنە باستايدى. ال نۇرسۇلتان نازاربايەۆتى ناسيحاتتاۋدىڭ كەرەگى جوق، ونى دۇنيەجۇزىنىڭ بارلىعى بىلەدى.
مەنىڭ ماقساتىم - وسىنداي ۇلكەن تۋىندىلار ارقىلى قازاقتىڭ ءاربىر ازاماتىن دۇنيەجۇزىنە پاش ەتۋ»، – دەپ اعىنان جارىلعان بولاتىن ارىستانبەك مىرزا.
...
بۇعان دەيىن Dalanews.kz ۇلتتىق مۋزەيدىڭ ديرەكتورى ارىستانبەك مۇحامەدي ۇلىنىڭ Antikor-دىڭ نازارىنا ىلىككەنىن حابارلاعان. ارىستانبەك باستاعان مۋزەي باسشىلىعى «التىن ادام» كورمەسىن وتكىزۋگە بولىنگەن قوماقتى قاراجاتتى (146 ملن تەڭگە) قالتاسىنا باستى دەپ كۇدىكتەلىپ وتىر.
ءبىرقاتار اقپارات قۇرالدارىنىڭ ءمالىم ەتكەنىندەي، ۇيىنە ءتىنتۋ جۇرگىزىلگەن كەزدە دەنساۋلىعى كۇرت ناشارلاعان مۇحامەدي ۇلى اۋرۋحانا جەتكىزىلگەن.
اۋرۋحاناعا تۇسپەي تۇرا مۋزەي باسشىسى وزىنە قاتىستى نەگىزگى تەكسەرۋلەرگە اراشا ءتۇسۋدى سۇراپ، پرەزيدەنت توقايەۆتىڭ اتىنا ۇندەۋ جولداعان.
"مەن بار سانالى عۇمىرىمدى مەملەكەت پەن حالىقتى بىرىكتىرىپ وتىراتىن ۇلتتىق يدەيا ىسىنە باعىتتاپ كەلەمىن. قازاق كينوسىنىڭ تىنىسىن اشىپ، الەمدىك وركەنيەتكە باتىل بەت الۋىنا دا ۇلەس قوسۋعا اتسالىسىپ كەلەمىن. قاي سالادا جۇمىس ىستەسەم دە، اۋەلى ۇلت مۇددەسى ءۇشىن تەر توكتىم. مەملەكەت بيۋدجەتىنە قول سالعاندارعا اياۋسىز توسقاۋىل جاساپ كەلەمىن. ارينە، مۇنداي ارەكەتتەرىم كەيبىر ادامدارعا ۇناسىن با؟ كەيبىر ادامدار ءالى كۇنگە دەيىن تىرلىكتەرىمە تۇزاق قۇرىپ كەلەدى"، - دەيدى مۇحامەدي ۇلى.
ول ءبىرقاتار مۋزىكالىق شىعارمانىڭ اۆتورى. سونىڭ ىشىندە، ءوزىنىڭ ايتۋىنشا "استانا" (ءسوزى: ن. ايت ۇلى) جانە "ماقتانىشىم ەلباسى" (ءسوزى: م.قاسىمبەكوۆ) اندەرىنىڭ وزگەلەردەن ورنى بولەك، شوقتىعى بيىك.
سۋرەت: Sputnik قازاقستان سايتىنان
