Dalanews.kz Toqaevtyń álgi sózin jýyp-shaiǵan Muhamediulynyń málimdemesin umyta qoiǵan joq.
Habar júrgizýshisi Stiven Sakýr 2020 jyly Nazarbaev 80-ge tolatynyn eske salyp, eks-prezidenttiń egde tartqanyn, onyń bilik tizginin kimge tabystaryn bilgisi kelgen.
Bul suraqqa Toqaev "Iá, Iá. Malaiziiada 92 jasqa tolǵan Mahathir Mohamad premer-ministr boldy ǵoi.
Ashyǵyn aitqanda, 2020 jyly Nazarbaev prezident sailaýyna túsedi dep oilamaimyn. Ol óte aqyldy adam.
Múmkin 2020 jylǵy sailaý basqa kandidattarmen óter. Sailaýǵa túsedi dep oilamaimyn. Bul - meniń jeke oiym. Árine bári Nazarbaevtyń ózine bailanysty" dep jaýap qatqan.
...
Senat spikeriniń málimdemesi eldi ómir boiy bileitindei kóringen Nazarbaevtyń dáýiri aiaqtalyp qalǵanyn ańǵartqandai edi. Artynan Toqaevtyń sózin teriske shyǵarý naýqany bastalyp, biliktegi azamattar eks-prezidenttiń atyna maqtaý aitýdan jarysqa túsken.
Mine, sol alamannyń aldyńǵy leginde Arystanbek Muhamediuly júrdi.
Seksenge taqap qalǵan Nazarbaevtyń deni-qarny saý, sergek, tyń ekenin jetkizgen Arystanbek myrza el tizgininde Elbasydan ózge basshyny elestete almasyn málimdegen. Sol arqyly Toqaevqa qyr kórsetip, Senat spikeriniń aǵat ketkenin astarlap aitqan edi.
Onyń: «Biz shetelde halyqaralyq konferentsiialar ótkizgende bári «bizde de osyndai adam prezident bolsa» (Nazarbaevty aitady, red) dep jatady. Tipti qazirgi prezidentterdiń ózi «burynǵy basshymyz Nazarbaevtai bolǵanda, elimizdi gúldendire alar edik» dep otyrady. Bul biz úshin úlken baqyt. Nursultan Nazarbaevtai basshymyz bar biz baqyttymyz», – degenin el umyta qoiǵan joq.
Zaldaǵy jurt Muhamediulynyń sózin aiaqtaýǵa mursha bermei, oryndarynan turyp, qoshemet bildirgen.
«Toqaev? Árine, biz Qazaqstandy Nazarbaevtyń basqarǵanyn qalaimyz. Nazarbaevtyń basqarýyndaǵy el úlken jetistikke jetedi. Zaldaǵylar da meni qoldaidy dep oilaimyn. Bul meniń oiym», – degen edi sol jyldary Mádeniet ministrligine jetekshilik etken Arystanbek myrza.
Jańa Qazaqstan ornaǵannan keiin eks-prezidentten teris ainalǵan azamattardyń ishinde Muhamediulynyń da aty ataldy. El otyz jyl boiy bir adamǵa oda arnap, quldyq uryp kelgen shendilerdiń bir kúnde qubyla salǵanyna ań-tań.
Muhamediuly Mádeniet ministrligin basqarǵan jyldary eks-prezidentti dáriptegen kinotýyndylar dúrkin-dúrkin túsirildi. Bir ǵana «Juldyzdar toǵysqanda» kórkem filmine memleket 1 mlrd 200 mln teńgeni jumsap jiberdi.
Toqaevtyń tuspaly dál kelip, Elbasy eńbek demalysyna shyqqasyn da Arystanbek myrza damyl tappady.
Qańtar oqiǵasyna deiin «Qasqa jol» baǵdarlamasyna suhbat bergen Muhamediuly Elbasynyń anasy týraly tolǵaý jazǵanyn habarlaǵan.
Eks-prezidenttiń anasy Áljan Nazarbaeva týraly tolǵanysyn qaǵazǵa túsirgen Muhamediuly munymen qoimai kitapty orys pen aǵylshyn túrine tárjimalaǵanyn estigenbiz. Kitap shetel oqyrmanyna jetip, «Elbasydai kemeńgerdi tárbielep ósirgen Áljan apanyń rýhyna taǵzym eterin» aitqan edi.
«Olar (oqyrmandar, red.) bizdiń Tuńǵysh Prezidentimiz Nursultan Nazarbaevtyń da anasy Áljan týraly oqidy. Kitapty ashyp qarasańyz, dúniejúziniń uly tulǵalarynyń analarynyń ishinde qazaqtyń da anasy júr. Meniń alǵa qoiǵan maqsatym sol boldy. "Apyrmai, AQSh, frantsýz analarynyń ortasyndada qazaqtyń da anasy júr eken ǵoi" dep oqyǵan kezde úirene bastaidy. Al Nursultan Nazarbaevty nasihattaýdyń keregi joq, ony dúniejúziniń barlyǵy biledi.
Meniń maqsatym - osyndai úlken týyndylar arqyly qazaqtyń árbir azamatyn dúniejúzine pash etý», – dep aǵynan jarylǵan bolatyn Arystanbek myrza.
...
Buǵan deiin Dalanews.kz Ulttyq mýzeidiń direktory Arystanbek Muhamediulynyń Antikor-dyń nazaryna ilikkenin habarlaǵan. Arystanbek bastaǵan mýzei basshylyǵy «Altyn adam» kórmesin ótkizýge bólingen qomaqty qarajatty (146 mln teńge) qaltasyna basty dep kúdiktelip otyr.
Birqatar aqparat quraldarynyń málim etkenindei, úiine tintý júrgizilgen kezde densaýlyǵy kúrt nasharlaǵan Muhamediuly aýrýhana jetkizilgen.
Aýrýhanaǵa túspei tura mýzei basshysy ózine qatysty negizgi tekserýlerge arasha túsýdi surap, prezident Toqaevtyń atyna úndeý joldaǵan.
"Men bar sanaly ǵumyrymdy memleket pen halyqty biriktirip otyratyn ulttyq ideia isine baǵyttap kelemin. Qazaq kinosynyń tynysyn ashyp, álemdik órkenietke batyl bet alýyna da úles qosýǵa atsalysyp kelemin. Qai salada jumys istesem de, áýeli ult múddesi úshin ter tóktim. Memleket biýdjetine qol salǵandarǵa aiaýsyz tosqaýyl jasap kelemin. Árine, mundai áreketterim keibir adamdarǵa unasyn ba? Keibir adamdar áli kúnge deiin tirlikterime tuzaq quryp keledi", - deidi Muhamediuly.
Ol birqatar mýzykalyq shyǵarmanyń avtory. Sonyń ishinde, óziniń aitýynsha "Astana" (sózi: N. Aituly) jáne "Maqtanyshym Elbasy" (sózi: M.Qasymbekov) ánderiniń ózgelerden orny bólek, shoqtyǵy biik.
Sýret: Sputnik Qazaqstan saitynan
