ايمان 1 توپتاعى مۇمكىندىگى شەكتەۋلى جان. اقتوبە قالاسى تۇرعىنىنىڭ ءومىرى قولارباعا تاڭىلعانىمەن قالا تىرشىلىگىندە وتە بەلسەندى. جۇمىس تا جاسايدى، قالاداعى بارلىق ءىس شارالاردان قالمايدى. كولىك تە جۇرگىزەدى، تۇرمىسقا شىعىپ، بالا دا سۇيگەن. ەشتەڭەگە قاراماستان تولىققاندى ءومىر ءسۇرۋدى ماقسات ەتكەن، سول ماقساتىنا جەتىپ تە كەلە جاتقان كەيىپكەرىمىزدىڭ ءومىر جولى Dalanews.kz وقىرماندارىنا ۇلگى بولسىن دەگەن نيەتپەن ارنايى سۇحبات العان ەدىك. ەندى سوعان نازار اۋدارساڭىزدار.
– مۇمكىندىگىڭىزشە جۇمىس جاساپ، وسى ءبىر قوعامنىڭ دامۋى جولىندا قىزمەت ەتسەم، باسقالارمەن تەڭ مۇمكىندىگىم بار ەكەنىن دالەلدەسەم دەگەن نيەتىڭىز كوڭىل قۋانتادى. ءقازىر قايدا قىزمەت ىستەپ جاتىرسىز؟ جالپى مۇمكىندىگى شەكتەۋلى جاندارعا جۇمىس بارىسىندا جاعداي جاسالعان با؟
– اقتوبە قالاسىنداعى «ازاماتتارعا ارنالعان ۇكىمەت» مەملەكەتتىك كورپوراسياسى» كوممەرسيالىق ەمەس اكسيونەرلىك قوعامىنىڭ اقتوبە وبلىسى بويىنشا فيليالى №2 ءبولىمىنىڭ مامانىمىن. ۆيدەوقوڭىراۋلارعا جاۋاپ بەرىپ وتىرامىن. ءقازىر بۇل سالادا جۇمىس ىستەپ كەلە جاتقانىما ون جىلدان استى.
ونىڭ ىشىندە 2014-2016 جىلدارى قىزىلوردا وبلىسى، ارال قالاسىنىڭ حالىققا قىزمەت كورسەتۋ ورتالىعىندا ىستەدىم. جۇمىس ىستەگىم كەلىپ ءوزىم ارال اۋداندىق حالىققا قىزمەت كورسەتۋ ورتالىعىنىڭ باسشىسى اتىنا جۇمىس سۇراپ ءوتىنىش جازدىم. سوسىن ول كىسى جۇمىسقا قابىلداپ ەكى جىلداي ىستەدىم. ول كەزدەردە مۇمكنىدىگى شەكتەۋلى جانداردى ەندى ەندى جۇمىسقا تارتىپ جاتقان كەزدەر بولاتىن.
كەيىن اقتوبە قالاسىنا قونىس اۋدارۋىما وراي وسى اقتوبە قالاسىنىڭ حقكو-نىڭ №2 بولىمىنە اۋىستىم. ءقازىر وسى جەردە ەڭبەك ەتىپ كەلەمىن. بۇل جەردە مەنەن باسقا دا I، II جانە III توپتاعى مۇمكىندىگى شەكتەۋلى جاندار جۇمىس ىستەيدى. وسىنداي جەردە جۇمىس ىستەۋىمە مۇمكىندىك تۋدىرىپ بەرگەنى ءۇشىن مەملەكەتكە العىسىم زور.
مۇمكىندىگى شەكتەۋلى جاندى شەتتەتپەي جۇمىسقا تارتۋ، ولارعا ۇلكەن ءۇمىت سىيلايدى. باسقالارمەن تەڭ ەكەنىن ۇقتىرادى. جۇمىس مۇمكىندىگى شەكتەۋلى جاندى ىنتالاندىرادى. حالىققا قىزمەت ەتۋ، كوپشىلىكپەن ارالاسۋ دا ءبىزدى ىنتالاندىرادى. جۇمىس ورنىمدا دا بارلىق جاعداي جاسالعان. مۇمكىندىگى شەكتەۋلى جانداردىڭ ەمىن-ەركىن قوزعالىسىنا، ءوزىن باسقالارمەن تەڭ ۇستاۋىنا كوپ قولايلى جاعداي جاسالعان. كىرە بەرىستەردە اربامەن وتۋگە ىڭعايلى وتكەلدەر ورنالاستىرىلعان. ءبىزدىڭ جۇمىس ورنىمىز ەكىنشى قاباتتا ورنالاسقاندىقتان جوعارعى قاباتقا ليفتمەن شىعۋعا مۇمكىندىك جاسالعان. ياعني، ليفت ەكىنشى قاباتقا ءبىز ءۇشىن ارنايى توقتايدى. ءجۇرىپ تۇرۋىمىزعا، عيمارات ىشىندەگى قوزعالىسىمىزعا ەشقانداي كەدەرگى جوق.
جۇمىس ورنىمىزدا ءبىرىنشى توپتاعى مۇگەدەكتەگى بار مەن عانا. تاعى ءبىر بولىمدە مۇمكىندىگى شەكتەۋلى ەكى ادام قىزمەت ىستەيدى، ولار ەكىنشى جانە ءۇشىنشى توپتاعى مۇگەدەكتەر.
سونداي-اق، حقكو-نىڭ №3 بولىمىندە دە قولاربامەن جۇرەتىن ءبىر جىگىت بار. ءبىر سوزبەن ايتقاندا حقكو-ى كوپتەگەن مۇمكىندىگى شەكتەۋلى جانداردى جۇمىسپەن قامتىپ وتىر. بۇل ولار ءۇشىن بەرىلگەن ۇلكەن مۇمكىندىك. ءوز باسىم وسىنداي قىزمەت ەتەتىنىمدى ماقتانىش ەتەمىن. نەگىزى وسى قىزمەتكە كەلگەنگە دەيىن دە بوس جاتقان كۇنىم بولعان ەمەس. اربامەن ءجۇرىپ-اق دۇكەن اشىپ العانمىن. ارالدا ءۇيىمىزدىڭ الدىندا جەكە دۇكەن اشىپ، سونىڭ جۇمىسىن جۇرگىزدىم، ساۋدامەن اينالىستىم. ەشقاشان باسقالاردان ءوزىمدى كەم ساناپ، مويىعان ەمەسپىن. قولىم بوس بولعان كەزى بولعان جوق.
نيەت بولسا ەكى قولعا ءبىر جۇمىس تابىلادى. تەك جالقاۋلانباي ەڭبەك ەتە بەرۋ كەرەك. مەن جۇمىس ىستەگەن سايىن قاناتتانامىن. تۇرمىسقا شىعۋ كەزىندە دە ءوزىمدى باسقالاردان كەم سەزىنبەدىم. سول نيەتىم تۇرمىسقا شىعۋىما ىقپال ەتتى دەپ ويلايمىن.
بالا ءسۇيۋ كەزىندە دە دارىگەرلەر كوپ قورقىتقانىمەن ءوزىم بىربەتكەيلەنىپ، بوسانام دەپ وتىرىپ الدىم. قولاربامەن جۇرسەم دە ۇيدە تىنىم تاۋىپ وتىرمايمىن. ەشقاشان ۇيدە ارەكەتسىز، تىرلىكسىز وتىرىپ كورمەپپىن. بارلىق تىرلىگىن ءۇيدىڭ ءوزىم اتقارامىن. نەگىزى قوعام مۇمكىندىگى شەكتەۋلى جانداردىڭ ەمىن-ەركىن قوزعالۋىنا جاعداي جاساسا ولاردىڭ ءوزىن باسقالاردان كەم ساناۋى كەمي بەرەدى. ولار قاناتتانىپ، وزدەرىن قوعامنىڭ ءبىر مۇشەسى رەتىندە سەزىنىپ، دامي تۇسەدى. ول ءوز باسىمنان وتكەن، دالەلدەنگەن جاعداي.
– سوڭعى كەزدەرى مۇمكىندىگى شەكتەۋلى جاندارعا مەملەكەت تاراپىنان كوپتەگەن جاعدايلار جاسالىپ، جۇزەگە اسىرىلىپ جاتىر. دەگەنمەن ءسىز قانداي ماسەلەلەردىڭ شەشىلگەنىن قالار ەدىڭىز؟
– مۇمكىندىگى شەكتەۋلى جان رەتىندە ءۇيدىڭ كەزەگىندە تۇرعانىمىزعا تالاي جىل بولدى. الايدا كەزەك وتە جاي جىلجيدى. مۇمكىندىگىمىز شەكتەۋلى بولعاندىقتان قىرىپ جۇمىس ىستەي المايمىز بىرنەشە جەردە. ءوز بەتىمىزشە ءۇي الۋ مۇمكىندىگىمىز وتە تومەن. ءبىز تەك مەملەكەتتىڭ كومەگىمەن عانا ءۇي الا الامىز. سوندىقتان مەملەكەت تاراپىنان ءۇي كەزەگىن جىلجىتۋعا كوپ كوڭىل بولگەنىن قالايمىز.
ءقازىر ءۇي كەزەگىنە تۇرعاندار باسپانالارىن 15-20 جىلداپ كۇتەدى. تاعدىردىڭ تاۋقىمەتى ازداي ءۇي كەزەگىن ونداعان جىل كۇتۋ دەگەن ازاپ قوي. ەڭ بولماسا ارزان پايىزبەن ءۇيدى 5-6 جىلدا الاتىن مۇمكىندىك جاسالسا ەكەن. جالپى زاڭ جۇزىندە وسىنى بەكىتپەسەك، تۇرعىن ءۇي كەزەگىن جىلداپ كۇتۋ قالىپتى جاعدايعا اينالىپ بارادى. قانشاما ءۇي سالىنىپ جاتىر. ءبىراق «كوكتەن كيىز جاۋسا دا، كەدەيگە ۇلتاراق بۇيىرمايدىنىڭ» كەبىمەن كەزەگىمىزدى جىلداپ كۇتەمىز.
مۇمكىندىگى شەكتەۋلى جانداردىڭ ىشىندە دە جۇمىس ىستەۋگە قابىلەتتىلەرى، جۇمىس ىستەۋگە مۇلدەم قابىلەتتەرى جوقتارى دا بار. جۇمىس ىستەۋگە قابىلەتسىزدەرى امال جوق زەينەتاقىنى، جاردەماقىنى كۇتىپ وتىرادى. سوندىقتان تەك مۇمكىندىگى شەكتەۋلى جاندارعا ارنالعان باعدارلاما اشىلىپ، تۇرعىن ءۇي كەشەندەرى سالىنۋى كەرەك دەپ ويلايمىن. ول ۇيلەردە قولارباعا تاڭىلعان جانداردىڭ ەمىن-ەركىن قوزعالىسىنا جاعداي جاسالسا ەكەن. بۇگىندە ەلىمىزدە سالىنىپ جاتقان تۇرعىن ۇيلەردىڭ باعاسى تىم قىمبات. ونىڭ مۇمكىندىگى شەكتەۋلى جانداردىڭ قالتاسى كوتەرمەيدى. جۇمىس ىستەپ جالاقى الىپ جۇرگەن ءبىز سەكىلدى جاندار تولەم قابىلەتىن دالەلدەپ بەرە الادى. ال جۇمىس ىستەمەيتىندەر تولەم قابىلەتىن دالەلدەي المايدى.
دەگەنمەن «وتاۋ»، «ناۋرىز» دەگەن تۇرعىن ۇيگە ارنالعان باعدارلامالاردىڭ پايىزى جوعارى. مۇمكىندىگى شەكتەۋلى جاندارعا 7 پايىزبەن 15-20 جىلعا بەرىلگەن كۇننىڭ وزىندە ءبىزدىڭ اي سايىنعا تولەمىمىز 80 000-100 مىڭ تەڭگەگە شىعىپ كەتەدى. ءبىز تولەم قابىلەتىمىزدى دالەلدەي العانىمىزبەن، اي سايىنعى تولەمى قالتامىزعا اۋىرلىق ەتەدى. مەن «باقىتتى وتباسى» باعدارلاماسىمەن ءۇيدى العاننىڭ وزىندە 2 بولمەلى ءۇي السام 85 000-100 000 تەڭگە ارالىعىندا شىعىپ كەتەدى ەكەن. ال ەندى اكىمدىك ارقىلى تەگىن ءۇيدى الامىز دەپ كۇتىپ وتىرعانداي ءومىرىمىزدىڭ سوڭىنا جەتەتىن بولدىق. وسى ءبىر وزەكتى ماسەلەنى وڭتايلاندىرىپ بەرسە جاقسى بولار ەدى.
مەن كۇندەلىكتى جۇمىس ىستەيتىن بولعاندىقتان قالانىڭ ىشىندە قوزعالىسىم كوپ، ءبىراق قالا ىشىندەگى پاندۋستاردىڭ ساپاسى وتە تومەن. ستاديونعا بارساق تا، كافەگە، تەاترعا، مۇراجايلارعا باس سۇقسام دا كىرىپ شىعۋىم وتە قيىن. قالا ىشىندەگى كەيبىر ۇيلەردىڭ، عيماراتتاردىڭ، كەڭسەلەردىڭ پاندۋستارىنىڭ جاعدايىنا كوڭىلىم تولمايدى. پاندۋسپەن قامتاماسىز ەتتىك دەي بەرمەي، ونىڭ ساپاسىنا دا كوڭىل ءبولۋ كەرەك.
ءتىپتى، كەيبىر ۇيلەردە پاندۋس جوق مۇلدەم. بارارىڭدى بارىپ الىپ، ءۇيدىڭ سىرتىنان قايتۋعا ءماجبۇرسىڭ. سوڭعى جىلدارداعى مۇمكىندىگى شەكتەۋلى جاندارعا جاسالعان اۋىز تولتىرىپ ايتارلىق ءبىر جاعداي ينۆوتاكسيلەر. تەك وسىلاردىڭ سانى كوبەيسە ەكەن دەگەن تىلەگىمىز بار. ارنايى كولىكتەر قالا بويىنشا ازداۋ بولىپ تۇر.
كوپ جاعدايدا قولجەتىمدى بولماعاندىقتان ۇيدەن شىعا الماي قالىپ جاتامىز. قازىرگى تاڭدا سالىستىرمالى تۇردە ايتساق مەملەكەت تاراپىنان مۇمكىندىگى شەكتەۋلى جاندارعا قامقورلىق وتە جاقسى جولعا قويىلعان دەپ سانايمىن. بۇرىن مۇنداي مۇمكىندىكتەر جوق ەدى. قارجىلىق قولداۋ دا بار. سونى پايدالانىپ، مەملەكەتتەن تيەسىلى جاردەماقىلاردى الىپ وتىرامىز. جىل سايىن ونىڭ كولىمە ارتىپ كەلەدى. مۇگەدەكتەر كۇنىنە وراي جەرگىلىكتى بيۋدجەتتەن بولىنەتىن كومەك قاراجاتىمىز دا بار. مەملەكەت تاراپىنان گيگيەنالىق تەگىن زاتتار بەرىلىپ تۇرادى. بۇل دا بولسا بىزگە ۇلكەن كومەك. تاكسي شاقىرساق قولاربالارىمىز سىيماي قالاتىندىقتان ارنايى كولىكپەن جۇرەمىز. وسى قولاربادا وتىرعاندارعا ارنالعان كولىك تاسىمالى جەتەر جەرىمىزگە ۇنەمى جەتكىزىپ وتىرعانىنا ريزامىن. الداعى ۋاقىتتا وسى «ينۆاتاكسيلەردىڭ» سانىن كوبەيتىپ، ۇيىندە وتىرىپ قالعان مۇمكىندىگى شەكتەۋلى جانداردى مادەني ورىندارعا، حالىقپەن ارالاسۋعا الىپ شىعۋدىڭ جولدارى قاراستىرىلسا نۇر ۇستىنە نۇر بولار ەدى. مۇمكىندىگى شەكتەۋلى جان ۇيدە وتىرىپ قالماۋ كەرەك. ولاردى قوعاممەن ارالاسۋ العا جەتەلەيدى.
– اقتوبە قالاسىندا مۇمكىندىگى شەكتەۋلى جاندارعا قانداي جاعداي جاسالعان؟ قالا ينكليۋزيۆتى جاندارعا قولايلى ما؟
– جالپى، سوڭعى جىلدارى ينكليۋزيۆتى قوعام قۇرۋعا تالپىنىس بايقالادى. ينكليۋزيۆتى ءبىلىم سەكىلدى باعدارلامالار سونىڭ ايعاعى. پاندۋستار كوبەيدى. مۇمكىندىگى شەكتەۋلى جاندارعا ارنالعان نەسيەلەر دە كوبەيىپ كەلەدى. بۇنىڭ ءبارى قولداۋ.
دەگەنمەن قالا مۇمكىندىگى شەكتەۋلى جانداردىڭ ءجۇرىپ-تۇرۋىنا تولىق قولايلى دەپ ايتا الماس ەدىم. جوعارىدا اتاپ وتكەندەي ماسەلەلەر كەزدەسەدى. ينۆوتاكسي قاراستىرىلعان. مۇمكىندىگى شەكتەۋلى جاندارعا ارنالعان قوعامدىق بىرلەستىكتەر ءتۇرلى ءىس-شارالار ۇيىمداستىرىپ جاتادى. مۇنداي شارالاردىڭ ماڭىزى زور. بىر-بىرىمىزبەن ارالاسىپ، كوڭىلىمىز ءبار ءسات ءبولىنىپ، كوڭىل-كۇيىمىز كوتەرىلىپ قالىپ جاتادى. الايدا كەيبىر مادەني دەمالىس ورىندارىنا، وتباسىلىق كافە، اكۆاپاركتەرگە تەگىن كىرە المايمىز. ەڭ بولماسا جەڭىلدىك جوق. كەيبىر كونسەرتتەرگە، ونەر ورتالىقتارىنا كىرگەنمەن قالاداعى جالپى ءىس-شارالار قاتىستىرمايدى.
ماسەلەن مەن مادەني شارالاردى جاقسى كورەمىن. ءتىپتى «ەكى جۇلدىز» دەگەن شارادا ءمادينا سادۋاقاسوۆامەن قوسىلىپ ءان دە ايتقانمىن. شارانىڭ ماقساتى انشىلەر مەن مۇمكىندىگى شەكتەۋلى جانداردى دۋەت ەتىپ ءان ايتقىزۋ بولاتىن. سول شارادا ءمادينا ساۋدۋاقاسوۆامەن ساحناعا قاتىر شىعىپ توبەم كوككە جەتكەندەي بولعان ەدى... سوندىقتان مۇمكىندىگىنشە مادەني شارالاردى تاماشالاعىم كەلەدى. مۇمكىندىگى شەكتەۋلى جاندار ءۇشىن قيمىل-قوزعالىس ماڭىزدى.
وسى ورايدا سپورت كەشەندەرى قولجەتىمدى بولسا ەكەن. باعاسى ءبىزدىڭ قالتانى كوتەرمەيدى. ەڭ بولماسا جەڭىلدىك جاساسا ەكەن. ءبىز ەلۋ پايىز بولسا دا جەڭىلدىكپەن كىرۋگە جاعداي جاسالسا جاقسى بولار ەدى.
جالپى، قالاداعى مۇمكىندىگى شەكتەۋلى جاندار ءبىر بىرىمىزبەن ءجيى ارالاسىپ تۇرامىز. قالا بويىنشا مۇمكىندىگى شەكتەۋلى ازاماتتاردى قورعاۋ جانە قولداۋ ءتورايىمى قۇرالاي بازارباي قىزى بار مۇمكىندىكتى جاساپ كەزدەسۋلەر ۇيىمداستىرىپ تۇرادى. قالادا مۇمكىندىگى شەكتەۋلى جاندارعا ارنالعان قوعامدىق بىرلەستىكتەر دە كوپ. ولار ءبىزدىڭ مۇددەمىزدى قورعاپ، ماسەلەلەرىمىزدى ءبىزدىڭ تاراپقا ءتيىمدى شەشىپ بەرۋدە. بۇل ءبىز ءۇشىن ۇلكەن كومەك.
مۇمكىندىگى شەكتەۋلى جاندار كوپ جاعدايدا وزدەرىنىڭ قۇقىقتارىن قورعاي الماي قالىپ جاتادى. قوعامدىق بىرلەستىكتەردىڭ مۇنداي ماسەلەلەرگە دەر كەزىندە قۇلاق ءتۇرىپ، شەشىپ وتىراتىنىنا ريزامىن. جالپى جىل وتكەن سايىن ەلىمىزدە مۇمكىندىگى شەكتەۋلى جانداردىڭ قۇقىعىن قورعاۋعا جەتە كوڭىل ءبولىنىپ، قوعامدىق ورىنداردا بارىنشا جاعداي جاسالىپ كەلە جاتقانى قۋانتادى. بۇل – ەلىمىزدە قوعامنىڭ ءاربىر مۇشەسىنىڭ جايلى ءومىر سۇرۋىنە جاعداي جاسالىپ جاتقانىن اڭعارتادى. وسى تۇرعىدان كەلگەندە ءبىزدىڭ قوعامداعى قۇقىعىمىز دا ءوز دەڭگەيىندە قورعالىپ جاتىر دەپ ايتا الامىز.
جالپى، ءوز باسىم تاعدىرلاس جاندارعا قۇرمەتىم جوعارى. مۇمكىندىگى شەكتەۋلى بولىپ ءومىر ءسۇرۋ وڭاي ەمەس. الايدا مەن تانيتىن تاعدىرلاس جانداردىڭ بارلىعى ەڭبەكقور، جىگەرلى، قايراتتى ەكەن. قوعامىمىزدا اياق-قولى بالعاداي، ون ەكى مۇشەسى ساۋ بولسا دا ماڭدايى تەرلەپ جۇمىس ىستەۋگە قينالاتىن، ءبىراق ءوزى ءومىر ءسۇرىپ وتىرعان قوعامىن جامانداۋدان جالىقپايتىن «ديۆان باتىر» جاندار جەتەرلىك.
ال مەن تانيتىن مۇمكىندىگى شەكتەۋلى جانداردىڭ بارلىعى بىرەۋگە سالماعىن سالعىسى كەلمەي، تىربانىپ ەڭبەك ەتۋدە. قوعامىمىزدا بالالارىنىڭ جاردەماقىسىنا كۇن كورىپ وتىرعان وتباسىلار دا بار. مەملەكەت تاراپىنان تولەنەتىن بالالارىنىڭ جاردەماقىسىنا يەك ارتىپ، ءوزى ەڭبەك ەتكىسى كەلمەيتىن ەر ازاماتتارىمىز دا كەزدەسەدى. بۇل شىنىمەن ۇيات نارسە عوي. وسى تۇرعىدان كەلگەندە قوعامنىڭ وسىنداي ماسىلدىققا بەيىم بولىگىنە كەرەعار، قولارباعا تاڭىلسا دا قوعامنىڭ باسقا تولىققاندى مۇشەلەرىندەي، كۇنى ءتۇنى تىنباي ەڭبەك ەتىپ، ەلگە قىزمەت جاساپ، ءتىپتى سونداي مۇمكىندىگى شەكتەۋلى ەكەنىنە قاراماستان ومىرگە ءسابي اكەلىپ، قوعامدىق جۇمىستارعا دا ارالاسىپ، ءوز ءومىرىن دە، قوعام ءومىرىن دە وزگەرتۋگە تىرىسىپ جۇرگەن جاندار قۇرمەتكە لايىق دەر ەدىم.
– بۇل جاعدايعا قالاي ۇشىرادىڭىز؟
– 1993 جىلى 1 مامىر كۇنى قىزىلوردا وبلىسى، ارال اۋدانىندا ورتالىق الاڭدا قۇرىلعان التىباقان ۇستىمە قۇلاپ كەتىپ قولارباعا تاڭىلدىم. سودان بەرى 1 توپتاعى مۇگەدەكپىن.
– وتباسىڭىز تۋرالى ايتا كەتسەڭىز...
– بىلتىر ناۋرىز ايىندا وسكەمەننىڭ ورتا ءجۇزدىڭ بەيبىت ەسىمدى ازاماتىنا تۇرمىسقا شىقتىم. اللاعا شۇكىر ءتىل تابىسىپ، شات-شادىمان ءومىر ءسۇرىپ جاتىرمىز. قاراقات ەسىمدى قىزىم بار. «جالعىزدىق قۇدايعا عانا جاراسقان» دەيمىز عوي. ۋاقىت وتە جالعىزدىعىمدى سەزىنە باستاعان سوڭ وتباسىن قۇرۋعا دا شەشىم قابىلدادىم. سوندىقتان ءقازىر باقىتتىمىن دەپ ايتا الام.
كەيبىرەۋلەر ايتىپ «نە دەگەن مىقتىسىز، مىنا جاعدايىڭىزعا قاراماي جۇمىس تا ىستەپ، ومىرگە بالا اكەلىپ، تۇرمىس قۇرىپ» دەپ جاتادى. مەن ءوزىمدى ونداي سەزىنبەيمىن. تاعدىردىڭ باسىما سالعانى سول بولسا قابىلدادىم. ءبىراق قولىمنان كەلگەنىنشە تىرىسىپ كورەيىن دەدىم. ءبارى ءوز ورنىمەن بولىپ جاتىر. ەڭ باستىسى نيەت بولسا، قولاربا ەشتەڭەگە كەدەرگى ەمەس ەكەن.
– ءسىزدى جابىرقاتاتىن نە جاعداي؟
– كوپشىلىكتىڭ اياپ قاراۋى دەر ەدىم. باسقالاردان ەش كەم ەمەسپىز. ەڭبەك ەتىپ، ءوزىمىزدى-وزىمىز اسىراپ، ومىرگە ءسابي اكەلىپ، وتباسىن دا قۇرىپ جاتىرمىز. ءبىراق سوندا دا بىرەۋلەر كەمسىتىپ قاراپ جاتادى. نەمەسە بىردەڭەمەن اينالىسايىن دەسەڭ سەنبەيدى. ونىڭ ءبارىن ءتۇسىنىپ تۇرىپ، دالەدەۋ قيىن. ودان سايىن جاسىتادى ادامدى.
نەگىزى كەمىتپەي، مۇسىركەپ قاراماي، قولداپ وتىرسا ءبىز بۇدان دا كوپ جەتىستىككە جەتەر ەدىك. كوپ جاعدايدا قولىنان كەلەر مە ەكەن دەپ كۇدىكپەن قاراپ تۇراتىنى جانعا باتادى. وسى ورايدا ايتارىم مۇمكىندىگى شەكتەۋلى جاندار وتە مىقتى بولىپ كەلەدى.
قوعامعا ءوزىن دالەلدەيمىن دەپ ءجۇرىپ ۇنەمى تىرمىسادى. كوپ ەڭبەكتەنەدى. ولار مۇمكىندىگى شەكتەۋلى دەگەن سوزبەن شەكتەلىپ قالعىسى كەلمەيدى. مۇمكىندىگىنىڭ زور ەكەنىن كورسەتۋگە تىرىسادى. سوندىقتان كوپ جاعدايدا اينالامنان تەك جىلى ءسوز كۇتەم، تۋىستارىم قولداپ، جىلى سوزدەرىن ارناسا قاناتتانىپ كەتەم. تاۋ قوپاراتىنداي كۇش پايدا بولادى. مۇنداي جاعدايدا ءبىزدى كىم مۇمكىندىگىمىزدى شەكتەۋلى دەي الادى؟ سوندىقتان ءاربىر جاننان وزىمەن تەڭ دارەجەدە سويلەسسە ەكەن دەپ تۇرامىن. ماسەلەن قىزدى بولامىن دەپ ۇمتىلعاندا «دۇرىس ول ءومىر سۇرۋگە تالپىنتادى، بالا دەگەن اناعا كۇش بەرەدى» دەپ قولداعاندار دا، كەرسىنشە «ءوزىڭ ماسىلسىڭ تۋىستارىڭا، ەندى بالاڭمەن قوسىلىپ ماسىل بولماقسىڭ با» دەپ كۇندەگەندەر دە بولدى.
قاتتى قينالدىم. ەشكىمگە سالماعىمدى سالماۋعا تىرىسىپ كەلەمىن. بىرىنە قۋانىپ، قاناتتانىپ جۇرسەم، ەكىنشى ءبىر سوزدەرى جانىمدى قۇلازىتىپ جىبەرەتىن. سوندىقتان جان جاعىما ايتارىم، مۇمكىندىگى شەكتەۋلى جاقىندارىڭ بولسا ەشتەڭە ءبولىپ بەرمە، ساداقا دا تاستاما. جاي عانا قولدا، قالعانىن ولار وزدەرى جاساپ الادى. كوپ جاعدايدا مۇمكىندىگى شەكتەۋلى جانداردى اينالاسىنىڭ ءسوزى مەن كوزى جاسىتىپ تاستايدى. وسى نارسەنى ەسكەرتىپ، وتىنگىم كەلەدى. اينالامدا مۇمكىندىگى شەكتەۋلى بولسا دا، ون ەكى مۇشەسى ساۋ ادامنان ارتىق تىرلىك جاساپ جۇرگەندەر جەتەرلىك. وسىنى قوعامىمىز تۇسىنسە ەكەن.
سۇحباتتاسقان قۋانىش ەرمەكوۆا
