شىمكەنت پوليسيا دەپارتامەنتى نۇراي سەرىكبايدىڭ ولىمىنە قاتىستى ءىس بويىنشا مالىمدەمە جاسادى، دەپ حابارلايدى Dalanews.kz.
كۇدىكتىگە قاتىستى ادام ءولتىرۋ، نەكەگە تۇرۋعا ماجبۇرلەۋ جانە ستالكينگ باپتارى بويىنشا تەرگەۋ جۇرگىزىلىپ جاتىر. تەرگەۋ بارىسى باقىلاۋدا.
"ەكى رەت جۇرگىزىلگەن سوت-پسيحياتريالىق ساراپتاما قورىتىندىسى بويىنشا كۇدىكتىدەن پسيحيكالىق بۇزىلىس انىقتالىپ، وسىعان بايلانىستى مامانداندىرىلعان مەكەمەگە ءماجبۇرلى ەمدەۋگە جىبەرىلدى. ەمدەۋ اياقتالعاننان كەيىن كۇدىكتى تەرگەۋدى جالعاستىرۋ ءۇشىن قايتادان تەرگەۋ يزولياتورىنا قامالادى"، - دەدى پوليسيا.
پوليسيانىڭ سوزىنشە، تەرگەۋشىلەر جابىرلەنۋشى تاراپپەن تۇراقتى بايلانىستا، ۇزدىكسىز بايلانىس قامتاماسىز ەتىلگەن.
ايتا كەتەيىك، 11 قاڭتاردا شىمكەنتتە 21 جاستاعى نۇراي سەرىكباي پىشاق جاراقاتتارىنان كوز جۇمدى. قايعىلى وقيعا بەينەباقىلاۋ كامەرالارىنا ءتۇسىپ قالعان.
مارقۇمنىڭ تۋىستارىنىڭ ايتۋىنشا، نۇراي سەرىكباي 11 رەت پىشاق جاراقاتىن العان.
كەيىنىرەك پوليسيا قىزمەتكەرلەرى جەدەل ىزدەستىرۋ ءىس-شارالارى بارىسىندا 21 جاستاعى تۇرعىندى ءولتىردى دەگەن كۇدىكتى ەر ادامدى ۇستادى.
سونىمەن قاتار، پرەزيدەنت ۇلتتىق قۇرىلتايدا شىمكەنتتىك نۇرايدىڭ ولىمىنە قاتىستى پىكىر ءبىلدىردى. بۇعان دەيىن كۇدىكتى جىندىحاناعا جاتقىزىلعانى ايتىلدى.
