1،2 گەكتار اۋماقتاعى ەلوردانىڭ مۇعالىمدەر ساياباعىندا جاتۋعا ارنالعان اسپالى تورلار (گاماك) مەن جارىق بەرەتىن ورىندىقتار ورناتىلادى، ءتۇرلى ينستاللياسيالارعا ارنالعان ورىن، بالالار الاڭى، ماستەر-كلاسس وتكىزۋگە ارنالعان كەڭىستىك بولادى.
قولدانىستاعى ساياباقتى قايتا قۇرۋ جانە ل.ن. گۋميليەۆ اتىنداعى ەۇۋ-عا جاقىن ەكەنىن ەسكەرە وتىرىپ، دەمالۋعا ارنالعان تىنىش ورىندار، سەرۋەندەۋ جانە وقۋ ورىندارىن قۇرۋ جوسپارلانۋدا.
"USTAZ ALANY" پاركى مۇعالىمدەرگە ارنالعان. ونىڭ ايرىقشا ەرەكشەلىگى – شاعىن ساۋلەت نىساندارىندا. ماسەلەن، ءار ورىندىققا ءمۇعالىمنىڭ ءاتى-جونى مەن شاعىن ءومىربايانى جازىلعان تاقتايشا ورناتىلادى. سونىمەن قاتار پەداگوگتارعا ەرەن ەڭبەگى ءۇشىن العىس رەتىندە گريفەل قابىرعاسى مەن "Bilim japyraqtary" ينستاللياسياسىن ورناتۋ جوسپارلانىپ وتىر. ەلوردادا قالا تۇرعىندارىنىڭ تازا اۋادا دەمالاتىن ورىندارى كوبەيىپ كەلەدى"، - دەپ اتاپ ءوتتى نۇر-سۇلتان قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحايەۆ.
ساياباق اۋماعىندا الماسىپ وقۋ ءۇشىن كىتاپ قوراپتارىن ورناتۋ جوسپارلانىپ وتىر.
سونىمەن قاتار ساياباقتىڭ ورتالىق بولىگىندە تازا اۋادا شەبەرلىك ساباقتارىن وتكىزۋگە ارنالعان ورىن اشىلادى. ەلوردانىڭ ديزاين-كودىنا سايكەس جارىقتاندىرىلعان اتكەنشەك ورىندىقتارى مەن بيىكشە ورناتىلعان شامدار (تورشەر) اللەيانى اسەمدەي تۇسەدى. كوگالداندىرۋعا دا ەرەكشە كوڭىل بولىنبەك. ال ساياباقتىڭ ورتالىق بولىگىنە ەمەن وتىرعىزۋ جوسپارلانىپ وتىر.
"بۇل ساياباق اقبۇلاق وزەنىنىڭ جانىندا ورنالاسقاندىقتان تەڭىز كەيپىندەگى بالالار الاڭقايى ورناتىلادى. بۇدان بولەك ەرەكشە شاتىرلارى بار الاڭ اشىلادى"،- دەدى ۋربانيستيكا ورتالىعىنىڭ باسشىسى ەلنار بازىكەن.
ساياباقتىڭ جاعاسىنا سارعىش رەڭ بەرەتىن جارىق پەن جاياۋ سەرۋەندەۋ ءۇشىن ادەمى كوڭىل-كۇي سىيلايتىن گيرلياندالار ورناتۋ جوسپارلانۋدا. "ادامعا ىڭعايلى قالا" يدەياسىن ىسكە اسىرۋ اياسىندا كەدەرگىسىز ورتا قۇرىلادى.
ايتا كەتەيىك، بيىل "نۇر-سۇلتان – جايلى قالا" ماستەر-جوسپارى اياسىندا 190-عا جۋىق اۋلا مەن قوعامدىق كەڭىستىكتى اباتتاندىرۋ جوسپارلانىپ وتىر.
بىلتىرعى جىلى 210 اۋلا مەن قوعامدىق كەڭىستىك اباتتاندىرىلعان ەدى.
