1,2 gektar aýmaqtaǵy elordanyń muǵalimder saiabaǵynda jatýǵa arnalǵan aspaly torlar (gamak) men jaryq beretin oryndyqtar ornatylady, túrli installiatsiialarǵa arnalǵan oryn, balalar alańy, master-klass ótkizýge arnalǵan keńistik bolady.
Qoldanystaǵy saiabaqty qaita qurý jáne L.N. Gýmilev atyndaǵy EUÝ-ǵa jaqyn ekenin eskere otyryp, demalýǵa arnalǵan tynysh oryndar, serýendeý jáne oqý oryndaryn qurý josparlanýda.
"USTAZ ALANY" parki muǵalimderge arnalǵan. Onyń airyqsha ereksheligi – shaǵyn sáýlet nysandarynda. Máselen, ár oryndyqqa muǵalimniń aty-jóni men shaǵyn ómirbaiany jazylǵan taqtaisha ornatylady. Sonymen qatar pedagogtarǵa eren eńbegi úshin alǵys retinde grifel qabyrǵasy men "Bilim japyraqtary" installiatsiiasyn ornatý josparlanyp otyr. Elordada qala turǵyndarynyń taza aýada demalatyn oryndary kóbeiip keledi", - dep atap ótti Nur-Sultan qalasynyń sáýlet, qala qurylysy jáne jer qatynastary basqarmasynyń basshysy Nurlan Uranhaev.
Saiabaq aýmaǵynda almasyp oqý úshin kitap qoraptaryn ornatý josparlanyp otyr.
Sonymen qatar saiabaqtyń ortalyq bóliginde taza aýada sheberlik sabaqtaryn ótkizýge arnalǵan oryn ashylady. Elordanyń dizain-kodyna sáikes jaryqtandyrylǵan átkenshek oryndyqtary men biikshe ornatylǵan shamdar (torsher) alleiany ásemdei túsedi. Kógaldandyrýǵa da erekshe kóńil bólinbek. Al saiabaqtyń ortalyq bóligine emen otyrǵyzý josparlanyp otyr.
"Bul saiabaq Aqbulaq ózeniniń janynda ornalasqandyqtan teńiz keipindegi balalar alańqaiy ornatylady. Budan bólek erekshe shatyrlary bar alań ashylady",- dedi ýrbanistika ortalyǵynyń basshysy Elnar Bazyken.
Saiabaqtyń jaǵasyna sarǵysh reń beretin jaryq pen jaiaý serýendeý úshin ádemi kóńil-kúi syilaityn girliandalar ornatý josparlanýda. "Adamǵa yńǵaily qala" ideiasyn iske asyrý aiasynda kedergisiz orta qurylady.
Aita keteiik, biyl "Nur-Sultan – jaily qala" master-jospary aiasynda 190-ǵa jýyq aýla men qoǵamdyq keńistikti abattandyrý josparlanyp otyr.
Byltyrǵy jyly 210 aýla men qoǵamdyq keńistik abattandyrylǵan edi.
