تىرىسىندە-اق "ابىز ءابىش" اتانعان زاڭعار جازۋشى ءابىش كەكىلباي ۇلىنىڭ بۇگىن تۋعان كۇنى. قازاقستاننىڭ حالىق جازۋشىسى، مەملەكەت جانە قوعام قايراتكەرى ءتىرى بولعاندا، بۇگىن 80 جاسقا تولار ەدى. جاڭا كوشەنىڭ اشىلۋىنا ابىز جازۋشىنىڭ اياۋلى جارى كلارا جۇمابايەۆا، مەملەكەتتىك حاتشى قىرىمبەك كوشەربايەۆ، نۇر-سۇلتان قالاسىنىڭ اكىمى التاي كولگىنوۆ، اكادەميك، عالىم كەنجەعالي ساعادييەۆ، پارلامەنت ءماجىلىسىنىڭ دەپۋتاتى قۋانىش سۇلتانوۆ قاتىستى.
"قازاقتىڭ وسىنداي ءبىرتۋار، ابىز ازاماتى بولعانعا شۇكىر ەتۋىمىز كەرەك. وسى كوشەنىڭ بويىنان وتكەن وسكەلەڭ ۇرپاق ءابىش كەكىلباي ۇلىنىڭ كىم ەكەنىن، نۇر-سۇلتان قالاسىنىڭ نە ءۇشىن سالىنعانىن ەسكەرىپ، تاۋەلسىزدىگىمىزدىڭ باياندى بولۋىنا ءوز ۇلەسىن قوسادى دەپ ويلايمىن"، - دەدى مەملەكەتتىك حاتشى قىرىمبەك كوشەربايەۆ.
كوشە ەلوردانىڭ سول جاعالاۋىنداعى ەكسپو اۋماعىنا جاقىن ماڭدا ورنالاسقان. ماڭگىلىك ەل كوشەسىمەن قيىلىسادى.
"بۇل – مەملەكەتىمىزدىڭ مادەنيەت قايراتكەرلەرىنە، ءبىزدىڭ جازۋشىلارعا، قازاق ەلىنىڭ بىرلىگىن، ىنتىماعىن كوتەرىپ جۇرگەن ازاماتتارعا ۇلكەن قۇرمەت. ءابىش اعانىڭ ۇرپاعى جاساي بەرسىن! بارىڭىزگە بەرەكە-بىرلىك تىلەيمىز! تاۋەلسىزدىگىمىزدىڭ تۇعىرى بەرىك بولسىن!"، - دەدى نۇر-سۇلتان قالاسىنىڭ اكىمى التاي كولگىنوۆ.
سالتاناتتى جيىندا عالىم، اكادەميك كەنجەعالي ساعادييەۆ ءابىش كەكىلباي ۇلى تۋرالى ەستەلىكتەرىمەن ءبولىستى.
"حالقىمىزدىڭ سۇيىكتى پەرزەنتى، مەملەكەت جانە قوعام قايراتكەرى، ءبىزدىڭ رۋحاني الەمىمىزدە ەرەكشە ورنى بار ءابىشتىڭ ەسىمى مىناداي كەرەمەت كوشەگە بەرىلدى. قازاقتىڭ قاتپار-قاتپار سىرىن، مۇڭىن، ويىن ارمانىن جازىپ، بولمىسىن سومداپ، الەمگە پاش ەتىپ جۇرگەن تۇلعالاردىڭ ەڭبەگى وسىلاي باعالانۋى كەرەك. ءابىش ءتىرى بولعاندا ءدال بۇگىن 80 جاسقا كەلەر ەدى. جاقىندا قاسىم-جومارت توقايەۆ اقتاۋعا ارنايى بارىپ ابىز جازۋشىنىڭ ەسكەرتكىشىن اشتى. ەل استاناسىنىڭ العاشقى ىرگەتاسىن قالاپ، ونى وسىنداي ساۋلەتتى شاھارعا جەتكىزگەن نۇرسۇلتان ءابىش ۇلى. وسىنداي كوپ ۋاقىت ىشىندە ونىڭ سەنىمدى سەرىگى بولعان ءابىش ەدى. ءقازىر ەلوردانىڭ نۇر-سۇلتان اتانۋىنىڭ، مىنا كوشەگە ءابىش كەكىلباي ۇلىنىڭ ەسىمى بەرىلۋىنىڭ ارتىندا ۇلكەن ءمان بار. ءابىشتىڭ ەڭبەكتەرىن الەم تىلدەرىندە سويلەتۋىمىز كەرەك. ونىڭ ويشىلدىعى ەشكىمنەن كەم تۇسپەيدى. ونى الەم ويشىلدارىنىڭ قاتارىنا ەنگىزۋىمىز كەرەك. بۇل - وسكەلەڭ ۇرپاققا ارتىلىپ وتىرعان مىندەت"، - دەدى كەنجەعالي ساعادييەۆ.
جيىن بارىسىندا ءماجىلىس دەپۋتاتى قۋانىش سۇلتانوۆ تا ءابىش كەكىلباي ۇلى ەلباسىنىڭ سەنىمدى سەرىگى بولعانىن ەسكە الىپ ءوتتى.
"ەلوردانىڭ ادەمى قىسى، جىلىمىق ايازى، ءسال شىڭىلتىر جەلى بار. وسى قىسى تۋرالى جۇرت نەبىر ءتۇرلى سوزدەر ايتىپ جاتقاندا، ونىڭ قايتا دەنساۋلىققا پايداسى، سەرگەكتىككە الىپ كەلەتىنىن، بولاشاعىمىزعا قانشالىقتى وڭ اسەر ەتەتىنىن جازىپ، دارىپتەگەن ءابىش اعامىز بولاتىن. ەلباسىنىڭ قاسىندا ءجۇرىپ، وسى استانامىزدىڭ، اۋەل باستان الماتى تاۋەلسىزدىگىمىزدىڭ التىن بەسىگى بولعاندا سونىڭ تۋىن بىرگە كوتەرىسىپ، سىرلاسقان سەنىمدى سەرىگى بولدى. ەلباسى تولعانىپ ءجۇرىپ ءوزىنىڭ شەشىمىن ەڭ الدىمەن تورت-بەس ازاماتتى جيناپ الىپ ايتقاندا سونىڭ وڭ جاعىندا ابەكەڭ وتىرعان"، - دەپ ءابىش كەكىلباي ۇلى تۋرالى ويىمەن ءبولىستى.
ول ءسوز اراسىندا كەڭەس بيلىگى ورناپ تۇرعان شاقتا حالقىمىزدىڭ ۇلى تۇلعالارىن دارىپتەۋ ءۇشىن ماسكەۋدەن رۇقسات سۇراۋ قاجەتتىگىن ەسكە الىپ ءوتتى.
"جاقىندا عانا فاريزا وڭعارسىنوۆا اتىنداعى كوشەنى اشتىق. ەكەۋى ومىردە بىرگە ءجۇردى، ءقازىر پانتەوندا قاتار جاتىر. ەندى مىنە ولاردىڭ اتىنداعى كوشەلەرى دە قاتار تۇر. ول كىسىنىڭ جاتقان جەرى جايلى بولعاي! ارتىندا قالعان اسىل مۇراسى عاسىرلار بويى ەلگە ەڭبەك ەتەدى. قاي كوشەمەن جۇرەسىڭ دەگەندە ءابىش كەكىلباي ۇلىنىڭ كوشەسىمەن بارىپ، وڭعا بۇرىلساڭ فاريزانىڭ كوشەسىنە شىعاسىڭ دەپ تالاي قازاق تالاي ءۇيدى ىزدەپ اينالىپ جۇرەدى"، - دەپ قۋانىش سۇلتانوۆ جىلى لەبىزىن ءبىلدىردى.
