Tirisinde-aq "abyz Ábish" atanǵan zańǵar jazýshy Ábish Kekilbaiulynyń búgin týǵan kúni. Qazaqstannyń halyq jazýshysy, memleket jáne qoǵam qairatkeri tiri bolǵanda, búgin 80 jasqa tolar edi. Jańa kósheniń ashylýyna abyz jazýshynyń aiaýly jary Klara Jumabaeva, Memlekettik hatshy Qyrymbek Kósherbaev, Nur-Sultan qalasynyń ákimi Altai Kólginov, akademik, ǵalym Kenjeǵali Saǵadiev, Parlament Májilisiniń depýtaty Qýanysh Sultanov qatysty.
"Qazaqtyń osyndai birtýar, abyz azamaty bolǵanǵa shúkir etýimiz kerek. Osy kósheniń boiynan ótken óskeleń urpaq Ábish Kekilbaiulynyń kim ekenin, Nur-Sultan qalasynyń ne úshin salynǵanyn eskerip, táýelsizdigimizdiń baiandy bolýyna óz úlesin qosady dep oilaimyn", - dedi Memlekettik hatshy Qyrymbek Kósherbaev.
Kóshe elordanyń sol jaǵalaýyndaǵy EKSPO aýmaǵyna jaqyn mańda ornalasqan. Máńgilik el kóshesimen qiylysady.
"Bul – memleketimizdiń mádeniet qairatkerlerine, bizdiń jazýshylarǵa, qazaq eliniń birligin, yntymaǵyn kóterip júrgen azamattarǵa úlken qurmet. Ábish aǵanyń urpaǵy jasai bersin! Bárińizge bereke-birlik tileimiz! Táýelsizdigimizdiń tuǵyry berik bolsyn!", - dedi Nur-Sultan qalasynyń ákimi Altai Kólginov.
Saltanatty jiynda ǵalym, akademik Kenjeǵali Saǵadiev Ábish Kekilbaiuly týraly estelikterimen bólisti.
"Halqymyzdyń súiikti perzenti, memleket jáne qoǵam qairatkeri, bizdiń rýhani álemimizde erekshe orny bar Ábishtiń esimi mynadai keremet kóshege berildi. Qazaqtyń qatpar-qatpar syryn, muńyn, oiyn armanyn jazyp, bolmysyn somdap, álemge pash etip júrgen tulǵalardyń eńbegi osylai baǵalanýy kerek. Ábish tiri bolǵanda dál búgin 80 jasqa keler edi. Jaqynda Qasym-Jomart Toqaev Aqtaýǵa arnaiy baryp abyz jazýshynyń eskertkishin ashty. El astanasynyń alǵashqy irgetasyn qalap, ony osyndai sáýletti shaharǵa jetkizgen Nursultan Ábishuly. Osyndai kóp ýaqyt ishinde onyń senimdi serigi bolǵan Ábish edi. Qazir elordanyń Nur-Sultan atanýynyń, myna kóshege Ábish Kekilbaiulynyń esimi berilýiniń artynda úlken mán bar. Ábishtiń eńbekterin álem tilderinde sóiletýimiz kerek. Onyń oishyldyǵy eshkimnen kem túspeidi. Ony álem oishyldarynyń qataryna engizýimiz kerek. Bul - óskeleń urpaqqa artylyp otyrǵan mindet", - dedi Kenjeǵali Saǵadiev.
Jiyn barysynda Májilis depýtaty Qýanysh Sultanov ta Ábish Kekilbaiuly Elbasynyń senimdi serigi bolǵanyn eske alyp ótti.
"Elordanyń ádemi qysy, jylymyq aiazy, sál shyńyltyr jeli bar. Osy qysy týraly jurt nebir túrli sózder aityp jatqanda, onyń qaita densaýlyqqa paidasy, sergektikke alyp keletinin, bolashaǵymyzǵa qanshalyqty oń áser etetinin jazyp, dáriptegen Ábish aǵamyz bolatyn. Elbasynyń qasynda júrip, osy astanamyzdyń, áýel bastan Almaty táýelsizdigimizdiń altyn besigi bolǵanda sonyń týyn birge kóterisip, syrlasqan senimdi serigi boldy. Elbasy tolǵanyp júrip óziniń sheshimin eń aldymen tórt-bes azamatty jinap alyp aitqanda sonyń oń jaǵynda Ábekeń otyrǵan", - dep Ábish Kekilbaiuly týraly oiymen bólisti.
Ol sóz arasynda keńes biligi ornap turǵan shaqta halqymyzdyń uly tulǵalaryn dáripteý úshin Máskeýden ruqsat suraý qajettigin eske alyp ótti.
"Jaqynda ǵana Fariza Ońǵarsynova atyndaǵy kósheni ashtyq. Ekeýi ómirde birge júrdi, qazir panteonda qatar jatyr. Endi mine olardyń atyndaǵy kósheleri de qatar tur. Ol kisiniń jatqan jeri jaily bolǵai! Artynda qalǵan asyl murasy ǵasyrlar boiy elge eńbek etedi. Qai kóshemen júresiń degende Ábish Kekilbaiulynyń kóshesimen baryp, ońǵa burylsań Farizanyń kóshesine shyǵasyń dep talai qazaq talai úidi izdep ainalyp júredi", - dep Qýanysh Sultanov jyly lebizin bildirdi.
