كۇن تارتىبىندەگى العاشقى ماسەلە بويىنشا «ۇلتتىق مۇرا» پارتيالىق جوباسى اياسىندا تۇركىستان وبلىسىنىڭ كيەلى، قاسيەتتى ورىندارىنا جاسالعان «تۇركىستان عاجايىپتارى» ەكسپەديسياسى تۇيىندەلدى. پارتيا فيليالىنىڭ قولداۋىمەن وتكەن ەكسپەديسيا 23-ماۋسىمدا باستالىپ، 15 شىلدەدە اياقتالعان. ارنايى توپ پەن ولكەتانۋشىلار 10 ەكسپەديسيالىق ساپارعا شىعىپ، 85 نىساندى كورىپ، جاي-كۇيىن زەردەلەگەن.
بۇل تۋرالى تۇركىستان وبلىستىق مادەنيەت باسقارماسىنىڭ تارحي-مادەني مۇرانى قورعاۋ، قالپىنا كەلتىرۋ جانە پايدالانۋ جونىندەگى ورتالىقتىڭ ديرەكتورى جاندوس قۇرباننىڭ ەسەبى تىڭدالدى. ونىڭ ايتۋىنشا، اۋدان، قالالاردا تاريحي ەسكەرتكىشتەر مەن ورىنداردى قورعاۋ باعىتىنداعى جۇمىستاردى كۇشەيتۋ كەرەك.
– تۇركىستان وبلىسىنداعى ءشاممات يشان مەشىت-مەدىرەسەسى، ۇزىن اتا كەسەنەسى، ىسقاق اتا كەسەنەسى، مانسۇر اتا كەسەنەسى سەكىلدى ساۋلەت ەسكەرتكىشتەرى رەستاۆراسيالىق جۇمىستاردى قاجەت ەتىپ تۇر. ەگەر قولداۋ كورسەتىلمەسە، قۇندى مۇرالارىمىزدان كوز جازىپ قالۋىمىز مۇمكىن.
سونىمەن بىرگە كەلەس اۋدانىنداعى القاكول كولىنە باراتىن 10 شاقىرىم جولعا اسفالت توسەۋ جانە «القاكول سۇلاما» قىرعىنىنىڭ 300 جىلدىعىنا ارناپ مەموريالدى كەشەن ورناتىپ، ناسيحاتتاعان ءجون. سوزاق اۋدانىنداعى قوشقار اتا، مۇحاممەد حانافيا، بالىقشى اتا، حاقنازار حان كەسەنەلەرىنە، قازىعۇرت اۋدانىنداعى ىسقاق اتا، شىلتەن اتا كەسەنەلەرىنە، تولەبي اۋدانىنداعى مانسۇر اتا كەسەنەسىنە، جىلاق اتا بۇلاعىنا، سايرام اۋدانىنداعى ەر بەكىش اتا كەسەنەسىنە، تۇلكىباس اۋدانىنداعى قاراۇڭگىر تۇراعى، ءداۋ بابا كەسەنەسىنە باراتىن جولداردى رەتتەپ، مۇمكىندىگى بولسا اسفالت جابىن توسەۋ كەرەك، – دەگەن جاندوس قۇربان وزگە دە ۇسىنىستارىن جەتكىزدى.
اتاپ ايتساق، وبلىس اۋماعىنداعى بارلىق تاريحي-مادەني، كيەلى جانە قاسيەتتى جەرلەرگە باراتىن جول بويلارىنداعى سىلتەۋىش بەلگىلەردى جاڭارتۋ، جوق بولسا قويۋ، بارلىق تاريحي ورىنداردىڭ مەملەكەت قورعاۋىندا ەكەنىن كورسەتەتىن تاقتايشالاردى جاڭارتۋعا وبلىستىق بيۋدجەتتەن قارجى قاراۋ قاجەت. سونداي-اق، شىراقشىلاردىڭ بىلىكتىگىن ارتتىرۋ، اۋىل اكىمدەرىنىڭ تاريحي-مادەني ەسكەرتكىشتەردى قورعاۋ بويىنشا بىلىكتىلىگىن ارتتىرۋ ءۇشىن تۇراقتى تۇردە سەمينارلار وتكىزۋ دە ماڭىزدى.
جيىندا وڭىردە ۇلتتىق سپورت تۇرلەرىن دامىتۋ باعىتىنداعى جۇمىستار دا سارالاندى. بۇل جونىندە «تاريحىن تانۋ – تاعىلىمدى ءىس» تاقىرىبىندا وبلىستىق دەنەشىنىقتىرۋ جانە سپورت باسقارماسىنىڭ باسشىسىنىڭ ورىنباسار ايتماحامەتالى بەرداشيەۆتىڭ بايانداماسى تىڭدالدى. ونىڭ ايتۋىنشا، تۇركىستان وبلىسىندا اسىق اتۋ، قازاق كۇرەسى، كوكپار، تەڭگە ءىلۋ، توعىزقۇمالاق، اۋدارىسپاق، بايگە، جامبى اتۋ، سايات، جەكپە-جەك، جالپى ۇلتتىق سپورتتىڭ 10 ءتۇرى دامىپ كەلەدى. ۇلتتىق سپورت تۇرىمەن جالپى شۇعىلدانۋشىلار سانى 84 مىڭنان اسادى. ولار وبلىستاعى 1826 ۇيىرمەگە قاتىسادى. وبلىس سپورتشىلارى 2021 جىلدىڭ 9 ايىندا ۇلتتىق سپورت تۇرلەرىنەن حالىقارالىق، رەسپۋبليكالىق جانە وبلىستىق جارىستارعا قاتىسىپ، 76 التىن، 65 كۇمىس، 25 قولا مەدالدى جەڭىپ العان.
قوعامدىق كەڭەس وتىرىسىندا تۇركىستان وبلىستىق تۋريزم باسقارماسى تۋريستىك جوبالاردى جوسپارلاۋ جانە جۇزەگە اسىرۋ ءبولىمىنىڭ باسشىسى نۇرداۋلەت مەدەۋوۆ وسى سالاداعى جۇمىستاردى باياندادى. ول تۇركىستان وڭىرىندە تۋريزم سالاسى دامىپ، اقپاراتتىق-ناسيحاتتىق جۇمىس كۇشەيگەنىن مالىمدەدى.
دەگەنمەن قوعامدىق كەڭەس مۇشەلەرى تۋريزم سالاسىنداعى جۇمىستاردى ءالى دە شيراتۋ كەرەكتىگىن جەتكىزىپ، ءبىرقاتار ۇسىنىستارىن ورتاعا سالدى. سونىمەن بىرگە وبلىستاعى تاريحي ورىنداردى قورعاۋ، كوكپار سپورتىن وتكىزۋگە ارنالعان اۋماقتاردى بەلگىلەۋ، جۇرتشىلىقتىڭ بۇقارالىق سپورتپەن شۇعىلدانۋىنا جاعداي جاساۋ باعىتىندا پىكىرلەرىن ايتتى.
جيىندى تۇيىندەگەن مارحابات بايعۇت ءاربىر ۇسىنىس حاتتاماعا ەنگىزىلىپ، ءتيىستى جۇمىس جۇرەتىنىن مالىمدەدى.
«Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى، فراكسيا جەتەكشىسى بەيسەن تاجىبايەۆ ءوڭىردىڭ تۋريستىك الەۋەتىن كوتەرۋ، تاريحي ەسكەرتكىشتەردى قورعاۋ، رۋحانياتقا، سپورتقا قولداۋ كورسەتۋ جانە ناسيحاتتاۋ پارتيانىڭ جول كارتاسىنىڭ باسىم باعىتتارىنا ەنگىزىلگەنىن جەتكىزدى. ءاربىر باسقارما نەمەسە ورتالىق ءوز سالالارىنداعى ماسەلەلەردى جاسىرماي ايتىپ، جەرگىلىكتى اكىمدىكتەرگە ۇسىنىستار بەرىپ، بەلسەندى جۇمىس جۇرگىزۋى ءتيىس ەكەنىنە توقتالدى. «ۇلتتىق مۇرا» جوباسى اياسىندا وتكەن «تۇركىستان عاجايىپتارى» ولكەتانۋ ەكسپەديسياسىنىڭ ءوڭىر تاريحىن، ولكەتانۋدى زەردەلەۋدە تابىستى ەڭبەك ەتكەنىن ايتا كەلە، ەكسپەديسيا مۇشەلەرىن العىس حاتپەن ماراپاتتادى.
