قازٸر قوعامدا كيبەرالاقتىق ٶرشٸپ تۇر. ولاردىڭ اراسىندا گيپنوز قولداناتىندارى دا بار كٶرٸنەدٸ. وسىنداي بٸر وقيعامەن قارجىگەر-مامان ايدارحان قۇسايىنوۆ بٶلٸستٸ, دەپ حابارلايدى Dalanews.kz.
"مەن جاڭا عانا گيپنوز قولدانىلعان ناقتى بٸر وقيعادان قانىقتىم. ٷلكەن, بايسالدى ادام ۇيالى تەلەفون قوڭىراۋىنا قۇلاققاپ ارقىلى جاۋاپ بەرەمٸن دەپ ەسٸن بٸر سەتكە جوعالتقان. كەيٸن ٶزٸ جٷرگەن, بولعان جەردەگٸ سىرتقى باقىلاۋ كامەرالارىن تەكسەرسە, ٶزٸنٸڭ تەلەفونمەن سٶيلەسٸپ جٷرٸپ, ارعى جاقتاعىلاردىڭ بار ايتقانىن مٷلتٸكسٸز ورىنداعانىنىڭ كۋەسٸ بولادى. بانككە كٸرەدٸ, نەسيە تٸركەتەدٸ, اقشانى اۋدارادى, تاعىسىن تاعى. بٸراق وسىنىڭ بارلىعىنان ٶزٸ حابارسىز بولىپ شىققان. گيپنوزدى ازداپ زەرتتەپ كٶرگەن ٶز باسىم بۇعان سەندٸم. ونىڭ ٷستٸنە گيپنوزعا قارسى تۇراتىن ەشقانداي قاۋقار دا, امال دا جوق. سوندىقتان ەلەۋمەتتٸك جەلٸدە ٶز وقيعاسىن بايانداپ, "كيبەرالاياقتارعا قالاي الدانىپ قالعانىن, نەسيەنٸ قالاي تٸركەتٸپ قويعانىن بٸلمەي قالدىم" دەپ جاتاتىنداردى مەن جاقسى تٷسٸنەمٸن. سول سەبەپتٸ بەيتانىس نٶمٸرلەرگە جاۋاپ بەرگەندە ۇيالى تەلەفوندى مٷلدە قۇلاققا جاقىنداتپاعان دۇرىس. داۋىسىن كٶتەرٸپ قويىپ قويىڭىز, بولدى. ال ميعا جاقىنداعان سايىن گيپنوز ەسەرٸ كٷشتٸرەك بولادى", دەپ جازادى جەلٸدە قارجىگەر-مامان ايدارحان قۇسايىنوۆ.
بۇعان دەيٸن كيبەرالاياقتارعا الدانىپ, نەسيەگە "باتقاندار" قاراسى كٶبەيٸپ بارا جاتقانىن ايتىپ, دابىل قاققان ەكونوميست راسۋل رىسمامبەتوۆ وسىنداي قاسكٶيلەرگە جەم بولعان تانىستارىنىڭ وقيعاسىن بايانداپ بەرگەن ەدٸ.
