الەمدىك نارىقتا مۇناي باعاسى ءوسۋىن جالعاستىرۋدا. 19 مامىردا كەشكىسىن ICE Futures ەلەكتروندىق ساۋدا بيرجاسىندا Brent ماركالى مۇنايدىڭ ماۋسىم فيۋچەرستەرىنىڭ قۇنى 1،6%-عا كوتەرىلىپ، 1 باررەلى 78 دوللار بولدى. ترەيدەرلەر تاياۋ شىعىستاعى جاعدايدى دەمدەرىن ىشتەرىنە تارتا، ءالى باقىلاۋدا. ينۆەستورلار نازارى، اسىرەسە يران-يزرايل قاقىتىعى سالدارىنان الەمدەگى مۇنايدىڭ ۇشتەن ءبىر بولىگى جونەلتىلەتىن ورمۋز بۇعازىنىڭ زارداپ شەگۋ-شەكپەۋىنە باسا اۋۋدا. ال Goldman Sachs، Citigroup جانە JPMorgan سىندى حالىقارالىق قارجى ينستيتۋتتارى بۇل بۇعاز زارداپ شەكسە، "قارا التىننىڭ" باعاسى شارىقتاي جونەلەتىنىن بولجايدى، دەپ حابارلايدى Dalanews.kz.
Goldman Sachs ساراپشىلارى ەگەر گەوساياسي جاعداي بۇرىنعى قالىپتى جاعدايعا ورالسا، Brent مۇنايىنىڭ ءبىر باررەلى 2025 جىلدىڭ IV-توقسانىندا، ءتىپتى 60 دوللاردان دا تومەن ءتۇسىپ كەتۋى مۇمكىن دەپ سانايدى. ال، ەگەر يراندا مۇناي تاسىمالىندا پروبلەمالار تۋىنداسا، وندا باعا 90 دوللاردان اساعا جوعارىلاۋى ىقتيمال.
Citigroup ساراپشىلارى ورمۋز بۇعازى بلوكادادا قالىپ كەتسە ءارى مۇناي تاسىمالىنداعى ۇزىلىستەر اراسى ۇزاپ كەتسە باعا 90 دوللارعا دەيىن كوتەرىلۋى مۇمكىن ەكەنىن ايتادى. ال قاتاڭ سەنارييلەردە باعا شىعى 120-130 دوللاردى يگرەۋى ىقتيمال.
"ءوندىرىس كولەمىنىڭ ءوسىمى جانە جۇڭگو تاراپىنان سۇرانىستىڭ تومەندەۋى اقىرىندا باعانىڭ ساباسىنا ءتۇسىرۋ ءرولىن اتقارۋى مۇمكىن. ياعني، بۇل رەتتە باعا ءوسىمى قىسقا مەرزىمدى سيپاتقا يە بولاتىن سياقتى"، - دەيدى Citigroup ساراپشىلارى.
JPMorgan ساراپشىلارى ورمۋز بۇعازى ارقىلى وتەتىن ارنا جابىلسا نەمەسە تاياۋ شىعىستا ءىرى سوعىس وتى تۇتانسا مۇنايدىڭ ءبىر باررەلىنىڭ قۇنى 130 دوللارعا دەيىن كوتەرىلۋى مۇمكىن دەپ ەسكەرتەدى.
ايتا كەتسەك، 13 ماۋسىمعا قاراعان ءتۇنى يزرايل يرانعا قارسى اسكەري وپەراسيانى باستاپ، ەلدەگى اسكەري جانە عىلىمي كاسىپورىندارعا اۋەدەن شابۋىل جاسادى. سالدارىنان وننان استام يراننىڭ جوعارى دارەجەلى اسكەري جانە اتوم سالاسىنىڭ جەتەكشى عالىمدارى وپات بولدى. ناتانزەدەگى يراننىڭ يادرولىق باعدارلاماسىنىڭ نەگىزگى نىسانى دا زاقىمداندى. ءيزرايلدىڭ العاشقى سوققىلارىنان كەيىن Brent ماركالى مۇنايدىڭ قۇنى 13%-عا كوتەرىلىپ، التى ايدا العاش رەت 78 دوللاردان استى. يران كەك الۋ وپەراسياسىن جاريالادى، سودان بەرى تاراپتار بىر-بىرىنە سوققى بەرۋدە. تەگەران ورمۋز بۇعازىن جابۋدى قاراستىرىپ جاتقانىن ايتتى، ال ول ارقىلى الەمدىك مۇنايدىڭ، كوندەنساتتىڭ جانە مۇناي ونىمدەرىنىڭ 15-20% جانە سۇيىتىلعان تابيعي گازدىڭ 30%-دان استامى وتەدى. يراندىق ساراپشىلاردىڭ باعالاۋى بويىنشا، مۇنداي جاعدايدا نارىققا شيكىزات جەتكىزىلىمى كۇرت تومەندەپ، مۇنايدىڭ ءبىر باررەلىنىڭ باعاسى 250 دوللارعا دەيىن كوتەرىلۋى مۇمكىن. 17 ماۋسىمدا يراننىڭ Press TV تەلەارناسى ورمۋز بۇعازى ماڭىندا يران جاعالاۋىندا ورتكە ورانعان ءۇش مۇناي تانكەرىنىڭ فوتوسۋرەتىمەن ءبولىستى.
