ق ر پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ءماجىلىس دالىزىندە جۋرناليستەرگە بەرگەن سۇقباتىندا ۇكىمەت مۇنايدىڭ ءبىر باررەلىنىڭ قۇنى 50 جانە 55 دوللارعا دەيىن تومەندەۋى ىقتيمال جاعدايعا قاتىستى بىرنەشە دامۋ سەناريىن دايىنداپ جاتقانىن مالىمدەدى، دەپ حابارلايدى Dalanews.kz.
ۇلتتىق ەكونوميكا ءمينيسترى قولدارىندا ءۇش سەناريي بار ەكەنىن ەسكە سالدى: وپتيميستىك، بازالىق جانە پەسسيميستىك. قازاقستاننىڭ بيۋدجەتى، نەگىزىنەن، مۇناي كىرىسى ەسەبىنەن قالىپتاسادى جانە بۇگىنگى تاڭداعىداي مۇناي باررەلىنىڭ الەمدىك باعاسى 60 دوللارعا دەيىن تومەندەۋى پەسسيميستىك سەنارييگە كوشۋگە ماجبۇرلەۋدە.
"ءبىز پەسسيميستىك سەنارييگە جاقىنداپ قالدىق. وندا ءبىر باررەل 60 دوللار تۇرعىسىندا قاراستىرىلعان. ءبىز ءقازىردىڭ وزىندە بيۋدجەتتىڭ قانداي شىعىندارىن قىسقارتاتىنىمىزدى، قايسىسىن ءبارىبىر قىسقارتپايتىنىمىزدى انىق ءبىلىپ وتىرمىز. كەشە ءبىز ەسەپتەۋدى باستادىق. مەنىڭ ويىمشا، بۇگىن-ەرتەڭ باعا 55 جانە 50 دوللار بولعان جاعدايعا قاتىستى دامۋ سەناريىن ازىرلەۋدى اياقتايمىز"، - دەدى سەرىك جۇمانعارين.
ول مۇناي باعاسى ارى قاراي تومەندەمەۋى مۇمكىن ەكەنىن، ءبىراق كەز-كەلگەن جاعدايعا دايىن بولۋىمىز كەرەكتىگىن دە جەتكىزدى. پرەمەر-مينيستردىڭ ورىنباسارى قازاقستان داعدارىستى بىرنەشە رەت باسىنان وتكىزگەنىن اتاپ ءوتتى. مۇنداي ۋاقىتتا ينفراقۇرىلىمداردى سالىپ، جۇمىس ورىندارىن اشۋ قاجەت. ۇكىمەت وسى اكسيوماعا باسا نازار اۋدارادى.
"ۇلتتىق قوردىڭ ءرولىن ۇمىتپالىق. ول ءدال وسىنداي جاعدايلاردا ساقتاندىرۋ "جاستىعى" ءرولىن اتقارۋى ءتيىس. بۇعان دەيىن ءبىز ونى بىرنەشە جىل بويى باسقا ماقساتتارعا قولدانىپ كەلدىك ءارى بۇل رەتتە دۇرىس سىنعا ۇشىرادىق. بۇگىن سالىق كودەكسى ءبىرىنشى وقىلىمدا ماقۇلداندى. بۇل، ەڭ الدىمەن، وسى سىنعا جاۋاپ. ءبىز مەملەكەتتىك قارجىنى تۇراقتاندىرىپ، ۇلتتىق قوردان اقشا الۋدى، نىسانالى ترانسفەرتتەردىڭ كولەمىن قىسقارتۋدى قالايمىز"، - دەپ اتاپ ءوتتى سەرىك جۇمانعارين.
بۇعان دەيىن ءماجىلىس سالىق كودەكسىنىڭ جوباسىن ءبىرىنشى وقىلىمدا ماقۇلداعانى حابارلانعان.
