قازاقستاندا گازدىڭ كٶتەرمە باعاسى بيىل تاعى ٶسەدٸ. ٷكٸمەت مۇنى ەلدەگٸ راستالعان گاز قورىنىڭ ازدىعىمەن تٷسٸندٸرٸپ وتىر, دەپ حابارلايدى dalanews.kz.
بۇل تۋرالى پرەمەر-مينيستردٸڭ ورىنباسارى, ۇلتتىق ەكونوميكا مينيسترٸ سەرٸك جۇمانعارين پارلامەنت پالاتالارىنىڭ بٸرلەسكەن وتىرىسىنان كەيٸن ايتتى.
مينيستردٸڭ سٶزٸنشە, قازٸرگٸ باعامەن جەكە كومپانييالارعا گاز ٶندٸرۋمەن اينالىسۋ تيٸمسٸز بولىپ وتىر. سونىڭ سالدارىنان قازاقستان گاز قورى مەن ٶندٸرٸسٸ بويىنشا جەتەكشٸ ەلدەردٸڭ قاتارىنا كٸرمەي قالعان.
«بٷگٸندە بٸزدە راستالعان گاز قورى بويىنشا جاعداي اسا جاقسى ەمەس. قازٸرگٸ كٶتەرمە باعامەن جەكە كومپانييالار گاز ٶندٸرۋگە بارمايدى, سەبەبٸ بۇل تيٸمسٸز», - دەدٸ جۇمانعارين.
ونىڭ ايتۋىنشا, باعانىڭ ٶسۋٸ ينۆەستورلاردى تارتۋ ٷشٸن قاجەت. سوندىقتان ٷكٸمەت بيىل تاعى دا كٶتەرمە گاز باعاسىن كٶتەرۋگە مەجبٷر بولادى.
مينيستر بۇعان دەيٸن ەنەرگەتيكالىق كەڭەس 2026 جىلدىڭ 1 شٸلدەسٸنەن باستاپ تاۋارلىق گازدىڭ كٶتەرمە باعاسىن كٶتەرۋ تۋرالى شەشٸم قابىلداعانىن ەسكە سالدى.
جۇمانعارين ەگەر قازاقستان ٶز گازىن جەتكٸلٸكتٸ كٶلەمدە ٶندٸرمەسە, كەيٸن يمپورتقا تەۋەلدٸ بولاتىنىن ايتتى.
«ەيتپەسە گاز باسقا سەبەپتەرمەن قىمباتتايدى, ٶيتكەنٸ بٸز ونى يمپورتتايمىز. ال بٸزگە گاز ساتاتىن ەلدەر بٸزدٸڭ ەلەۋمەتتٸك ساياساتىمىزدى ەسكەرٸپ وتىرمايدى», - دەدٸ ول.
مينيستردٸڭ پٸكٸرٸنشە, حالىققا قولجەتٸمدٸ گاز ساقتاۋ ٷشٸن ەل ٸشٸندە جاڭا قورلاردى تاۋىپ, ٶندٸرۋ قاجەت. ال ول ٷشٸن قازٸرگٸ تاريفتەردٸ كٶتەرۋ كەرەك.
سونىمەن قاتار مينيسترلٸك شٸلدەدە جوسپارلانعان گاز باعاسىنىڭ ٶسۋٸ ينفلياتسييانى شامامەن 0,16 پايىزعا عانا ارتتىرادى دەپ وتىر.
ايتا كەتەيٸك, بۇعان دەيٸن قازاقستاندا 2028 جىلعا دەيٸن گازدىڭ كٶتەرمە باعاسىن كەزەڭ-كەزەڭٸمەن كٶتەرۋ جوسپارى جارييالانعان بولاتىن.
