Qazaqstanda gazdyń kóterme baǵasy biyl taǵy ósedi. Úkimet muny eldegi rastalǵan gaz qorynyń azdyǵymen túsindirip otyr, dep habarlaidy dalanews.kz.
Bul týraly premer-ministrdiń orynbasary, ulttyq ekonomika ministri Serik Jumanǵarin parlament palatalarynyń birlesken otyrysynan keiin aitty.
Ministrdiń sózinshe, qazirgi baǵamen jeke kompaniialarǵa gaz óndirýmen ainalysý tiimsiz bolyp otyr. Sonyń saldarynan Qazaqstan gaz qory men óndirisi boiynsha jetekshi elderdiń qataryna kirmei qalǵan.
«Búginde bizde rastalǵan gaz qory boiynsha jaǵdai asa jaqsy emes. Qazirgi kóterme baǵamen jeke kompaniialar gaz óndirýge barmaidy, sebebi bul tiimsiz», - dedi Jumanǵarin.
Onyń aitýynsha, baǵanyń ósýi investorlardy tartý úshin qajet. Sondyqtan úkimet biyl taǵy da kóterme gaz baǵasyn kóterýge májbúr bolady.
Ministr buǵan deiin Energetikalyq keńes 2026 jyldyń 1 shildesinen bastap taýarlyq gazdyń kóterme baǵasyn kóterý týraly sheshim qabyldaǵanyn eske saldy.
Jumanǵarin eger Qazaqstan óz gazyn jetkilikti kólemde óndirmese, keiin importqa táýeldi bolatynyn aitty.
«Áitpese gaz basqa sebeptermen qymbattaidy, óitkeni biz ony importtaimyz. Al bizge gaz satatyn elder bizdiń áleýmettik saiasatymyzdy eskerip otyrmaidy», - dedi ol.
Ministrdiń pikirinshe, halyqqa qoljetimdi gaz saqtaý úshin el ishinde jańa qorlardy taýyp, óndirý qajet. Al ol úshin qazirgi tarifterdi kóterý kerek.
Sonymen qatar ministrlik shildede josparlanǵan gaz baǵasynyń ósýi infliatsiiany shamamen 0,16 paiyzǵa ǵana arttyrady dep otyr.
Aita keteiik, buǵan deiin Qazaqstanda 2028 jylǵa deiin gazdyń kóterme baǵasyn kezeń-kezeńimen kóterý jospary jariialanǵan bolatyn.
