يراننىڭ كولەڭكەلى فلوتى اقش پەن ەۋروپا ەلدەرى سالعان سانكسيانى ءساتتى اينالىپ وتكەنىمەن قويماي، سانكسياعا ۇشىراعان باسقا ەلدەرگە دە قولعابىس ەتىپ كەلگەن. وسىنى دالەلدەيتىن شەتەلدىك باق-تا كولەمدى زەرتتەۋ ماقالا جاريالاندى، دەپ جازادى Dalanews.kz.
"قاتاڭ سانكسيالار جاعدايىندا يران كولەڭكەلى فلوتىنا سۇيەنە وتىرىپ، ءوز مۇنايىن الەمگە ساۋدالاي بىلۋدە. اقش ەنەرگەتيكالىق اقپارات باسقارماسىنىڭ باعالاۋى بويىنشا، تەگەران مۇناي ەكسپورتىنان 2023 جىلى 53 ملرد دوللار جانە 2024 جىلى 54 ملرد دوللار تابىس تاپقان. ال 2024 جىلى ءوندىرىس كولەمى، وپەك مالىمەتتەرىنە سايكەس، 2018 جىلدان بەرگى ەڭ جوعارى دەڭگەيگە جەتتى. دەمەك، سانكسيالار اسەرى بۇل ارادا كورىنبەيدى. جالپى، يران مەن ارابتىڭ رەسمي تۇلعالارى قاڭتار ايىندا اق ۇيگە ورالعان ترامپ يراننىڭ مۇناي ونەركاسىبىنە تاعى دا قىسىم جاساۋعا كىرىسەتىنىن ايتادى" دەپ Reuters-كە سىلتەمە جاساپ Tengenomika Telegram ارناسى جازادى.
ويتكەنى، باتىستىڭ يرانمەن يادرولىق كەلىسىمىن بۇزىپ، 2018 جىلى يران مۇنايىنا قارسى سانكسيالاردى قايتا ەنگىزگەن ترامپتىڭ ناق ءوزى بولاتىن. دەمەك، بۇل زەرتتەۋ ماتەريالدىڭ ءوزى دە كەزدەيسوقتىق ەمەس سەكىلدى.
شەتەلدىك باق-تا كولەڭكەلى فلوتتىڭ جانە سانكسيالاردى اينالىپ ءوتۋ جاعدايىنا "Remy" مۇناي تانكەرىنىڭ قىزمەتى مىسالعا الىنادى، ول ەكى ماقساتتا جۇمىس ىستەگەن. 2023 جىلدىڭ اقپانىندا مالايزياعا بارا جاتىپ، ول پاناما تۋى استىندا يراكتان 1 ملن باررەل بولاتىن كونتراباندالىق مۇناي تاسىمالداعان. ءبىراق، تۋرا وسى تانكەر مۇناي كونترابانداسى توبىنا ەنىپ، تاعى ءبىر، ياعني Deep Ocean دەگەن اتاۋعا يە بولعان. بۇل جاعدايدا ول يراننىڭ شيكى مۇنايىن جاسىرىن تاسىعان. كاپيتاننىڭ قولىندا يراننىڭ ۇلتتىق مۇناي كومپانياسىنىڭ ەكىنشى ءبىر سەرتيفيكاتى بولعان.
يراننىڭ Sahara Thunder كومپانياسى پايدالاناتىن فلوت رەتىندە Remy يران تۋى استىندا Sahara Thunder، Sonia 1 جەلىسىندەگى باسقا كەمەدەن يران مۇنايىن تيەپ الىپ وتىرعان. 22 اقپاندا اياقتالعان بۇل قۇپيا تاسىمالدى ەۋروپالىق عارىش اگەنتتىگىنىڭ Sentinel-2 جەرسەرىگى تىركەگەن. ونىڭ ۇستىنە حاكەرلەر Sahara Thunderء-دىڭ 10 مىڭنان استام حاتتارىن جاريا ەتتى، ولاردا 2022 جىلدىڭ ناۋرىزىنان باستاپ 2024 جىلدىڭ اقپان ارالىعىن قامتيتىن مۇناي ساۋداسى مالىمەتتەرى قامتىلعان.
حاتتاردا كورسەتىلگەن كەزەڭ ارالىعىندا Sahara Thunder الەمنىڭ تۇكپىر-تۇكپىرىنە شامامەن 20 ملن باررەل مۇناي جەتكىزگەن، بۇل 2023 جىلعى ورتاشا نارىقتىق باعامەن ەسەپتەگەندە شامامەن 1،7 ميلليارد دوللاردى قۇرايدى. Reuters اگەنتتىگى حاتتار ارقىلى Sahara Thunder كومپانياسى پايدالاناتىن كەمەلەردىڭ مۇناي تاسىمالداعانىن انىقتادى: يرانداعى بەندەر-ابباستان ءباا-نىڭ فۋدجەيراسىنا، ودان ءارى ۆەنەسۋەلاعا، رەسەيدىڭ سولتۇستىگىندەگى مۋرمانسك وڭىرىنە جانە شيكى مۇنايدى جەتكىزۋدەگى سوڭعى نۇكتە بولىپ تابىلاتىن قىتايداعى ءبىرقاتار پورتتارعا.
"تەك يراننىڭ عانا ەمەس، سونىمەن بىرگە سانكسياعا ۇشىراعان رەسەيلىك مۇنايدى دا قامتيتىن بۇل كولەمنىڭ قوزعالىسى الەمدىك مۇناي نارىعى ۇسىنىس جاعىنان قانىق دەگەندى بىلدىرەدى. بۇل وپەك جانە وپەك + ۇيىمدارىنىڭ باعانى تىزگىندەپ ۇستاپ تۇرۋ شارالارى تيىمدىلىگىن تومەندەتەرى ءسوزسىز. ەكىنشى جاعىنان، باتىس ەلدەرى ەنگىزگەن سانكسيالاردىڭ تيىمدىلىگى جانە ولاردىڭ ورىندالۋى دا سىنعا ۇشىراۋدا"، دەپ جازادى ساراپشى عالىمجان ايتقازين.
بۇعان دەيىن سايتىمىزدا "قازاقستان وپەك-تەن شىعا سالۋى مۇمكىن بە" دەگەن ماقالا جاريالانعان بولاتىن.
