تاياۋدا الگى جىگىت مەنىڭ بولمەمە تەلەفون شالىپ، وزىنە كەلىپ كەتۋىمدى، اقىلداساتىن شارۋا بار ەكەنىن ايتتى. جۇرت ماقتاعان «مىقتى مامان» ءوزى شاقىرىپ، مەنىڭ «اقىلىما» مۇقتاج بولىپ تۇرعاندا قالاي قاراپ تۇرايىن. تەلەفوننىڭ تۇتقاسىن قويا سالىپ، تومەندە ورانالاسقان «مىقتى ماماننىڭ» بولمەسىنە كوپ كۇتتىرمەي، جەتىپ باردىم.
جىلى امانداسقاننان كەيىن جوعارىدان (مينيسترلىكتەن) كەلگەن ءبىر ادەپكى حاتقا (مۇنداي حاتتار ءبىزدىڭ مەكەمەگە ءجيى كەلەدى) قازاق تىلىندە جاۋاپ جازۋ كەرەك ەكەنىن ايتتى.
سويتسەم سول ءبىر قازاق تىلىندەگى ءۇش-تورت سويلەمگە اقش-تا دۇنيەنىڭ وقۋىن تاۋىسىپ كەلگەن «ماماننىڭ» ميى جەتپەي جاتىر ەكەن. سونداعىسى «سىزدەردىڭ تاپسىرمالارىڭىز بويىنشا وسىنداي، وسىنداي جۇمىستار اتقارىلدى» دەگەن جاۋاپتىڭ قيسىنىن كەلتىرە الماي، قاتتى قينالىپتى.
ءبىزدىڭ مەكەمەدەگى قازاق تىلىنە جۇيىرىك مامان بولعان سوڭ، قازاقشا قۇجاتتار مەنىڭ ءبىر قاراۋىمنان وتەتىن. سوندىقتان «مىقتى ماماننىڭ» ميى جەتپەگەن جاۋاپ حاتتى تابان استىندا جازىپ بەردىم. ول قاتتى ريزا بولدى.
«مىقتى ماماننىڭ» ءتۇر-سىقپىتى «بولاشاق» باعدارلاماسى بويىنشا وقىپ كەلگەن جاستارعا ۇقساعان سوڭ:
– «بولاشاق» باعدارلاماسى بويىنشا وقىدىڭىز با؟ – دەپ سۇرادىم.
– جوق. ءوز اقشاممەن اقش-تا ءتورت جىل ءبىلىم الدىم، – دەدى.
– سوندا قانداي ماماندىقتى يگەردىڭىز؟
– «يندۋستريالدى ەكونوميكا» ماماندىعى بويىنشا ءبىلىم الدىم، – دەدى. مىنا جاۋاپتان كەيىن قازاق ءتىلىن بىلمەيتىنى بولماسا (بۇل ەندى بىزدەگى ادەپكى جاعداي عوي، ءتىپتى، سىزگە كىم ايتتى قازاق ءتىلىن بىلمەۋ كەمشىلىك دەپ) شىنىمەن دە «مىقتى مامان» ەكەنىن تۇسىنگەندەي بولدىم. «مىقتى ماماننىڭ» قانشالىقتى مىقتى ەكەنىن سىناي تۇسكىم كەلىپ:
– بالەنشە-ەكە، ءبىزدىڭ قازاقستاندا ءوزىڭىز ايتقان «يندۋستريالدى ەكونوميكا» بار ما؟ – دەدىم.
– اعاسى، ءبىزدىڭ ەلدەن ونداي «يندۋستريالدى ەكونوميكا» جوق قوي. ونداي ەكونوميكا مىنا ىرگەدەگى جۇڭگو مەن رەسەيدە، سوناۋ... اقش-تا بار، – دەدى.
– ەەە.. – دەپ ءتىل ۇشىنا كەلگەن «سوندا ءسىز سەكىلدى «مىقتى ماماننىڭ» قازاقستانعا الىپ-قوسار قانداي پايداسى بار؟» دەگەن سۇراقتى قويۋدى ارتىق ساناپ، اڭگىمەنى كىلت ۇزۋگە تۋرا كەلدى.
جالپى ەلىمىزدە مەملەكەتتىك بيۋدجەت ەسەبىنەن سىرت ەلدە وقىپ كەلگەن (قازاقشا بىلمەيتىن) مۇنداي «مىقتى ماماندار» كوپ قوي. ءبىراق قالتاسىنان قىرۋار اقشا شىعارىپ، قازاقستاندا جوق ماماندىقتى يگەرگەن مىنا «مىقتى ماماننىڭ» ىس-ارەكەتىن اقىلعا سىيدىرا المادىم. مەملەكەتتىڭ ەسەبىنەن وقىسا تۇسىنۋگە بولار ەدى (ءبىزدىڭ قازىنامىز كەڭ قولتىق قوي، شىركىن).
ەندى مىنە، ەلدە جوق ماماندىقتى يگەرگەن «مىقتى مامان» بۇرىنعى كازپي-دى بىتىرگەن «ورتانقول ماماننىڭ» (ءوزىمدى وسىلاي باعالايمىن) كومەگىنە مۇقتاج بولىپ جۇرگەنى.
بۇگىندە مۇنداي اقىلعا سيمايتىن ارەكەتتەرگە ءجيى كەزدەسەتىن بولدىم. سوندىقتان وعان باس قاتىرۋدىڭ قاجەتى جوق شىعار، ءا؟
جاربول كەنت ۇلى، وقىرمان.
