استانادا ماس كۇيدە كولىك باسقارعان پوليسيا قىزمەتكەرى اكىمشىلىك جاۋاپكەرشىلىككە تارتىلدى، دەپ حابارلايدى Dala News.
استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ مالىمەتىنشە، ازامات د. ق ر اقبتك-نىڭ 608-بابى 1-بولىگى بويىنشا كىنالى دەپ تانىلعان.
سوت بارىسىندا ونىڭ الكوگولدىك ماساڭ كۇيدە كولىك جۇرگىزگەنى مەديسينالىق كۋالاندىرۋ قورىتىندىسىمەن جانە سوتتا زەرتتەلگەن بەينەماتەريالدارمەن دالەلدەنگەن.
سوت شەشىمىمەن قۇقىق بۇزۋشى 7 جىل مەرزىمگە كولىك قۇرالدارىن باسقارۋ قۇقىعىنان ايىرىلدى.
سونىمەن قاتار ونىڭ پوليسيا قىزمەتكەرى ەكەنى ەسكەرىلىپ، اقبتك-نىڭ 32-بابىنا سايكەس اكىمشىلىك قاماۋ قولدانىلماعان.
سوت قاۋلىسىنىڭ كوشىرمەسى قۇقىق بۇزۋشىنى تارتىپتىك جاۋاپكەرشىلىككە تارتۋ ماسەلەسىن قاراۋ ءۇشىن پوليسيا دەپارتامەنتىنە جىبەرىلگەن.
ءىس اپەللياسيالىق ساتىدا قايتا قارالىپ، ناتيجەسىندە ءبىرىنشى ساتىداعى سوتتىڭ قاۋلىسى وزگەرىسسىز قالدىرىلدى. قاۋلى زاڭدى كۇشىنە ەندى.
