قىتايدىڭ CGTN ارناسىنا بەرگەن سۇحباتىندا قازاقستاننىڭ عىلىم جانە جوعارى ءبىلىم ءمينيسترى ساياسات نۇربەك ەلىمىز ءبىلىم بەرۋ سالاسىن دامىتۋدا قىتايدىڭ ءبىلىم بەرۋ مودەلىنە باعدار ۇستاپ وتىرعانىن ايتتى، دەپ حابارلايدى Dalanews.kz. 

ءمينيستردىڭ سوزىنشە، قازاقستاندا قىتايدىڭ عىلىم سالاسىنا قۇيىپ وتىرعان ينۆەستيسيالارى جوعارى باعالانىپ وتىر. ول قىتايلىق ارىپتەستەرگە وسى باعىتتاعى قولداۋى ءۇشىن العىس ءبىلدىرىپ، قازاقستان جۇڭگو تاجىريبەسىن زەرتتەپ، پايدالى تۇستارىن ەنگىزۋگە دايىن ەكەنىن اتاپ ءوتتى.

الايدا بۇل مالىمدەمە قازاقستانداعى ءبىلىم بەرۋ رەفورمالارىنىڭ باعىتى تۋرالى جاڭا سۇراقتاردى دا تۋىنداتىپ وتىر.

جۇڭگو مودەلى، ءبىراق تەستىلەۋ – امەريكالىق جۇيە

ەسكە سالايىق، وتكەن جىلى اقش-قا جاساعان ساپارى كەزىندە ساياسات نۇربەك ۇلتتىق ءبىرىڭعاي تەستىلەۋدى (ۇبت) حالىقارالىق تەست فورماتىنا كوشىرۋ جوسپارى بار ەكەنىن ايتقان. بۇل جوبا بويىنشا قازاقستان امەريكالىق Educational Testing Service (ETS) ۇيىمىمەن ارىپتەستىك ورناتۋدى كوزدەگەن.

وسىلايشا، قازاقستان ءبىلىم بەرۋ جۇيەسىندە جۇڭگو تاجىريبەسىنە سۇيەنۋگە نيەتتى بولعانىمەن، مەكتەپ تۇلەكتەرىنىڭ نەگىزگى ەمتيحانى امەريكالىق تەستىلەۋ ادىستەمەسىنە نەگىزدەلۋى مۇمكىن.

ساراپشىلار مۇنداي باستامالاردىڭ كوبىنە ينۆەستيسيا تارتۋ ماسەلەسىمەن قاتار تالقىلانىپ جۇرگەنىنە نازار اۋدارىپ وتىر.

ءبىلىم بەرۋ مودەلىن قالىپتاستىرۋداعى پىكىرتالاس

الەمدىك تاجىريبەدەن پايدالى تاسىلدەردى ەنگىزۋ – قالىپتى قۇبىلىس. الايدا ءارتۇرلى ەلدەردىڭ ءبىلىم بەرۋ جۇيەلەرىنەن ەلەمەنتتەردى بىرىكتىرىپ، ولاردى ءبىر ۇلتتىق مودەلگە بەيىمدەۋ ءاردايىم ءتيىمدى بولا بەرمەيدى.

سوڭعى جىلدارى الەمدە ءبىلىم بەرۋ جۇيەلەرى ەلدەن ەلگە، ءتىپتى ايماقتان ايماققا قاراي ايتارلىقتاي ەرەكشەلەنەتىنى انىق بايقالدى. سوندىقتان كەيبىر ساراپشىلار ۇلتتىق ءبىلىم بەرۋ جۇيەسىن قالىپتاستىرۋدا سىرتقى ۇلگىلەردى شامادان تىس ارالاستىرۋ داۋلى تاجىريبە بولۋى مۇمكىن ەكەنىن ايتادى.