Qytaidyń CGTN arnasyna bergen suhbatynda Qazaqstannyń ǵylym jáne joǵary bilim ministri Saiasat Nurbek elimiz bilim berý salasyn damytýda Qytaidyń bilim berý modeline baǵdar ustap otyrǵanyn aitty, dep habarlaidy Dalanews.kz.
Ministrdiń sózinshe, Qazaqstanda Qytaidyń ǵylym salasyna quiyp otyrǵan investitsiialary joǵary baǵalanyp otyr. Ol qytailyq áriptesterge osy baǵyttaǵy qoldaýy úshin alǵys bildirip, Qazaqstan Qytai tájiribesin zerttep, paidaly tustaryn engizýge daiyn ekenin atap ótti.
Alaida bul málimdeme Qazaqstandaǵy bilim berý reformalarynyń baǵyty týraly jańa suraqtardy da týyndatyp otyr.
Qytai modeli, biraq testileý – amerikalyq júie
Eske salaiyq, ótken jyly AQSh-qa jasaǵan sapary kezinde Saiasat Nurbek Ulttyq biryńǵai testileýdi (UBT) halyqaralyq test formatyna kóshirý jospary bar ekenin aitqan. Bul joba boiynsha Qazaqstan amerikalyq Educational Testing Service (ETS) uiymymen áriptestik ornatýdy kózdegen.
Osylaisha, Qazaqstan bilim berý júiesinde Qytai tájiribesine súienýge nietti bolǵanymen, mektep túlekteriniń negizgi emtihany amerikalyq testileý ádistemesine negizdelýi múmkin.
Sarapshylar mundai bastamalardyń kóbine investitsiia tartý máselesimen qatar talqylanyp júrgenine nazar aýdaryp otyr.
Bilim berý modelin qalyptastyrýdaǵy pikirtalas
Álemdik tájiribeden paidaly tásilderdi engizý – qalypty qubylys. Alaida ártúrli elderdiń bilim berý júielerinen elementterdi biriktirip, olardy bir ulttyq modelge beiimdeý árdaiym tiimdi bola bermeidi.
Sońǵy jyldary álemde bilim berý júieleri elden elge, tipti aimaqtan aimaqqa qarai aitarlyqtai erekshelenetini anyq baiqaldy. Sondyqtan keibir sarapshylar ulttyq bilim berý júiesin qalyptastyrýda syrtqy úlgilerdi shamadan tys aralastyrý daýly tájiribe bolýy múmkin ekenin aitady.
